2
A Lian Ngupna
1 Tua hu in ei in thumaan thu ih zaak te pan, lam ih pial ngawl natu in ih kholet seseam kul hi.
2 Vantunglalangte in ih taanghpupite tungah a thupiakte maan hi ci in lak hi, tuaciang a zui ngawl a ni ngawl khat pawpo sia ama taw a kiphu in daan thuak tu hi.
3 Tua hi a, hi zata in a lian ngupna thusim buathong leang bangbangin suakta tu hi ziam? Topa ama mama in hi ngupna thangsak masa a, tuaciangin a zate in ei tungah tua thu a maanna hong lak zo hi.
4 Tua kawmkaal ah Pathian in nalamdang laknate, a tumdang tuatuamte vawtna le, Thaa Thiangtho letsong te ama ii a dei bangin a hawmsakna taw in amate tetti panna tungah tetti panna belap thua hi.
Ngupna Nga natu Lampuipa
5 Pathian in hong pai tu ci in ih son leitung thak sia, a uk tu in vantunglalangte a koi bua hi.
6 Tua hi ngawl zaw in Laithiangtho mun khat ah:
“Pathian awng,
mihingte sia bang hi a;
tuaza in banghang
thinbot ni ziam?
mihing ma hi lel napi
a bang tu in thinnuammaw ni ziam? Ref 2:6-8 Ps 8:4-6
7 Vantunglalangte sangin
a niamzaw in
tawmvei sung na koi a;
upatna le minthanna
ama na khusak hi,
8 tuaciang na theampo tungah
a uk tu in na vawt hi.”
Pathian in mihing sia “na theampo a uk tu” in vawt hi, ci hi. Hi thu in na theampo huam siat hi. Ahihang tu laitak hunin, mihing in na theampo uk hi, ci in ih mu bua hi.
9 Ahihang Pathian ii thuthiamna tungtawnin, mihing theampo atu a thi tu in, vantunglalangte sangin tawmvei hunsung teng a niamzaw in a kivawt Jesus ih mu hi. Thina a thuak hu in tu in minthanna le upatna lukhu a khuk ih mu hi.
10 Ta tam mama in ama ii vaangletna a siim thei natu in, na theampo bitphua in a keam Pathian in, Jesus sia a thuakna tungtawnin a cialcing pa a suasak tu sia a maan thu hi takpi hi. Banghang ziam cile amate ngupna sung a then sia Jesus ahi hi.
11 Ama in mihingte sia a mawnate uh panin, thiansua a, tuaciang ama le tuabangin a kithiansua sa theampo in, Pa kibang a nei uh hi. Tua hu in Jesus in, amate sia innkuanpui a nak tu in, a mai a zum bua hi.
12 Ama in Pathian munah,
“Ka mite munah
na sep sa teng ka son tu hi;
amate ii a kikhopna sungah
nang kong pok tu hi,” ci hi.Ref 2:12 Ps 22:22
13 Ama in, “Ka muanna sia Pathian tungah ka nga tu hi,” ci hi. Tuaciang, “Hi sungah Pathian ii kei hong piak tanote taw ka om hi,” zongh ci lai hi.Ref 2:13 Is 8:17,18
14 Ama ci bangin tua tanote sia chi le sa taw a om mihingte ahi bangma, Jesus ama mama zongh amate bang hong suak a, amate mihing pianzia teng hong siim hi. Hi bang a hina sia banghang ziam cile ama thina tungtawnin thina tungah vaang a nei doaimangpa a lalcipsak natu hi a,
15 thina a kiitak hu in a nuntak sung teng sila a, a kaai mihingte tuabangin suaktasak hi.
16 Banghang ziam cile ama ii huna a piakte sia vantunglalangte hi ngawl hi ci in kitelthiang hi. Tua hi ngawl zawin, ama in Abraham ii suan le paalte a hu hizaw hi. Ref 2:16: Is 41:8-9
17 Hisia hu in ama in a suapuite taw na theampo sungah a kiban uh kul hi, banghang ziam cile mihingte a mawna pan mawmaisakna kipiak thei natu in, Pathian na a sepna ah, a thumaan ngual a hesuak thei Thiampi Lianbel a sua natu ahi hi.
18 Tu in ama in ze etna a thuakte sia hu thei hi. Banghang ziam cile ama mama zongh kize et zo a, thuak ngei zo hi.