27
1 Tua ni in tuipi sungah a om nganhing pui sia a that tu le kizialin a kual, a kiitakhuai Leviathan ngul sia daan pia tu in Topa in a vaang nei, thisakna namsau zangh tu hi. Ref 27:1 Job 41:1; Ps 74:14; 104:26
2 Tua ni in a dei huai sapithuan thu Topa in son tu a,
3 “Keima in tua huan cingin tui ka buak tawntung hi. Kuama ii suk siat thei ngawl tu in sun le zanin ka cing hi.
4 Sapit huan tungah ka thin uuk nawn ngawl hi. Mot tu ling le lingkungte a om le ka haltum tu hi.
5 Ahihang ka mite ii ngalte in, kei ii huuk tu a dei le, keima taw kilemna hong vawt tahen. Hi hi, amate in kei taw kilemna vawt tahen,” ci tu hi.
6 Mailam sangah, Jacob ii suan le paal ahi Israel mite, thingkung khat bangin zung tha tu a, hong mom in a paak palh tu hi. Leitung sia amate ii nga taw kidim tu hi.
7 Topa in Israel te ii ngalte nasia takin daan a piak za in Israel te daan pia ngawl a, a thi a bo zongh tam ngawl hi.
8 Topa in a mihingte ngamdang ah saltaang tu in a puakna taw daan pia hi. Topa in amate sia nisuana sang pan hong va vui ngilo in seamkeaksak hi.
9 Ahizong, Israel te ii mawnate sia, lawkite ii biaknatau suangte, leikaang bangin a kingoaicip zawkciang le Asherah numeipathian lim te a bo zawkciang, le ngimnamtui halna biaknataute a om nawn ngawl ciang bekin, kimaisak bek tu hi.
10 A muanhuai khuapi sia lalcip in om hi. Ngamkol khat bangin kinusia hi. Ngan thana le ngan lup thei na mun suak hi.
11 Thingbaakte kongaw in taltan a, numeite in thingkang tu in tom uh hi. Banghang ziam cile mihingte in bangma tel ngawl ahikom amate a Bitphuapa Pathian in amate khuangai huai sa ngawl tu a, hesuakna lak ngawl tu hi.
12 Tua ni in, Euphrates ngun pan kipan Egypt ngamngi dong, taangcilte khat po in a zungtaang a tak le a si a khen bangin, Topa in a mihingte khat zawkciang khat kaikhawm tu hi.
13 Tua ni a thet ciang, Assyria le Egypt ngam ah saltaang in a om Israel te theampo tua mun pan sap kikna tu lemle khat kitum tu hi. Amate hong cia a, Jerusalem khua ama ii mual thiangtho tungah Topa bia tu uh hi.