6
Vanhngit Kipuakpui vun
1 Ka suapuite awng, tatkhialna nam khat po taw mihing khat a kiman le, thaa taw a nungta note in, ama sia a dinmun maan ah na koi vun; ahihang cikna thiamna na zangh hamtang vun. Tuaciangin note zongh ze etna na thuak ngawl natu noma le noma ki en in kidawm vun.
2 Khat le khat vanhngitte na kidawn tavun, tuabangin Christ ii thukham na zui tu uh hi.
3 Khat po in ama sia bangma hi ngawl napi, hi a kisa le ama le ama kitheam hi bek hi.
4 Mihing khat simin ama le ama a ngamtatna kisit hen. A pha in a ngamta khat in ngualdang khat ii ngamtatna taw kiteengat ngawlin, ama ii ngamtat phatna tungah kisuangtaak thei tu hi.
5 Banghang ziam cile mihing sim in a vanh uh tek a puak kul tu hi.
6 Tapidaw thu a kihil pasal khat in, ama ii neisa na pha theampo a Syapa taw hawm tahen.
7 Noma le noma kitheam heak vun; Pathian sia kuama ii theam zawk hi ngawl hi. Mihing khat in a poai bang lianin a at tu hi.
8 Ama in leitung pumpi deina lo sungah a poai le, tua mun panin thina an kaikhawm tu hi; Thaa ii deina lo sungah a poai le Thaa panin tawntung nuntakna an kaikhawm tu hi.
9 Tua ahikom na pha sepna sungah toi kisa bua tawng; banghang ziam cile thinkiam in tawp bua po leang ih anlaak tu hun hong theng tu hi.
10 Tua ahikom hunpha ih nga simin mihing theampo tungah a pha ih seam tu a, a tuan in upna sung a ih innkuanpuite tungah ih seam tu hi.
A khakbel Kidop natu Sonkholna le Nuksetna
11 Keima khut taw laithak kong at ciang, laimal lian taw ka at sia mu tu nu hi!
12 Note tungah zawthawk thu taw vunteap hong atsak nuamte sia, a puatham thute ah kisa thei a, a kisuangtaakte ahi hi. Ahizong amate ii tuabang a vawtna sia, Jesus ii Thinglamtee hu in amate in vawtsiatna a thuak bua thei tha le ci in a ngaisut uh hang bek ahi hi.
13 Vunteap at te ngawngawn zongh Thukham a zui bua uh hi; note vunteap hong atsak nopna thu in, pumpi tung a zeksa vawtna sungah na tum uh sia, a kisuantaak thei natu ahi hi.
14 Ahizong kei ka hile ih Topa Jesus Christ ii thinglamtee bekma ka kiphatsak pui tu hi; banghang ziam cile ama ii thinglamtee hangin leitung sia kei atu in a thisa hi a, keima in leitung atu in a thisa ka hi hi.
15 Mihing khat vunteap a ki at le a ki at ngawl sia a phatmawkna mama om ngawl het hi; a pha maw sia in mihing thak suana ahi hi.
16 A nuntakna sungah hi ngeina a zuite tungah thinnopna le hesuakna om tahen a — amate le Pathian mihing theampo tung zongh ah om tahen!
17 Thu khupna ah: kuama in kei tungah ngimna hong pia thuasak nawn heak vun, banghang ziam cile ka pumpi tung a meima pawn omte in kei sia Jesus ii sila ka hina lak hi.
18 Ka suapuite awng, ih Topa Jesus Christ ii thuthiamna sia note theampo tungah hong om tahen. Amen.