24
Thei nga Bawm nii
1 Topa in Biakinnpi mai ah a kikoi theinga bawm nii kei hong lak hi. Hi thu sia Babylon kumpipa Nebuchadnezzar in Jerusalem khua panin Jehoiakim ii tapa Judah kumpipa Jehoiachin sia thongtaak khatin Judah lampuite, khutthiamte le naseam thiamte theampo taw Babylon khua ah a paipui zawkciang thupiang ahi hi. Ref 24:1 2 Kum 24:12-16; 2 Khang 36:10
2 Bawm a masa sia sungah a om theingate sia a min pal theinga phate hi a; a dang bawm sia ii sungah a om theingate sia neak tu zong a pha ngawlte ahi hi.
3 Tua zawkciang Topa in keima tungah, “Jeremiah awng, bang na mu ziam?” hong ci hi, “Theinga ka mu hi. A phate sia pha mama a, a siate ahile sia leilam ahikom neak thei tu hi ngawl hi,” ci in ka zo hi.
4 Tuaciang Topa in keima tungah,
5 “Keima, Topa Israel mite ii Pathian in Babylon ah a kipaipui mihingte sia hi theinga phate taw kibang a, ka phat vawt tu hi.
6 Amate ka en tu a, hi ngam ah ka ciapui kik tu hi. Amate ka laamto tu a, ka khiasuk buatu hi; amate ka suan tu a, ka botkeak buatu hi.
7 Keima Topa ka hi hunlam heak nopna thin ka pia tu hi. Tuasia ciang amate sia ka mite hi tu a, keima in a Pathian ka hi tu hi, banghang ziam cile amate in a thin theampo taw ka kung hong zuan kik tu uh hi.
8 “Judah kumpipa Zedekiah atu ahile, a vaihawm pui uliante le hi ngam sungah a om suak Jerusalem khua mi a taanglai teng ahibuale Egypt ngam ah a taite — a vekpi in neak tu in a sia leilam hi thei ngate bangin keima Topa in ka vawt siat tu hi.
9 Amate tungah tuabang tuasiatna ka thengsak tu a, leitung minamte theampo patau tu uh hi. Mite in amate sia ciammuina lelin nei a, nunau selno in, amate ka thethaangna mun theampo ah a min uh sia kihaamsiatna in zangh tu uh hi.
10 Amate le a taanghpupite tungah ka piaksa ngam sungah amate khat zongh a taang nawn ngawl dongin ngal kidona, kialpi tunna le natna ngilo ka tungsak tu hi,” hong ci hi.