8
Milim A Biak hu in Topa in Israel Puavawk
1 Topa in, “Patau daak tum vun! Ngalte muvanlai bangin ka ngam sungah hong suktun hi! Ka mite in amate taw ka vawt thuciamna paltan a, ka hilna langpan hi.
2 Amate in kei hong he a, na mite hi ung ci a, a Pathian hi ci in hong sap hang,
3 amate in a phate nial hi. Hi thu hu in a ngalte in amate delkot tu hi.
4 “Ka mite in kumpite teal hi, ahihang amate uuk bang bek in teal uh hi. Amate in lampuite teal ahihang kei thukim puina om ngawl hi. Amate in a ngunn le a khamh la in milim in vawt a — amate lal natu ahi hi.
5 Samaria khuapi a teang mite ii a biak khamh khuital sia ka ensan hi. Amate tungah ka thinso hi. A milim biakna a kheal natu in bang tanvei ngei lai tu ziam?
6 Israel mi khut thiam khat in milim vawt a, tua in pathian khat hi vet ngawl hi! Samaria ah a kibia khamh khuital sia a bebekin kisutham tu hi!
7 Amate in vuipi thaicii a poai ciang, vuipi suangval at tu hi! A min ngawl lo ante in bangma hun anluum piangsak thei ngeingawl hi. A piangsak hial zong, ngamdangmite in netum tu hi.
8 Israel ngam sia ngamdang khat pawpo taw kibang zo a, leibeal tamhtham sa khat bangin kimanna nei ngawl hi.
9 Ngam laate bangin a thinpui Israel mite in amate sansak tek zuan uh hi. Amate in Assyria tungah hu ngen tu in pai a, amate sungsia tu in a dang ngamte sum taw tham hi.
10 Ahihang tu in amate ka khawmtua tu a, daan ka pia tu hi. Assyria kumpilianpa in amate a nencip ciang, hai ngawlin bot sa in kilep vadel tu uh hi.
11 “Israel mite in mawphel natu biaknatau tam vaial a vawt ciang mawna khialna a vawt natu mun tam a nei vaial suak hi!
12 Mipite atu in a kisim zo ngawl thuhilnate ka at hi, ahihang amate in tuate sia thu lamdangpi le ngamdangte aa hi ci in nial uh hi.
13 Amate in sangaw biakpiaknate kei tungah vawt in tua sangaw biakpiakna sa te ne uh hi. Ahihang keima, Topa in amate tungah ka lungkim ngawl hi, tu in amate mawna ka phawk kik tu a, tua hu in daan ka pia tu hi; Egypt ngam ah amate ka puak kik tu hi!
14 “Israel mite in kumpi innte sa zo ahihang amate in amate a Vawtpa mama mangil uh hi. Judah mite in kulh taw a ki uum khuapite saat uh hi. Ahihang a kumpi innte le a khuapite a kaanghthamsak tu meikuang ka puak tu hi,” ci hi.