1 Khatvei ma Israel mite in Topa tungah mawna vawt hi, tua ahikom Midian mite in amate kum sali uk hi. 2 Midian te sia Israel te sangin hat zaw ahikom Israel te suanghawng te le mualtung a dang ngammuanna munte ah buu uh hi. 3 Israel te in thaicii a poai uh ciang, Midian te, Amalek te le sennealngam minamte taw paikhawm in sim uh hi. 4 Amate sia ngam sungah ngiaphual saat in, Gaza kiim thangsang ngam dong ankungte susia hi. Amate in khuite, tuute, laate la in, Israel te nuntak natu bangma kheet ngawl uh hi. 5 Amate in a puanbukte le a ngannote taw hong pai uh ciang khaumaw za in tam uh hi. Amate le a kalaoh te tam leih a, sim zawk hi ngawl hi. Amate hong pai in, 6 ngamsung susia ngawp a, tuaciang Israel te in amate nalh zo ngawl uh hi.

7 Tuasia ciang Israel mite sia Midian te a nalh zawk natu in Topa tungah hu ngen in au uh hi, 8 tuaciang ama in kamsaang khat paisak a, Topa Israel te ii Pathian ii thupuak hisia kengsak hi: “Egypt ngam na saltanna uh panin kong pusua pui hi. 9 Egypt te le hi lai ngam sungah hong sim mite kung pan kong suatak hi. Maisang na manaw uh ciang amate sia ka notkeak hi, tuaciang amate ii ngam, no kong pia hi. 10 Keima in Topa na Pathian khi hi, tuaciang tu in amate ngam ah na teen uh laitakin Amor te ii pathiante na bia buatu uh hi, kong ci hi. Ahihang kei nong nadon bua uh hi.”

11 Tua zawkciang Topa ii vantunglalang sia Ophrah khua ah hong pai a, Abiezer phung sungah a pasal khat ahi Joash ii neisa oak thingkung nuai ah hong to hi. A tapa Gideon sia Midian te mu ngawl natu in sapittui suukna munah zungtaang tawm hong cil ku hi. 12  Topa ii vantunglalang sia tua mun ama mai ah hong kilaak a, “ Topa sia nang taw omkhawm hi, ngalhang, a thahat pa awng!” ci hi.

13 Gideon in ama munah,”Kong dongh thei tu ahile, topa awng, Topa in hong ompui ahile hite theampo banghangin piang ziam? Ka pate ii hong son Topa sep ngei nalamdang te — amate Egypt ngam pan a pusua puina thu theampo bang suak ziam? Topa in ko, hong taisan zo a, Midian te khut sungah hong nusia zo hi,” ci hi.

14 Tuaciang Topa in ama thupia a, “Na thahatna theampo taw kuan in a, Israel te Midian te khut sung pan suatakin. Keima tatak ma in nang kong paisak hi,” ci hi.

15 Gideon in, “ Topa awng, bangbangin Israel suatak thei tu khi ziam? Ka bee ka phung sia Manasseh nam sung pan a zawngkhalbel hi a, keima zongh ka bangkua sung pan a thupi ngawlbel ka hi hi,” ci in zo kik hi.

16  Topa in, “Suatak thei tu ni hi, banghang ziam cile keima in hong hu tu khi hi. Midian te sia mihing khat vawt tu bang bekin ol takin na sucip tu hi,” ci in zo hi.

17 Gideon in, “Kei dik nong sa le nang sia Topa na hi takpina tawm hong lak ta'n. 18 Nong hesuakna in an taw biakpiakna kong paipui dong hong nusia heak in,” ci hi.

Ama in, “Nong pai kik dong om tu khi hi,” ci hi.

19 Tua ahikom Gideon inn sungah tumin, kealmoi khat huan a, mangtaang vui kilogramme 10 taw tol saw ngawlin anluum vawt hi. Ama in a sa sia khum sungah koi in, a satui sia beal sungah a koi zawkciang Topa vantunglalang kung oak thingkung nuai ah paipui a, tua ante ama pia hi. 20 Vantunglalang in, “A sa le anluum teng hi suang sia tungah koi in a, a tungah satui buak in,” ci in sawl hi. Gideon in tuabangin vawt hi. 21 Tua zawkciang Topa vantunglalang in ama ii toai ciangkang ii dawn taw sa le anluumte kithuthasak hi, tuaciang suang sung panin meikuang pusuak a, sa le anluum kaanghtum hi. Tuasia ciang vantunglalang bo hi.

22 Tuasia ciang Gideon in Topa vantunglalang mu ahi hunlam phawk in, launa lianpi taw, “Vaanglianpipa Topa! Na vantunglalang taw maitang kisii in mu zo khi hi,” ci hi.

23 Ahihang Topa in, ama munah, “Na thinnuamsak in. Lau heak in. Thi ngawl tu ni hi,” ci hi. 24 Gideon in tua munah biaknatau khat sa in,” Topa sia thinnopna hi,” ci hi. (Tuasia tu dong ma in Ophrah ah ding lai a, Abiezer ii bee le phung neisa ahi hi.)

25 Tua zanin Topa in Gideon munah, “Na pa khuital le khuital dang khat la in a, na pa ii Baal biaknatau sia baltham in, tuaciang a kung a om Asherah numeipathian ii lim sia zongh phuktan in. 26  Topa na Pathian atu in biaknatau khat leivum tungah a pha takin sa in. Tuaciang khuital a niina sia la in, biakpiak na in a bup in hal in, Asherah thingngel na phuktan sia thing in thut in,” ci hi. 27 Tua ahikom Gideon in a naseamte sawm taw Topa sawl teng seam hi. Ama in a innkuanpuite le khua mite kiita lei ahikom sunin seam ngam ngawlin zanin seam hi.

28 Tua khua mite a zing ciang zingtuungin hong thaw uh ciang, Baal biaknatau le Asherah lim a kiphuktan teng le, tuaciang khuital a niina sia a saksa biaknatau tungah biakpiakna in a kihal mu uh hi. 29 Amate khat le khat kidongh a, “Akua in hisia vawt ziam?”ci hi. Amate in a kat uh ciangin Joash tapa Gideon vawt ahi sia he uh hi. 30 Tuasia ciang amate in Joash mun ah, “Na tapa hi sungah a kithalup thei natu in hong paisak ta'n! Ama in Baal biaknatau sia baltham a, a kungah a om Asherah lim sia phuktan hi,” ci uh hi.

31 Ahihang Joash in ama a nalhte theampo tungah, “Baal panpui in ding tek nu ziam? Ama hung nu ziam? Ama a panpui khat pawpo sia zingsang khuavak ma in thalup thuak tu hi. Baal sia pathian ahile ama le ama kihung tahen. A kibaltham biaknatau sia ama aa hi,” ci hi. 32 Tua hun pan kipan Gideon sia Jerubbaal kina hi, banghang ziam cile Joash in, “Baal sia ama le ama kihung tahen; biaknatau a kibaltham sia ama aa hi,” a ci hu hi.

33 Tuasia ciang Midian mite theampo, Amalek te, le sennealngam sung teang minamte hong kikhawmtua a, Jordan ngun kaantan in, Jezreel Kuam ah ngiaphual saat uh hi. 34  Topa ii thaa in Gideon uk a, tuaciang ama in Abiezer bee le phungte sung pan pasalte ama zui tu a samna lemle tum hi. 35 Ama in kamtaite Manasseh ngam khente ngeal ah paisak a, ama a zui tu in samsak hi. Ama in kamtaite sia Asher, Zebulun, le Naphtali namte kungah paisak a, amate zongh Gideon taw kipawl tu in hong pai uh hi.

36 Tua zawkciang Gideon in Pathian munah, “Israel te a suatak tu in kei nong zak tu in khensat zo khi hi, ci ni hi. 37 Pha hi, tuumul pawlkhat ka zungtaang cilna ah koi tu khi hi. Zingsang ciangin daaitui kia sia tuumul tung bek ah om in, lei ah a om buale, Israel suatak tu in hong zangh takpi tu na hina ka tel tu hi,” ci hi. 38 Tuabang tatak ma in hong piang hi. A zing ciang khuavak tuungin Gideon hong thaw ciang, ama in tuumul hong meak a, kuang khat dim tu za daaitui om hi. 39 Tuaciang Gideon in Pathian munah, “Kei tungah na thin uuksak heak in; khatvei lian bekma pau lai tong. Nong hesuak na in tuumul taw khatvei hong sinsak lai ta'n. Tusia hun ciang tuumul kosak in a, a lei kawtsak in,”ci hi. 40 Tua zanin Pathian in tuabang tatak ma in vawt hi. A zingsang ciang tuumul sia ko a, lei ahile daaitui kawt hi.