7
1 “Israel ka mite a ciidam in a nopsak, a khanto kik tu ka vawtsak nop simin, amate seksolna le a ngamtatsiatna te bebek ka mu thei bek hi. Amate khat le khat kitheam a; inn phuulin vanh ngu hi, tuaciang lampi ah ngual neisa suttol uh hi.
2 Hi a ngamtat siatna theampo ciamtee tu ka hi hunlam amate in ngaisun ngeingawl uh hi; ahihang a mawnate in amate kiim uum a, tuate mu ngawlin ka om thei bua hi,” ci hi.
Kumpi Inn sungah Thusia vawt sawmna
3 Topa in, “Mihingte in thusia vawt a sawmnate taw kumpipa le a uliante theam uh hi.
4 Amate a vekpi thutuum ngawlin citakna nei ngawl uh hi. Anluum em pa in anvui thau in, a em thei hun mateng anluum emna mei sawk ngawlin a mei a khep bangin a ki etsatna iip phot hi.
5 Kumpipa ii poai vawt ni in amate in kumpipa le a uliante sapittui khamsakin mawmawsak hi.
6 Hi hi, amate ii a sawmna uh taw amate moh emna meisa bang hi. Amate thin uukna sia zankhuateakin dai a, zingsang in meileng bangin puaktham hi.
7 Amate in a thin uuk saan laitakin a ukte thatlum uh hi. A kumpipate khat zawkciang khat kisuamlum ahihang kei tungah huu na dei in thu hong ngen om ngawl hi,” ci hi.
Israel le Minamte
8 Topa in, “Israel mite anluum minphang khat taw kibang hi. Amate in a kiimkot ngamte suang a,
9 hi ngamdangte a suanna in amate thahatna kisut ahi hunlam phawk ngawl uh hi. Amate ii ni hunte kiciangtan hi, ahihang amate in tua ngawngawn zongh he ngawl uh hi.
10 Israel mite kiphatsak na in amate langpanin ausan uh hi. Hi bang a piang tu theampo piang zo kazu in amate sia keima, Topa a Pathian kungah hong zuan kik ngawl uh hi.
11 Inn vakhu mawmaw khat bangin Israel te leang kawkoai hi; amate in Egypt te tungah huna ngen masa uh hi, tua zawkciang Assyria ah tai uh hi!
12 Ahihang keima in amate paina po ah ngeen khakin vacimte mat bangin ka man tu hi. A ngamtat siatnate hu in amate daan ka pia tu hi.
13 “Amate a lal hi zo hi! Amate in kei hong taisan a, hong langpan hi. Amate kisusia tu hi. Amate suatak nuam ka hihang amate ii kei hong biakna maan ngawl hi.
14 Amate in thin tak taw thu ngen ngawl uh hi, tua sangin amate lei ah kisepin lawkite ngamtat bangin kapin mau uh hi. Sapittui le antang atu thu a nget ciang doaibiate bangin amate le amate kikuikeak uh hi. Bangza in hong langpan ziam!
15 Keima in amate khangtosakin, a thahatsak pa hi napi, amate in kei langpan hong sawm uh hi.
16 Amate kei kung pan kiheak tawntungin vang nei ngawl pathian khat tuu uh hi. Amate sia thalkawng telh khat bangin muanhuai ngawl hi. A lampuite in kisak theina kampau ahikom amate thi ngamin thi tu a, tuaciang Egypt te nui tu uh hi,” ci hi.