5
Deborah le Barak ii La
1 Tua ni in Deborah le Abinoam ii tapa Barak in la hisia sa uh hi:
2 Topa pok vun!
Israel te sia ngal do tu in a thin khensat zo uh hi;
mipite sia lungdam takin hong kipia uh hi.
3 Ngai vun, no kumpipate awng!
No ngamukte awng, hong nadon tavun!
La ka sa tu a, tum thei te ka tum tu hi
Israel ii Pathian, Topa tungah.
4 Topa awng, Seir mualpite na nusiat ciang,
Edom ngam panin nong pusua ciang,
lei liingin van pan nguatui hong taak suk hi.
Hi hi, meei sung panin tui hong bua hi.
5 Sinai ii Topa mai,
Topa Israel ii Pathian mai ah mualpite liing hi. Ref 5:5 Pu 19:18
6 Anath ii tapa Shamgar khan sung,
Jael ii khan sung,
kalaoh hon vanh puate sia
ngam kaanin pai nawn ngawl hi,
tuaciang khualhaw te in
lamzinte tawn uh hi.
7 Israel khuate kinusia hi,
Deborah awng;
nang nong pai mateng
amate sia a hawmpi in ding hi,
Israel atu in nu bangin nong pai hi.
8 Tuaciang ngam sungah ngal hong om hi
Israel te in pathian thakte hong teal uh ciang ahi hi.
Israel ngam a om pasal tul sawmli sungah,
lum ahibuale tei toai akua om ziam?
9 Ka thin sia Israel a ukte taw omkhawm hi,
lungdam takin a kipia mite taw om hi.
Topa pok vun!
10 Laa kaang tungah a to note awng,
a kunghte tungah a tote awng,
na pai natu mun theampo ah
peang taw a paite awng,
hi thu son tek vun.
11 Ngai vun! Tuikhuk kiim ah
a ngamlum mihonte in
Topa ii ngalzawnate
Israel mite ii ngalzawnate a son uh hi!
Tuaciang Topa ii mite in
a khuapite uh pan, hong kuan suk hi.
12 Lampui in, Deborah awng, lampui in!
Lampui in! La khat sa in! Lampui in!
Abinoam ii tapa Barak awng,
mai sangah na ngalmatte paipui in!
13 Tuasia ciang a thumaan te sia
a lampuite kungah hong pai a;
Topa ii mite ama kungah
ngal sim tu kithoai sa in hong pai uh hi.
14 Amate sia Ephraim panin a kuam sungah,
Benjamin nam le a mite ii nungsang pan hong pai hi.
A ukte Machir pan hong pai suk hi,
a uliante Zebulun pan hong kuan suk hi.
15 Issachar ii lampuite
Deborah taw hong pai uh hi;
hi hi, Issachar hong pai a,
Barak zongh hong pai hi,
tuaciang amate in
a kuam sungah ama a zui uh hi.
Ahihang Reuben nam sia kikhen a;
amate in hong pai tu uh sia a khensat thei bua uh hi.
16 Banghangin amate nungsang ah
tuute taw taang khawm ziam?
Tuucingte ii tuuhonte a sam ngai tu in maw?
Hi hi, Reuben nam kikhen hi;
amate in hong pai tu uh sia a khensat thei bua uh hi.
17 Gad nam sia Jordan ii nisuana sangah om hi,
tuaciang Dan nam sia teambawte kungah om suak uh hi.
Asher nam sia tuipi hui ah om hi;
amate tuipi vaalbo teng ah om suak uh hi.
18 Ahihang Zebulun le Naphtali mite in,
ngal kisimna phual ah a nuntakna aitaa uh hi.
19 Megiddo luihui Taanach khua ah,
kumpite hong pai in kido hi;
Canaan kumpite in ngalsim uh a;
ahihang amate in ngunn bangma ciapui ngawl hi.
20 Aksite in, van pan ngaldo uh hi;
van kaantan in a pai uh ciang,
tuate in Sisera sim hi.
21 Kishon ah namthuam a —
Kishon ngun pawm sia in amate taaikeak hi.
Mai ka nawt tu, ka nawt tu,
thahatna taw ka paitan tu hi!
22 Tua zawkciang siphute hong kinuntaw uh a,
a peangcinte taw lei tuan uh hi.
23 Topa ii vantunglalang in,
“Meroz tomlaw in” ci hi,
“Tomlaw vun, tua munah a teangte tomlaw vun.
Amate sia Topa hu tu in hong pai bua a,
ama atu ngalkapte bangin ngal sim tu hong pai ngawl hi,” ci hi.
24 Numei a hamphabel sia Jael hi,
Ken mi Heber ii zi —
puanbuk sung a teang numei teng po pan, a kaamphabel hi.
25 Sisera in tui ngen a, ahihang
ama in khuinoai pia hi;
ama in kuang hoi khat taw noaidiat puak hi.
26 Ama in a khut lang taw
puanbuk khetphin toai in,
a langkhat taw naseampa ii sekpui toai hi;
Ama in Sisera lutang seakin a lu sutham hi;
ama in a lutang vutlet hi.
27 A khupte top suk in, puksuk a,
ama peang kungah tung ngawlin lum hi.
Ama ii peang ah a khupte top sukin puk hi;
lei ah pukin thi hi.
28 Sisera ii nu in khelki pan khua en a;
puankhak sia nung panin salh hi.
“Banghangin a siphu ngalleang
hong cia kik tu haisaang mama ziam?”
Banghangin a siphute a heak kik tu
vai hai leih thong ziam?” ci in ama in dongh hi.
29 Ama ii numei ciimbel te in zo a,
ama le ama zongh a kison kikik na ah,
30 “Amate in a mat tu le a hawm tu
nate bek a mu dong zong hi,
ngalkap khat sim atu ngaknu khat ahibuale nii,
Sisera atu puan manham
kumpinu ngawng aw tu a kingelh puan hi tu hi,” ci hi.
31 Topa awng, na ngalte theampo
tuabang veu in thi tahen,
ahihang na lawmte sia
nisuak bangin taang tahen!
Tuaciang ngam sungah kum 40 kilemna om hi.