9
Job
1-2 Hi hi, tuate theampo sia ka zaak ngeisa vive hi.
Ahizong, mihing khat in Pathian langpanna thu ah, bangbangin thu zo thei tu ziam? Ref 9:2 Job 4:17
3 Bangbangin mihing khat po in Pathian nial zo tu ziam?
Ama in kuama ii zo thei ngeingawl tu
thu dokna tul khat, dongh thei tu hi.
4 Pathian sia ciim peuma a, vaanglian hi;
kuama in ama langpan zo ngawl hi.
5 Ama in kidop natu thu son khol ngawlin mualpite khiin a,
tuaciang a thin uukna taw tuate susia hi.
6 Pathian in zinliingsak a, lei ngawksak hi,
ama in leitung a nang khuamte thiing hi.
7 Ama in ni a sua ngawl natu in khak thei a,
tuaciang zanin aksite taangsak ngawl thei hi.
8 Pathian ii vantungte a phalh ciang ahizong
tuipi nganhing pui sia ii thibin a totcip ciang ahizong kuama in hu ngawl hi.
9 Pathian in aksite — Solh, Siluk, Zawlzawng te le
thangsang aksite van ah khai hi. Ref 9:9 Job 38:31; Amo 5:8
10 Na lianpi ama ii septe ih tel zo bua hi,
tuaciang ama ii lamdang laknate bo hun nei ngawl hi.
11 Pathian in hong kaantan hi, ahizong ama ka mu thei bua hi.
12 Ama in a dei po la a, kuama in tho thei ngawl hi;
kuama in, “Nang bang vawt ni ziam?” ci in dongh ngam ngawl uh hi.
13 Pathian ii thin uukna sia thai ngeingawl hi.
Ama in ama langpan tuipi nganhing pui Rahab tha a pia a ngalte ngoaicip hi.
14 Tua ahikom Pathian kam
ka zo natu kammalte koi bangin mu thei tu khi ziam?
15 Mawbaang ngawl ka hihang ka vawt theibel sia
Pathian ka thukhenpa munah hesuak nget tu ahi hi.
16 Tuasia ciang ngawngawn in, ka pau tu hong oai hial le zong,
ama in hong ngai tu in ka um thei bua hi.
17 Ama in ahang thu om ngawl bulin kei hong nawk tu le
hong liamsak tu vuipi suangvalte hong paisak hi.
18 Ama in ka hu zongh hong diiksak man bua hi,
ka nuntakna a sia a kha taw hong dimh hi.
19 Thazaw ka suang tu ziam? Pathian tungah thazaw kisuang thei ziam?
Thukhenzum ah ama then tu khi ziam?
Akua in ama paisak thei tu ziam?
20 Mawbaang ngawlin thumaan ka hi hang ka kammalte sia a mawte awsua bang ka hi hi,
tuaciang ka pau theampo in kei hong puanil taw kibang hi.
21-22 Mawbaang ngawl khi hi, ahizong awlmaw zo nawn bong.
Nuntak tu ngaisun zo ngawl khi hi, thupi ka sak om nawn ngawl hi;
maw ka leang, maw bua ka leang Pathian in eite hong lalsak tu hi.
23 A maw ngawl mi khat thakhat thu in a thi ciang Pathian nui hi.
24 Pathian in leitung sia mi ngilote pia hi.
Ama in thukhenmangte theampo mittawsak siat hi.
Tuabang sia Pathian ii vawt ahibuale akua vawt ziam?
25 Ka ni hunte pai vahan a, khat zongh a pha om ngawl hi.
26 Ngunkuang manlangbel sia bangin ka nuntakna bo vazangh a,
muvanlai ii bilpi khat man tu in a suktun bangin manlang hi.
27-28 Zumnui maitai in ka natnate makngil sawm leng
ngim ka thuakna theampo in hong lauthawn tu in hong vil kik hi.
Pathian in kei sia a maw ma in hong koi hunlam ka he hi.
29 Maw hong kiputsak zawk nungsang banghang awlmawk tu khi ziam?
30 Ka mawnate hong silthiang zo tu satpia om ngawl hi.
31 Pathian in a kiihuai dum sungah kei hong lawn suk a,
ka puansilhte ngawngawn in kei hong maizum pui hi.
32 Pathian sia mihing hile a kam zo thei khi hi;
ka kihauna uh thukhen tu in zum ah pai thei tu khu hi.
33 Ahihang ko kilaklaw ah palai hong seam tu kuama om ngawl —
Pathian le kei thu hong khen khawm tu kuama om ngawl hi.
34 Pathian awng, kei daan nong piak tawp in!
A kiitakhuai na vawt te heam in!
35 Kei lau ngawl khi hi, pau tu khi hi,
banghang ziam cile ka thinsung keima in he khi hi.