4
Leitung taw Lemzawngna
1 Note sungah kihauna le kidona teng sia koisung pan hong pai ziam? Na sungah a kido tawntung leitung nopna na deina uhte pan hong pai ahi hi.
2 Nate dei a, na nga thei ngawl uh ciangin, ngual thatlum tu in na kingingta uh hi; nate nasia takin na dei uh a, ahizong na nga zo bua uh hi, tuasia ciangin na kihau uh a, na kido uh hi. Na dei uhte na nga ngawl uh sia, banghang ziam cile Pathian munah na ngen bua uh hi.
3 Tuaciangin na nget uh ciang, na nga bua uh hi, banghang ziam cile na niimnate pha ngawl hi; noma nopsak natu sung bek ah na zak tu uh nate na ngen uh hi.
4 Thumaan ngawl mihingte awng! Leitung ii ngualtamh ih hi le Pathian ii ngal ih hi hunlam he ngawl nu ziam? A kuama po leitung ngualtamh a suak nuam sia Pathian ii ngal suak nuam ahi hi.
5 Laithiangtho sungah, “Pathian ii ih sungah hong koisak thaa sia a nasia mama lungngulnate taw kidim hi,” a ci sia thumaan ngawlin ngaisun heak vun.
6 Ahihang Pathian hong piak thuthiamna sia khohzaw kan lai hi. Laithiangtho in “Pathian in a kiphasakte nalh a, ahihang a kiniamkhiakte thuthiamna pia hi,” a ci bangma hi. Ref 4:6 Pau 3:34
7 Tua ahikom Pathian tungah ki aap vun. Doaimangpa nalh vun, tua hile note kung pan tai tu hi.
8 Pathian kungah hong neak tavun, tua hile Pathian in note hong neak tu hi. Na khut uh sil vun, no mawneite awng! Na thinsung uh thiansua vun, no a kihitheamsakte awng!
9 Heena, kaana, tauna taw om vun; na nuina uh sia kaana taw laih tavun a, na lungdamna uh sia, maikhinna taw laih tavun!
10 Topa mai ah noma le noma kiniamkhiak tavun, tua hile ama in hong laamto tu hi.
Tapidaw Suapuite khat tung Thukhen Kidop natu
11 Ka suapuite awng, khat le khat na kisonsia heak vun. Tapidaw suapui khat a sonsia ahibuale a tung a thu a khen sia in, Thukham sonsia a thukhen ahi hi. Thukham tungah thu na khen le, Thukham a zui nawn ngawl, Thukham tungah thukhenpa na hi uh hi.
12 Pathian bekma thukham pia Pa le thukhenpa ahi hi. Ama bek in, ngum thei a, susia thei hi. Na mipuite tungah thukhen tu in nang sia akua kisa ni ziam?
Kisuantaakna ah Kidop natu
13 “Tuni ahibuale zing ciangin, khua khat ah khual va haw tong i, tualai ah kum khat bang taamin, sum meet vawt in, sum tam mama thalaw tong,” a cite awng hong ngai tavun.Ref 4:13-14 Pau 27:1
14 Na nuntakna sia zing ciangin bangbang hi tu ci ngawngawn na he bua uh hi! Note in tawmvei hong kilangh zok a, a bo kik meikhu lomno khat taw na kibang uh hi.
15 Na pau tu uh sia hi bang hizaw tu hi: “Topa deina a om le ih nungta tu a, hisia ahibuale ziasia ih vawt tu hi.”
16 Ahihang no, tu in kiphasak a, kisuangtaak nu hi; tuabang kisuantaakna theampo sia maan ngawl hi.
17 Tua ahikom a pha tu he napi a pha a vawt ngawl sia in mihing mawnei ahi hi.