3
Leei Thu
1 Ka suapuite awng, note sya seam nuam tam na om heak vun. Na heak uh bangma in ngualdang sangin ko syate tungah nasia zaw in thu hong kikhen tu hi.
2 Ih vekpi in, sep khial ih nei bul hi. Ahihang mihing khat in, pau khialna a nei ngei buale ama sia a cialcing hi a, a pumpi bup zongh, a uk thei mi ahi hi.
3 Siphu in ih thu hong nit thei natu in, a kam sungah kamkhau ih koi a, ih uukna pawpo ah ih paisak thei hi.
4 Tua ahibuale teambaw khat ngaisun vun: tuaza in lian a, a thahat vui ii a seamna taw kihawl hikale, a heakna no mama khat taw kiheak zo hi, tuaciangin teambaw hawlpa ii paisak nopna pawpo ah pai hi.
5 Leei zongh tuabang ma ahi hi: tuasia in no ahihang, na liante huvau ah kisuangtaak thei hi.
Meikuang no khat taw, duipui khat a kihal theina thu ngaisun vun!
6 Tuaciang leei sia meikuang taw kibang hi. Ama sia khialna omna leitung hi a, ih pumpi sungah mun la in hong om a, ih pumpi bup tungtawnin thusia kizelsak hi. Hell pan a hong pai meikuang taw in nuntak sung tawntung hong hal hi.
7 Mihing in a nungta dang theampo — duisung nganhingte, vacimte, awmtaalin a vakte le, ngasate zualsak thei zo ahi hi.
8 Ahihang kuama in leei sia a zualsak zo ngei bua hi. Leei sia, sia a, uk thei hi ngawlin, thi theina nguu taw kidim hi.
9 Leei sia ih Topa le Pa tungah lungdamkona in ih zangh a, Pathian taw a kisunin a kivawt ih mipuite haamsiatna in ih zangh si hi.Ref 3:9 Pian 1:26
10 Lungdamkona le haamsiatna kammalte sia kamhawng khat sung panin pusuak khawm hi. Ka suapuite awng, tubang hi tu kilawm ngawl hi!
11 Tuilim le tuikhaa sia ciktui naak khat sung pan pusuak khawm ngawl hi.
12 Ka suapuite awng, theikung khat in olive ngate nga thei ngawl hi; sapitkung khat in thei ngate nga thei ngawl hi; sii tuinaak in tuilim piangsak thei ngawl hi.
Tung sang pan Ciimna
13 Note sungah a ciim thutel thei na om uh ziam? Amate in tuasia a nuntakna pha taw ahizong, kiniamkhiakna le ciimna taw a pha sepnate taw ahizong lak tahen.
14 Ahihang na thinsung ah eenna, thin natna le duhopnate a om le, na ciimna na kiphatsakpuina taw thumaan thutak sia langpanin mawna vawt heak in.
15 Tuabang ciimna sia vantung panin hong paisuk hi ngawl hi; tua in leitung neisa hi a, thaa vai hi ngawlin, doai vai ahi hi.
16 Ki eenna le duhopna omna munah buaina le siatna namcin zongh om hi.
17 Ahihang tungsang pan ciimna sia a masabel in thiangtho hi; tua in kilemna, cikna, lemzawngna zongh ahi hi. Tua in kihesuakna taw kidim a, a pha sepnate piangsak hi; tua in, kidoidanna nei ngawlin, kihithepsakna nei ngawl hi.
18 Phatna in kilemna piangsakte ii a tu thaicii panin a piang thaw an ahi hi.