JEREMIAH
Kamsaang Jeremiah sia Christ hong pai ma BC kum zalom a salina bo kuan sang le BC kum zalom a lukna kipat sang kilaklaw hun sungah nungta hi.
Ama ii khuangei hialma Pathian na a sep hun sungin amate ii milim biakna le amate ii mawna hangin a minam tungah tuasiatna lian a thet tu sia, ama in Pathian mite tungah kidop natu thu sonkhol hi. Jerusalem sia Babylon kumpipa, Nebuchadnezzar khut sung a thetna, a khuapi le a Biakinnpi a kisukcipna, Judah kumpipa le a mite tam mama Babylon ah sal a tanna taw in hi thu a sonkholna bang tung takpi hi ci sia ama ii nuntak sungah mu hi. Ngamdang ah a saltanna panin a khak belin a mite a heak kik natu thu le minam a kipuuaphat kik tu thute zongh ama in sonkhol hi.
Jeremiah thubu sia a nuai a bangin kikhen hi: (1) Jeremiah a kisamna. (2) Josiah, Jehoiakim, Jehoiachin le Zedekiah te maan hunlai in Judah ngam le Judah mite a ukte tungah Pathian ii a son thute. (3) Jeremiah ii thuzeakpa Baruch ii tepteena sung pan a thute, Jeremiah ii nuntakna panin a thupiang thupite le sonkholna tuatuamte. (4) Ngamdang minam tuatuamte taw kisai Topa ii son thute. (5) A nungah a kibelap taanghthute, Jerusalem khua bona le Babylon ah saltanna thute ahi hi.
Jeremiah sia a mite a it mama le thu le la sang a phawk vilvel pasal khat hi a, a mite tungah thu a kikhennate son tu a uuk ngawl het pa khat ahi hi. Pathian in kamsaang naseam khat tu in a sapna hangin ngimna a thuakna thute thinbot takin a sonna mun tam mama hi. Topa kammal sia a thinsung ah mei taw kibang a — a son ngawlin om thei ngawl hi.
Jeremiah thubu sung pan a thupibel kammal pawlkhat in Jeremiah ii ngimna a thuak hunte a bo zawkciang thuciamna thak khat a pian tu hun lak hi, tuasia sia amate a phawksak kik tu sya kul ngawlin Pathian ii mite in keam nginge tu uh hi, banghang ziam cile amate ii lungtang tungah ki at tu hi. (31:31-34)
1
1 Hi thubu sia Benjamin ngam sungah a om Anathoth khua pan thiampite khat ahi, Hilkiah ii tapa Jeremiah ii thu sonte a kitepteena ahi hi.
2 Amon ii tapa Josiah sia Judah kumpi a sua zawk kum sawm le kum thum a cin kum in Topa in Jeremiah paupui hi, Ref 1:2 2 Kum 22:3—23:27; 2 Khang 34:8—35:19
3 Tuaciang Josiah ii tapa Jehoiakim kumpi a sua ciang Topa in Jeremiah paupui leleau hi. Tuasia zawkciang, Josiah ii tapa Zedekiah kumpi a sua zawk kum sawm le kum khat dong Topa in ama tamvei mama paupui hi. Tua kum a tha ngana ciang Jerusalem mite ngamdang ah sal tang uh hi. Ref 1:3 2 Kum 23:36—24:7; 2 Khang 36:5-8; 2 Kum 24:18—25:21; 2 Khang 36:11-21
Jeremiah A kisapna
4 Topa in kei tungah,
5 “Nuntakna kong piak ma in kong tealtuam zo a, na nu sung pan na sua ma in minamte tungah kamsaang khat tu in kong teal hi,” hong ci hi.
6 “Vaanglianpipa Topa awng, kei thusonzia tu he bong; moi lei lai ing,” ci in ka zo hi.
7 Ahihang Topa in kei tungah, “Kei ka moi leih hi ci heak in, kong paisakna mun, mite kungah pai in, son tu a kong thupiak theampo amate tungah son siat in.
8 Amate kiita heak in, banghang ziam cile keima in nangma hong dal tu in kong ompui tu hi, Topa, keima in kong son zo hi!” hong ci hi.
9 Tuaciang Topa in a khut hong thaakin, ka mukte hong tham a, tuaciang kei tungah, “Ngai in, na pau tu kammalte na kam sungah ka koi zo hi.
10 Minamte le kumpi ngamte a longhkeak tu le a kaikeak tu, a susia tu le a lawnthal tu, a sa tu le a suan tu in thu neina, tuni in nang kong pia hi” hong ci hi.
Mu kholna nii te
11 Topa in, “Jeremiah awng, bang na mu ziam?” ci in kei hong dongh hi. Keima in, “Almond thingbaak khat ka mu hi,” ci in ka zo hi.
12 Topa in, “Maan ni hi, tuaciang keima kammalte a taangtung tu sia en nginge khi hi,” hong ci hi.
13 Tua zawkciang Topa in, “A dang bang na mu ziam?” ci in kei hong dongh leleau hi.
Keima in, “Sak sangah tuibeal a so khat, hi sangah hong puk dektak khat ka mu hi,” ci in ka zo hi.
14 Topa in kei tungah, “Hi ngam sungah a teang mihingte theampo tungah saksang panin tuiso bangin siatna hong tung tu hi,
15 banghang ziam cile saksang ah a teang minamte theampo hong pai tu in ka sam hi. Amate ii kumpite in a kumpi tokhumte uh sia Jerusalem kongpite le, luphung kiimkot ah ahizong, Judah khuapi dangte ii kiimkot ah ahizong phut tu uh hi.
16 Keima in ka mite daan ka pia tu hi, banghang ziam cile amate in mawna khialna vawt zo uh hi; amate in kei hong nusia zo uh a, pathian dangte tungah biakpiakna pia in, milim vawtin bia uh hi.
17 Jeremiah awng, kithoai in; va pai ta'n a, amate na son tu a kong thupiak theampo va son ta'n. Tu in amate kiita heak in, na kiita ahile amate taw na omkhop ciang kong kiitasak vaial tu hi.
18-19 Jeremiah awng, ngai in! Hi ngam sungah om mihing theampo — Judah kumpite, uliante, thiampite le mipite — in nang hong langpan tu uh hi. Ahihang tuni in amate na nalh zawk natu in thahatna kong pia tu hi; nangma in kulh taw a ki uum khuapi khat bang, thik khuam khat bang le taau luphung khat bang na hi tu hi. Amate in nang hong zo ngawl tu uh hi, banghang ziam cile nang hong dal tu in kong ompui tu hi. Topa keima in ka son zo hi,” hong ci hi.