2
Pathian ii Israel A khoina
1 Topa in Jerusalem khua sungah a om mihingte theampo tungah hi thu thangsak tu in kei hong sawl hi.
2 “Na khangno lai in na thumaanna
ih kiteen sawng lai a kei nong itnate ka phawk hi;
sennealngam, an kicing ngawl leitang kaantanin kei nong zui hi.
3 Israel awng, nang in keima aa bek na hi a;
nangma in a thiangtho ka neisa na hi hi.
Nang hong nasak mihingte theampo tungah
tuasiatna le ngimna ka tungsak hi.
Keima, Topa in ka son zo hi,” hong ci hi.
Israel ii taanghpupite ii Mawna
4 No Jacob ii suan le paalte, Israel minam teng awng, Topa ii hong thuhilna ngai vun.
5 Topa in:
“Na taanghpupite in kei hong langpanin bang hong mawsiat ziam?
Kei kung pan amate a puapialsak sia a bang ziam?
Amate in a man nei ngawl milimte bia in
amate mama a man nei ngawl suak uh hi.
6 Keima in amate Egypt ngam pan suatakin duisung ngampa:
sennealngam le dumkhuk sung,
lei kongaw a, kuama teen ngawl, a lau huaina mun le
kuama khual zongh a haw ngawl natu mun kaantanin amate keima in lampui hi napi
amate in kei, hong awlmawk ngawl hi.
7 Keima in amate thaw an laaknate le a dang a phate a nga natu in
leiphana mun ka thetpui hi.
Tua hi napi amate in
ka ngam siasak zaw a; amate ka piaksa ngam ninsak uh hi.
8 Thiampite in, ‘ Topa koisung om ziam?’ ci in zongh dongh ngawl uh hi.
Keima ii thiampite mama in kei hong he ngawl uh hi.
Ngam ukte in kei hong langpan uh a;
kamsaangte in Baal min suangin thuson uh a,
tuaciang bangma kimanna a nei ngawl milimte bia uh hi.
Topa in A Mite Mawsiat
9 “Tua ahikom keima, Topa in ka mite ka mawsak kik tu hi.
Amate ii suan le paalte tungah thu ka vawt tu hi.
10 Nitumna sang Cyprus tuikulh ah pai in,
tuaciang khat po nisuana sang Kedar ngam ah paisak in.
Nidangin hi bang thu piang ngeingawl cisia na mu tu hi.
11 Minam dangte kuama in a pathiante uh sia pathian tatak ahi ngawl hang
kheal ngeingawl uh hi.
Ahihang ka mite in amate vaang a pia Pathian, keima sia,
amate atu bangma a vawtsak thei ngawl pathian taw hong theak zo uh hi.
12 Tua ahikom keima in van sia launa taw in a liin natu,
lamdang a kisak thei mama natu in thu ka pia hi,
13 banghang ziam cile ka mite in mawna khialna nam nii vawt zo uh hi;
amate in a thiangtho ciktui, keima kung pan puapial zo uh hi,
tuaciang amate in tui a cing thei vet ngawl a kektham tuikhukte to uh hi.
Israel ii Thumaan ngawlna hu a Thupiangte
14 “Israel sia sal hi ngawl hi; sal nam in piang ngawl hi.
Tua ahile banghangin a ngalte in zuizen uh ziam?
15 Amate in tawpi bangin ama hawk san uh hi;
amate in ama ngam sennealngam suaksak zo hi,
a khuate siasak zo a, kinusia cip zo hi.
16 Hi hi, Memphis le Tahpanhes mite in ama lu ngu sutham zo uh hi.
17 Israel awng, hi teng na tungah na thengsak hi!
Nang lam kong pui laitakin
nangma in Topa na Pathian, keima nong nusia hi.
18 Egypt ngam ah pai in Nile nguntui neakna taw
bang phatuamna nga tu ki um ni ziam?
Assyria ngam ah pai in Euphrates nguntui neakna taw
bang phattuamna nga tu ki um ni ziam?
19 Nangma siatna in nangma daan hong pia tu a,
kei nong nungngatna in nang hong puavawk tu hi.
Topa na Pathian, keima hong nusia a,
kei tungah thumaanin na om nawn ngawl tu sia
bangzata in sia in khaa a, khial ci sia na tel tu hi.
Keima, Vaanglianpipa Topa, Vaanglianbelpa in ka ci zo hi,” ci hi.
Israel in Topa Biak tu Nial
20 Vaanglianpipa Topa in,
“Israel awng, nidang lai pekin ka thuneina nong nial hi;
ka thu ni ngawlin nong bia bua hi.
Mual saangna theampo tung le
thingkung hing theampo nuai ah ta nei theina pathiante na bia hi.
21 A ci phabel sung pan
deiteal sapitkung khat taw kibangin nang kong suan zo hi.
Ahihang bang suak zo ni ziam en in!
A muatcip, kimanna nei ngawl sapitkung taw na kibang hi.
22 Satpia phabel taw na kisil zongin
na mawna a baang sia ka mu lai tu hi.
23 Bangbangin nangma le nangma ka kininsak bua a,
Baal ka bia ngei bua na ci thei tu ziam?
Munkuam sungah mawna khialna na vawt hi;
na vawt sate mu in.
Nang sia a zual ngawl kalaoh huuk khat taw na kibang a,
leetai kawkoai in
24 sennealngamsung na zuan hi.
A huuk laitakin, akua in uk zo tu ziam?
A ngeam nuam a tal khat atu in hanciam kul ngawl a;
a huuk hunin nga thei tawntung hi.
25 Israel awng, pathian dangte ii nung na delna taw in
na peang toisak heak in a, na dangkosak heak in.
Ahihang nangma in, ‘Hi ngawl hi! hong heak kik thei ngawl tu khi hi.
Keima in ngamdang pathiante ka it a tuate nung ka zui tu hi,’ na ci hi,” a ci hi.
Israel sia Daan piak tu Kilawm
26 Topa in, “Nguta khat a kimat ciang a maimawl bangma in, no Israel mite theampo — na kumpite le uliante, na thiampite le kamsaangte hong maimawlsak tu hi.
27 Thingkung khat sia ka pa hi, suangtum khat sia ka nu hi a cite — no teng na mai uh zum tu hi. Keima kung hong zuan ngawl a puapial na hi uh kom hi thu piang tu hi. Ahihang ngimna na thuak uh ciang hong hun tu in hong pai ta'n ci in nong ngen uh hi.
28 “Noma atu na vawt sa uh pathiante koisungah om ziam? Ngimna na thuak uh ciang amate in hunsak ve vun — amate in hi thei ahile! Judah awng, khuapi na neiza ma in pathian tam mama na nei uh hi.
29 Na phunna uh sia a bang hi kabel ziam? Banghangin kei hong langpan nu ziam?
30 Keima in no, daan kong pia hi, ahihang bangma phatuam ngawl hi; keima ii no kong puua tu nuam ngawl nu hi. Tawpi kitom khat bangin, na kamsaangte uh na thatlum zo uh hi.
31 Israel mite awng, ka kampauna hong ngai tavun. Kei sia note atu in sennealngam khat bang ka hi ngei ziam, khuazing le a lauhuai ngam khat bang ka hi ngei ziam? Tua ahile, banghangin, ka uk bang po in ka ngamta tu uh a, nang kung kong zuan ngei nawn buatu uh hi na ci thei uh ziam?
32 Ngaknu khat in a kizepna suang manphate, ahibuale mothak khat in a mopuante mangil thei ziam? Ahihang ka mite in a kisim zo ngawl ni tam mama sung hong mangil zo uh hi.
33 Lawm zonna zia na thiam mama uh hi. Numei a siabel zongh in no kung panin thiamna hong sin thei hi.
34 Na puante uh sia inn phuulte ii chisan baang ngawlin, mizawngte le mawna nei ngawlte ii chisan baang hi.
“Ahihang, hi bang teng hi napi,
35 nang in, ‘Mawna ka nei bua hi; ka tungah Topa thin uuk nawn ngawl takpi hi’ na ci hi. Ahihang keima, Topa in, mawna ka nei bua hi na ci hu in, daan kong pia tu hi.
36 Minam dangte ii pathiante kung na zot hu in nangma le nangma in na man na kisulhsak zo hi. Assyria te ii na thin hong kiamsak bang keak ma in, Egypt te in na thin hong kiamsak tu hi.
37 Nang in Egypt ngam panin maizumna taw lu kun sa in na heak kik tu hi. Topa, keima in na muan mite ka nial zo hi; amate tung panin bangma phattuamna na nga buatu hi,” ci hi.