4
A Khatvei Kipaupuina
Eliphaz
1-2 Job awng, kei pau leng
na thin a nawngkai tu ziam?
Huthe ngawlin om thei
nawn ngawl khi hi.
3 Mi tam na hil zo a,
tha zawngkhalte tha na pia zo hi.
4 Khat po lutu in, toi in,
tha zawmin a om ciang,
na kammalte in hanthawn a,
ama dingtangsak hi.
5 Tu in na ngim nga tu hun
hong tung a,
a thuak zo ngawl tu dongin
na thinngim leih hi.
6 Nangma in Pathian na bia a,
na nuntakzia sitbaang ngawl hi;
tua ahikom kimuanna le lametna na nei tu ahi hi.
7 Tu in ngaisun kik in.
Thutang mi khat ii
tuasiatna a thuak ngei khat son in.
8 Mite in tatsiatna lo bangin tho a,
ngitlona ancii poai bangin a poai ka mu hi;
tu in amate in siatna le
ngitlona teng anlaak bangin la uh hi.
9 Vuipi suangval bangin
Pathian thin uukna in amate susia hi.
10 Mi ngilote sia tawpite bangin
hawkin ngalh hi,
ahihang Pathian in amate
thimsak a, a hate suktansak hi.
11 Mat tu neak tu a nei ngawl
tawpite bangin,
amate thi a, a tate theampo
12 Khatvei thu khat,
aw thim taw hong theng a,
dam pau mama ahikom
ka za thei bua liang hi.
13 Zan mangsia bangin tua in
ka mut hong phawng hi. Ref 4:13 Job 33:15
14 Liingin ka ngawk hi;
ka pumpi bup lau in, kithing hi.
15 Vuiva vahiau khat in
ka maitang hong seam a,
lau in ka khuasik mul suak hi.
16 Tua munah a ding khat
ka mu thei hi;
sal kaleng zong
a bang tatak ziam ka son thei bua hi.
Tuasia ciang a thim dide
sung pan aw khat ka za hi:
17 “Pathian ii muna ah
mi khat pawpo a thutang om thei tu ziam,
tua ahibuale ama a bitphua pa
mai ah a thiangtho om thei tu ziam?
18 Pathian in a vantung naseamte
muang ngawl hi;
ama in a vantunglalangte ii
khialna ngawngawn mu hi.
19 Tungman taw kivawt
a nungta khat, leivui sung pan a piang na khat
pingpaleap bangin ol takin
a kimetcip thei khat sia ama in muang tu in na um ziam?
20 Mihing khat sia zingsang in
nungta tha tu a,
ahihang nitak hun a thet ma in
kuama heak ngawlin thi hi.
21 Ama ii nei theampo kilaaksak a;
ciimna nei ngawl lai in thi hi.”