10
1 Ka nuntak cimtak khi hi,
lungkim ngawl a, ka phun ka mauna hong ngai ta'n.
2 Hong puavawk heak in Pathian awng.
Kei nong mawsakna a bang hi thong ziam? Hong son ta'n!
3 Tua zata bang na ngitlo sia maan tu ziam?
Nangma vawtsate ma zawnsak vawt tu ni ziam?
Tuaciang mi ngilote sawmna tungtaang ah maipha pia tu ni ziam?
4 Kote muna bangin tuate na mu ziam?
5 Ko ma bangin na khantom ziam?
6 Tua ahile banghang ka mawna theampo hong sul zui in,
ka sep khial theampo banghang hong vaizui ni ziam?
7 Maw ngawl ka hi hunlam le,
na khut sung pan kei hong hun thei kuama om ngawl ci sia na he hi.
8 Na khutte in kei hong piangsak a hong zeam hi,
tuaciang tu in tua khutte ma in kei hong lalsak hi.
9 Tungman panin nong vawt sia phawk kik in a,
leivui suak tu in hong ngoaivui kik tu ni ziam?
10 Nangma in kei pian natu in ka pa thahatna na pia a;
ka nu sulh sungah nong khangsak hi.
11 Ka pumpi sia ngute le sazangte taw na vawt hi,
tuaciang tua ngute sia sangol le vun te taw na tuam hi.
12 Nuntakna le a kikhomsuan itna nong pia zo a,
tuaciang nong khoi nong kepna taw kei nong nungtasak zo hi.
13 Ahihang tua hun sung theampo ah nong natsak natu
na ngeal ku sia tu in ka he hi.
14 Ka mawna nong maisak nop ngawl hu in
mawna a vawt ziam ci in nong encik hi.
15 Ka maw poma ciang ngim nong thuaksak a,
ahihang a maanin ka ngamtat ciang maipha ka nga bua hi.
A cimaw a maizum in ka om hi.
16 Zawna khat pawpo nei lei leng zong,
tawpi khat taw kibangin nong vai hi;
hong liamsua tu in nalamdang laknate ngawngawn na vawt hi.
17 Kei hong langpanin a ding tu tetti na nei tawntung hi;
Kei tungah na thin uukna khang vaial hi;
kei nong sim natu ngealna thak na nei tawntung hi.
18 Pathian awng, banghang hong piangsak ni ziam?
Kuama ii hong mu ma in ka thi tu hi zo kana ve.
19 Sulh sung pan thaankhuk ah paitan paih hi leng
a om ngeingawl sia bang hi tu kana ve.
20 Ka khan bo dektak zo hi ngawl ziam? Kei nguak hong omsak kapo in!
Ka hun nei lai sun teng a nuamin hong zanghsak ta'n.
21 Hai ngawlin ka pai tu a, kong heak kik nawn buatu hi —
ka zot natu ngam sia thinkiamhuai in, khuamial in khuazing cip a,
22 khuazinna, limhte taw a kiliana le lungman buaina ngam hi a,
khuavak sia khuazing a hina mun ahi hi.