47
Philistia taw kisai Topa ii Thupuak
1 Egypt kumpipa in Gaza khua a sim ma in Philistia mite taw kisai in Topa in keima tungah thu hong son hi. Ref 47:1-7 Is 14:29-31; Eze 25:15-17; Jol 3:4-8; Amo 1:6-8; Zep 2:4-7; Zec 9:5-7
2 Ama in:
“En in! Sak sangah tui khang a,
nguntui pawm bangin luang tu hi.
Tua tuite in leitung le a tungah a om na theampo,
khuapite le a sungah a teang mihingte khuum tu hi.
Mihingte in hu ngenin au tu uh a;
lei tungah om theampo in nasia takin kap tu hi.
3 Amate in, siphu khuasuan ngingte,
siphu ngalleang ngingte,
a mui ngingte za tu uh hi.
Nute pate sia a tate en kik tu in hong heak kik ngawl tu uh a;
amate ii khutte a pangh ah kaai suk niingniang tu hi. .
4 Philistia suksiat tu hun,
Tyre le Sidon pan a,
a nga sun hunate theampo khatan tu hun hong theng zo hi.
Keima, Topa in Crete tuikulh pan a hong pai
Philistia te theampo ka susia tu hi.
5 Gaza mite tungah heena lian theng zo a,
Ashkelon ii mite dai dide in om uh hi.
Philistia mi a om laiteng bang tanvei kap tu uh ziam?
6 ‘ Topa ii Namsau awng!
Bang tanvei vaat lai tu ni ziam?
Na paai zuan kik in a,
tua munah om in tawlnga in!’ ci in na au uh hi.
7 Ahihang a sep tu nasep ka piaksa ahiciang,
bangbangin tawlnga thei tu ziam?
Ashkelon le tuipi hui ah a teang
mite sim tu in thu ka pia zo hi,” ci hi.