23
Maisang atu Lametna
1 Ama mite suksiatsak a, a thethaangsak ngam uk uliante tungah Topa ii thukhenna in bangza in lauhuai tu ziam!
2 Ama mihingte keamcing tu a, a kingaisun ngamukte taw kisai in Topa, Israel ii Pathian in hi bangin ci hi: “Ka mihingte nong kepcingsak bua uh hi; na thethaang zo a na hawlkeak uh hi. A sia na vawt uh hu in tu in daan kong pia tu hi.
3 Ka mihingte a taanglai teng ka thethaang na ngamte panin ka kaikhawm tu a, a ngam ah ka ciasak kik tu hi. Amate in ta tam mama nei in pung mama tu uh hi.
4 Amate a khoi a keam tu in ngamukte ka koi tu hi. Ka mihingte sia lau nawn ngawl patau nawn ngawl tu a, daan ka pia kik buatu hi. Keima, Topa in ka ci zo hi.”
5 Topa in, “David suan a thumaan khat kumpi tu in ka teal tu hun hong theng tu hi. Tua kumpipa in ciimna taw ngam uk tu a thumaan thutang sia seam in a ngam buppi uk tu hi. Ref 23:5-6 Jer 33:14-16
6 Ama kumpi a sua ciang, Judah mite ngam muang tu a, Israel mite kilemna taw thinnuamin om tu uh hi. Ama sia ‘ Topa, Eite Ngupna’ “Jehovah Tsidkenu”
kici tu hi.
7 Topa in, “Egypt ngam pan Israel mihingte a pusua pui a nungta Pathian, keima min taw mihingte ii a kiciam nawn ngawl hun hong theng tu hi.
8 Amate in saksang ngam pan le amate ka thethaangna ngamdang theampo panin Israel mite a pusua pui, a nungta Pathian, keima min taw kiciam zaw tu uh hi. Tua zawkciang amate sia a ngamsung ma ah teang tu uh hi,” ci hi.
Kamsaangte taw kisai Jeremiah ii Thupuak
9 Ka thin kitamhtham in ka liing hi.
Topa hang le ama ii kammal thiangthote hangin,
sapittui tam ne leih in a kham pa khat taw ka kibang hi.
10 Tua ngam sia Topa tungah a thumaan ngawl mihingte taw kidim hi;
amate sia a seksol nuntakna taw nungta in a vaang neina uh zangh khial uh hi.
Topa ii haamsiatna hangin
hi ngam sia khuangai in om a, ngamsung lonote kongaw hi.
11 Topa in, “Kamsaangte le thiampite Pathian sel uh a;
ka Biakinnpi sung mama ah a tatsiat laitak ka man zo hi.
12 Amate ii tot lampite sia naalin khuazing tu hi;
amate ka lutusak tu a, ka puksak tu hi.
Amate ii tungah tuasiatna ka thengsak tu a;
amate ii daan thuak tu hun hong theng tu hi.
Keima, Topa in ka ci zo hi.
13 Samaria kamsaangte ii mawna ka mu zo hi:
amate in Baal min suangin thuhil uh a ka mite lam pialpui uh hi.
14 Ahihang Jerusalem khua a kamsaangte in a sia zaw lai a vawt ka mu hi:
amate in nupa kipalngul in leilot thu son uh hi;
mihingte ii ngitlo ngamtatna pan a kheal ngawl natu in
mihingte khial natu panpui uh hi.
keima muna ah amate sia
Sodom le Gomorrah mite bangma in sia siat uh hi. Ref 23:14 Pian 18:20: Eze 16:49
15 “Tua ahikom, Jerusalem khua a kamsaangte taw kisai in, keima, Vaanglianbelpa Topa in hi bangin ka ci hi:
A neak tu in a khaa thingno kungte ka pia tu a
a dawn tu in nguu ka pia tu hi,
banghang ziam cile amate in Pathianzia bang ahi ngawlna thu sia
ngam buppi ah zelsak uh hi.”
16 Vaanglianbelpa Topa in Jerusalem mite tungah, “Kamsaangte ii thusonte ngai heak vun; amate in a maan ngawl lam etnate hong dimh uh hi. Amate in keima ii ci ahi ngawl, amate ii ngaisut tawmte no tungah hong son uh hi.
17 Ka ci bang hong ngai nuam ngawl mihingte tungah na theampo amate atu in pha tu zam ci tan lai uh hi. Amate in mihing thinpui khat sim tungah tua siatna in ama thutha ngeingawl tu hi ci in son uh hi,” a ci hi.
18 Keima in, “Hi kamsaangte kuama in Topa ii ngaisutna thuku te he ngeingawl uh hi. Amate kuama in Topa ii thupuak sia za ngeingawl, tel ngeingawl ahibuale a ci sia ngai ngeingawlin nadon ngeingawl uh hi.
19 Ama ii thin uukna sia vuipi nguapi bangin mi seksolte ii lu tungah puaktham tu a,
20 ama ii tupna teng a vekpi a vawt siat mateng in a thin uukna thai ngawl tu hi. Mailam sangah a mite in hi thu telthiang tu uh hi,” ka ci hi.
21 Topa in, “Hi kamsaangte ka puak bua hi, ahihang amate pai veve uh hi. A son tu thu ka piak ngawl ahihang ka min suangin thuson veve uh hi.
22 Amate in ka ngaisutna thuku te he hi thong ka pole ka thupuak sia ka mite tungah thangsak zo tu uh a, nuntakna siate le a seksol ngamtatna te nusiasak siat zo tu hi.
23 “Keima in mun khat bek ah a om hi ngawlin mun theampo ah a om Pathian ka hi hi.
24 Ka mu thei ngawl tu in a buu thei tu kuama om ngawl hi. Vantung leitung mun theampo ah ka om hunlam he ngawl nu ziam?
25 Amate mang sungah ka thupuakte hong pia zo hi ci a keima min suangin leilot thu a son kamsaangte ii thusonte ka he hi.
26 Tua kamsaangte in amate phuatawm leilot thute taw ka mite bang tanvei lam khialsak tu uh ziam?
27 A taanghpupite in kei hong mangil a Baal kung a zot bang keakin, ka mite tung a son, a mangmatte in kei hong mangilsak tu hi ci in um uh hi.
28 Tua mangman kamsaang pa in hi thu sia mang bekma hi ci tahen a, ahihang ka thupuak a za kamsaang pa in ka thupuak sia maan takin thangsak tahen. Taangphaw le zungtaang tang teengat tu pha ziam?
29 Keima thupuak sia mei taw kibang a, suangtum a bebekin a sutham thei sek taw kibang hi.
30 Khat le khat a kammal uh kila a, keima ii thupuak hi ci a, a thangsak kamsaangte ka langpan hi.
31 Keima kung pan hong pai hi ci a, amate ii aituam kammalte a son kamsaangte zongh ka langpan si hi.
32 Keima, Topa ii ka ci sia ngai vun! Leilot thu nguaktang ahi amate ii mangte a son kamsaangte ka langpan hi. Amate in hi mangte sonin a leilotnate le a kisaktheina uh taw in ka mite lam khialpui uh hi. Amate ka paisak bua a, thu zongh ka pia bua hi, mihingte atu in amate kimanna nei vet ngawl hi. Keima Topa in ka son zo hi,” ci hi.
Topa ii Vanh ngit
33 Topa in keima tungah, “Jeremiah awng, ka mite khat ahibuale, kamsaang khat ahibuale thiampi khat in ‘ Topa ii thupuak sia bang ziam’ ci in nang hong dok ciang, nangma in ama tungah ‘Nangma in Topa atu in vanhngit khat na hi a, ama in nang hong heam tu hi,’ na ci tu hi.
34 Ka mite khat ahibuale kamsaang khat ahibuale thiampi khat in, ‘ Topa ii Vanhngit’ ci kammal a zangh zezen ahile ama le a inn kuanpuite daan ka pia tu hi.
35 Tuasia luangin, khat simin a lawmte le a mealheakte tungah ‘ Topa in bangbangin hong zo ziam? Topa in bang ci ziam?’ dongh zaw tahen.
36 Tua ahikom amate in ‘ Topa ii Vanhngit’ ci kammalte zangh nawn ngawl tu uh hi, banghang ziam cile khat pawpo in a zangh ahile, ka thupuak sia ama atu in vanhngit takpi khat ka suaksak tu hi. Mihingte in amate ii Pathian, a nungta Pathian, Vaanglianbelpa Topa ii kammalte lumlet uh hi.
37 Jeremiah awng, kamsaangte tungah ‘ Topa in zona bang hong nei ziam? Topa in bang ci ziam?’ dongh in.
38 Amate in ka thupiak sia a ni bua uh a, ‘ Topa ii Vanhngit’ ci kammal a zangh uh le tuasia ciang,
39 keima in amate ahizong, amate le a taanghpupite tungah ka piaksa khuapi sia ahizong ka la takpi tu a, ka omna panin a khuala na ah ka vawkkhop tu sia amate tungah son in.
40 Bangma hunin a kimangil ngeingawl tu a tawntung maizumna le min paanna amate tungah ka tungsak tu hi,” hong ci hi.