46
Carchemish ah Egypt ii Ngallelna
1 5 Topa in minamte ii thu ka tungah hong son a,
2 Egypt ii thu taw in hong pan hi. Jehoiakim ii Judah kumpi a sua zawk a kum lina kumin Eupharates ngunhui Carchemish ah Babylon kumpipa Nebuchadnezzar ii a zaw Egypt kumpipa Neco ii ngalkaphonpi thu sia Topa in hi bangin ci hi: Ref 46:2-26 Is 19:1-25; Eze 29:1—32:32
3 “Egypt ngalkapbu te au in,
‘Na lumte kinging vun a, ngalsim na ah kuan vun!
4 Na siphute kamkhau thua vun a, a tungah to vun!
A ngui in kingual vun a na thik lukhute khu vun!
Na teite taat vun!
Na thik puante silh vun!’ ci uh hi.
5 Topa in “Ahihang keima in bang mu khi ziam?” ci in dongh hi.
“Amate lau in heak kik uh hi.
A ngalkapte kinot kik hi;
a ngalte kiita mama ahikom a ngang thei zaza in tai a,
a nungsang en kik ngawl uh hi.
6 A manlang a taite zongh taisuak thei ngawl a;
a ngalkapte suakta zo ngawl uh hi.
Saksang, Euphrates ngun hui ah
amate lutu in puk uh hi.
7 Nile ngun bangin khang a,
ngunvaal leet a, a pawm bang ahi sia akua ziam?
8 Nile ngun bangin khang a,
ngunvaal leet bang a, a pawm sia Egypt ahi hi.
Egypt in, ‘Ka khangto tu a, leitung ka khuum tu hi;
khuapite le khuapi sungah a teang mihingte ka susia tu hi.
9 Siphute a pai natu le siphu ngalleangte
a mui a pei natu thupia vun!
Ngalkapte kuansak vun:
Ethiopia le Libya pan lum toaite le,
Lydia mi thalkaap thiamte kuansak vun’ ci hi,” a ci hi.
10 Tuni sia Vaanglianpipa Topa, Vaanglianbelpa ii ni hi:
tuni in ama in phula tu hi;
tuni in ama in a ngalte daan pia tu hi.
A namsau in a kham dong amate ne tu a,
a lungkim dong a chi dawn tu hi.
Tuni in Vaanglianbelpa in saksang Euphrates ngunhui ah
a ngalmatte biakpiakna in nei hi.
11 Egypt mite awng,
Gilead ah pai vun a
zatui zong tavun!
Na zatuite theampo kimanna nei ngawl a;
bangma in no hong damsak thei ngawl hi.
12 Minamte theampo in na maizumna za zo a;
na kaana mihing theampo in za zo hi.
Ngalkapte khat le khat kituan tha a,
a nii in lei ah puk uh hi.
Nebuchadnezzar Hong paina
13 Babylon kumpipa Nebuchadnezzar sia Egypt sim tu in hong pai ciang, Topa in kei hong paupui hi. Ama in, Ref 46:13 Jer 43:10-13
14 “Egypt ngamsung khuate
Migdol, Memphis le Tahpanhes ah thangsak in:
‘Noma le noma a kihu tu in kinging vun;
noma neisa theampo ngal kisimna sungah kisusia tu hi!
15 Banghangin a thahat note pathian Apis taaksuk zo ziam?
Topa in ama saat vawk hi!’
16 Noma ngalkapte lutu in puk zo hi;
amate khat le khat ii tungah,
‘Manlang vun! Ih mite ii inn ah cia in
ngalte namsau pan suakta tawng!’ kici uh hi.
17 “Egypt kumpipa min thak khat vaw vun —
‘Kiphatsak Kam bebek pau a, a Hunpha a Taanpa’ ci vun.
18 Vaanglianbelpa Topa Keima sia kumpipa ka hi hi.
A nungta Pathian ka hi hi.
Mual dangte sangin Tabor mual a saan zawk bangin,
Carmel mual sia tuipi tungah dawk to in a saan bangma in,
No hong sim sia pa ii thahatna zongh lian tu hi.
19 Egypt mite awng, luangta tu in kinging vun!
Memphis khua sia sennealngam kisuaksak tu a,
kisiacip in kuama teang ngawl hi.
20 Egypt ngam sia saksang panin
hong leang thataa ii a pe khuipui limci khat taw kibang hi.
21 A cialsa ngalkapte ngawngawn khuinote bangin cimaw uh hi.
Amate in nang kenkon in do ngawl a; nungkin in tai siat uh hi.
Amate ii a lal ni le a siat hun hong theng zo hi.
22 A ngalte ii ngalkapte in a neak vaial uh ciang,
Egypt sia ngul khat a haam bangin haam in taikeak hi.
Thingphuk thei mite in taam ngam a sukthap uh bangin,
23 amate in tua ngam sia hei taw sim uh hi.
A mite sia sim zawk ngawl tu za in tam lei a,
a ngalkapte sia khaumawte sangin tamzaw uh hi.
24 Egypt mite sia maizum ngasak a;
saksang mite in amate zothal uh hi.
Keima, Topa in ka son zo hi,” hong ci hi.
25 Vaanglianbelpa Topa, Israel te ii Pathian in, “Thebes te pathian Amon sia Egypt le a pathiante sia a kumpipate taw daan ka pia khawm tu hi. Egypt kumpipa le ama a muang theampo ka la tu a,
26 amate a that nuam Babylon kumpipa Nebuchadnezzar le a ngalkaphonpi khut sungah ka aap tu hi. Ahihang hun khat ciang, nidang hun a ten ngei bangma in Egypt ngam ah mihingte teang kik tu uh hi. Keima, Topa in ka son zo hi,” ci hi.
Topa in A mite Ngum tu
27 “Ka mite awng, lau heak vun,
Israel mite awng, patau heak vun.
Na thongtaakna uh ngam khuala na pan kong suatak tu hi.
Note na inn na lo ah
na cia kik tu uh a thinnuam in na teang tu uh hi;
note ngam muangin na om tu uh a, hong lausak kuama om ngawl tu hi. Ref 46:27-28 Jer 30:10-11
28 Note kungah kong pai tu a kong ngum tu hi.
Note kong thethaang na
ngam theampo ka susia tu a,
ahihang no kong susia buatu hi.
Daan piak ngawlin note kong tha thong buatu hi;
ahihang a kilawm za in daan kong pia tu hi.
Keima, Topa in ka son zo hi,” ci hi.