3
Jesus sia Moses sangin Lianzaw
1 Pathian hong sapsa zongh ahi, ka Tapidaw suapuite awng! Ih pualaak upna ii Thiampi Lianbel tu in, Pathian ii a sawlpa Jesus ngaisun vun.
2 Pathian ii inn sungah Moses sia a nasepna ah a thumaan bangma in, ama in hi nasep seam tu in a teal Pathian tungah thumaan hi.Ref 3:2 Mi 12:7
3 Inn khat a sa pa in tua inn sangin upatna nga zaw hi. Tuasia bangma in, Jesus sia Moses sangin vaang piakna lianzaw taw kiphu hi.
4 Inn theampo a sa khat tek om a, ahizong na theampo a vawt pa sia Pathian ahi hi.
5 Moses sia Pathian inn sungah naseampa bangin, thumaan hi. Tuaciangin ama in maisang a Pathian ii son tu thute son hi.
6 Ahihang Christ sia Pathian inn uk Tapa bangin thumaan hi. Eite in, ih lametnate sungah thinletna le kimuanna ih kholet le ama inn ih hi hi.
Pathian ii Mihingte atu Tawlngakna Khat
7 Tua ahikom Thaa Thiangtho ii cina taw kizui in,
“Tuni in Pathian aw na za uh le, Ref 3:7-11 Ps 95:7-11
8 na taanghpupite sennealngam
sungah a om uh lai,
Pathian a langpan lai,
Pathian a ze et uh hun lai bangin,
na thin uh na sahsak heak vun.
9 Amate in kum sawmli tawntung
ka sep teng mu zo napi
Kei hong ze et uh a,
hong sin zazaan uh hi, Pathian in ci hi.
10 Tua ahikom tua mite tungah
ka thin uuk a, hi bangin ka ci hi,
‘Amate in kei tungah
hong thumaan ngawl tawntung a,
ka thupiakte hong nial uh hi.’
11 Ka thin uuk a, ‘Tawlngakna
ka piak natu ngam ah
amate tum ngeingawl tu hi!’ ci in:
a ciliaphuai kamciamna ka vawt hi,” ci hi.
12 Ka thu uppuite awng, a nungta Pathian kung pan na lampial ngawl natu in, no sungah kuama peuma in ngitlona thinsung le up ngawlna thin na nei ngawl natu in kidawm tavun.
13 Laithiangtho sungah, “Tuni” a kici kammal sia a kizak thei lai teng mawna ii hong theam ngawl natu le na thin uh a sak ngawl natu in, khat le khat ni simin na kihu zawk uh kul tu hi.
14 Banghang ziam cile a kipat pan ih nei kimuanna sia a tawp dongin ih kholet le ei theampo sia Christ taw a kikopte ih hi hi.
15 Hisia laithiangtho ii ci ahi hi:
“Tuni in Pathian ii aw na za le,
na taanghpupite ii Pathian
a langpan lai uh bangin
na thin uh na sahsak heak vun.” Ref 3:15 Ps 95:7-8
16 Pathian aw za a, ama a langpante a kuate ziam? Moses ii Egypt ngam panin a pusuapui theampo ahi hi.Ref 3:16-18 Mi 14:1-35
17 Pathian sia kum sawmli tawntung a kuate ii tungah thin uuk ziam? Sennealngam sungah puk a, a thi mawneite tungah Pathian a thin uuk hi.
18 Pathian in a ciliaphuai kamciam pia a, “Amate tawlngakna ka piak natu ngam ah a tum ngei buatu uh hi,” a ci sia — akua te ii thu a sonna ziam? Ama a langpante ahi hi.
19 Amate in tua ngam sungah tum thei ngawl hi, banghang ziam cile amate in um ngawl ahihang hi ci in ih he hi.