26
Pathian in A Mihingte Ngalzawna Pia tu
1 Judah ngam sungah mihingte in
hi la a sak tu ni khat
hong theng tu hi;
Ih khuapi muanhuai hi!
Pathian mama in tua luphungte hung hi!
2 Khuapi kongpite hongin
a thumaan minam, a maan a seam a mihingte tumsak vun.
3 Topa awng, nang hong muangin,
tupna kho a nei mihingte a kicing thinnopna na pia hi.
4 A tawntung Topa muang in;
ama in a tawntungin eite hong dal tu hi.
5 Ama in mihing kiphasakte kiniamkhiaksak hi;
amate teenna a muanhuai khuapi lalsakin,
a kulhte cimhthamsakin leivui suaksak hi.
6 Zawthawk vawt a thuak mihingte in
tu in tua khua zothal a,
a peang nuai ah tuanhcil uh hi.
7 Topa awng, mihing phate atu in a lampi
ngilsakin; a khualhawna lampi na tamkimsak hi.
8 Na deina bang kong zui uh a, nang sungah lametna kong nei uh hi;
Kote deina theampo sia nangma na hi hi.
9 Zan in ka thin theampo taw nang kong thangai uh hi;
leitung le a mihingte tungah thu na khen ciang
amate theampo in thukhaikim thu sia he tu uh hi.
10 Mihing seksolte tungah nang dik napi in,
amate in a maan a vawt tu he ngeingawl uh hi.
Mihing thutangte teenna
hi ngam ngawngawn zongh ah
amate in khialna
vawt veve lai hi;
amate in na letna thusim ngawlin nial uh hi.
11 Na ngalte in amate daan na piak tu hunlam he ngawl uh hi.
Topa awng, amate maizumsak in a, ngim ngasak in;
amate atu in, na koisak sa daan piaknate thuaksak in.
Na mite na it mama zia amate lak in. Ref 26:11 Heb 10:27
12 Topa awng, kote mavan daupaina nong pia tu hi;
kote ii matutna theampo sia
nangma ii sepna hang ahi hi.
13 Kote Topa Pathian awng,
kote sia ngual dangte in hong uk zo a,
ahihang nangma bekma in kote Topa na hi hi.
14 Tu in amate thi zo a, nungta kik ngawl tu uh hi;
amate ii thaa te thoto ngawl tu uh hi,
banghang ziam cile nangma in amate daan na pia zo a,
na lalsak zo hi.
Kuama in amate phawk nawn ngawl hi.
15 Topa awng, nangma in
koma ii minamte nong khangtosak a,
a ngamngi theampo
na keak hi,
hi thu in nang
hong thupisak hi.
16 Topa awng, na mihingte daan na pia hi,
a thinna sa in nang tungah thu hong ngen uh hi.
17 Numei nausuak tu a tut ciang na sa in a au bangin
Topa awng, kote nong ausak zo hi.
18 Kote in na sa bot sa in om ka hi uh hang
bangma a piang bua hi.
Kote ngam atu in ngalzawna bangma ka nei bua uh hi;
bangma taangtut ka nei bua uh hi.
19 Ka mipui a thisate nungta kik tu uh hi!
A pumpi uh nungta kik tu uh hi.
Thaan sungah a mute theampo thoto tu a,
lungdamin lasa tu uh hi.
A tee vasip daaitui in leitung thathak a piak bangin
Topa in taanghlai pek a, a thisate nungtasak tu hi.
Thu Khenna le Kipua kikna
20 Ka mihingte awng, na inn sung uh ah tum vun a, na inn uh khak vun. Pathian ii thin uukna a thai dong tawmvei sung buu zii vun.
21 Topa in vantung a teenna mun panin leitung mihingte mawna hangin daan pia tu in hong pai tu hi. Leitung ah a kithatlum ku mihingte kipualaak tu a, leitang in tua a kithatlumte seal nawn ngawl tu hi.