13
1-2 Na son theampo ka zaak ngeisa vive hi.
Tuate ka tel siat a; na heak za uh ma ka he hi.
Kei, no sangin nangh zaw tuan ngawl khi hi.
3 Ahizong ka thu kinialpui sia Pathian hi a, no hi ngawl nu hi;
ka thu sia ama taw kinial nuam khi hi.
4 Na heak ngawl uh teng leilot thu taw seal nu hi;
no sia kuama a damsak zo ngawl syavuante taw kibang nu hi.
5 Bangma son ngawlin om vun, tuasia ciang khat po in a ciim hong sa tha tu hi!
6 Ka thu kong pualaak ciang
ngai vun.
7 Banghangin leilot nu ziam?
Na leilotnate in Pathian phatuamsak tu in ngaisun nu ziam?
8 Ama sungsia tu hanciam nu ziam?
Ama ii thu sia zum ah kinial nuam nu ziam?
9 Pathian in no hong en cian le a pha khat pawpo a mu tu ziam?
Ngual na theam uh bangin Pathian theam thei tu in ki um nu ziam?
10 Doidan nopna na seal uh hang
ama in no hong teih tu a,
11 tuaciang ama thahatna in no hong lausak tu hi.
12 Na paunakte vut taw kibangin kimanna om ngawl hi;
na ngatang seenate tungman bangin topcip hi.
13 Thim khipkhep vun a, thuson tu hun khat kei hong pia tavun,
a sua nop po suak hi tahen.
14 Keima in ka nuntakna pia tu in ka kinging hi.
15 Ka lametna theampo bosua zo ci leang Pathian in hong that hial zong bang phamaw ziam?
Ama tungah ka thu sung tu khi hi.
16 Ka hangsanna zongh in hong hun thei lai hi,
banghang ziam cile mi ngilo khat peuma in Pathian mai si ngam ngawl hi.
17 Tu in ka son telna kammalte ngai vun.
18 Ka thu sung tu in kinging zo khi hi,
banghang ziam cile keima ka maan hunlam kihe khi hi.
19 Pathian awng, kei maw hong suan tu in hong pai ni ziam?
Tuabang hong pai na hile thim om in a thi tu kinging khi hi.
20 Thu nam nii hong ngensak ta'n;
tuate thukim lete nang kung pan buk tu hanciam ngawl tu khi hi;
21 Kei daan nong piak tawp in a,
launa taw kei hong sucip heak in.
22 Pathian awng, pau masa in, hong zo tu khi hi.
Tua ahibuale kei hong pausak ta'n a, hong zo ta'n.
23 Ka mawnate bang teng ziam? Khialna ka vawt bang om ziam?
Bang khialna liante taw kei hong kimawsak ziam?
24 Banghangin kei hong pial ni ziam? Banghangin hong ngal vawt ni ziam?
25 Kei hong lauthawn nuam ni ziam? Kei sia thingtee khat hi lel khi hi;
taangphaw ko sa khat a ngal vawvawt na hi hi.
26 Kei tungah nasia takin maw nong suanh hi,
ka khanmoi lai ka ngamtatna ngawngawn taw nong mawsak hi.
27 Ka peangte thikkol nong bulh hi,
ka kalsuan sim nong encik a,
ka khuanite ngawngawn na en cian hi. Ref 13:27 Job 33:11
28 Tua hu in thing muatsa bangin ka topcip a,
nget ii neaksa puanpuasilh bangin ka om hi.