5
Na Suatakna Keamcing vun
1 Suatakna sia ei neisa hi — Christ in hong suaktasak zo hi! Tua ahikom a suakta mihingte bangin, ding vun a, sila na suak kik nuam heak vun.
2 Ngai vun! Keima Paul in kong ci hi, na vunteap uh na atsak nuam uh le Christ in note atu kimanna nei ngawl het ahi hi.
3 Khatvei ma kong ci kik hi, pasal khat peuma in a vunteap a atsak nuam le Thukham buppi a zui kul hi.
4 Thukham zuina taw Pathian mai ah thutang sua natu a hanciam uh le no teng in noma le noma Christ kung pan a kikhaktan na hi uh hi. Note in Pathian ii thuthiamna puasia ah na om uh hi.
5 Kote ka hi uh le ka lam etna uh sia Pathian in thutang hong suasak tu ci thu ahi hi; hi thusia ka upna uh tungtawnin Pathian ii Thaa vaangletna taw hong seam tu hi ci in ka ngak uh sia ahi hi.
6 Banghang ziam cile Christ Jesus taw pumkhatin ka om uh ciang vunteap atna ahizong, at ngawlna ahizong bangma kitumdanna a omsak bua hi; a thupi sia in ki itna tungtawn a, na a seam upna ahi hi.
7 Na vawt uh sia pha mama hi! Akua in thumaan thu na nit tu sia hong khaktan ziam? Bangbangin ama in hong kaizawn ziam?
8 No hong sam Pathian in tuabangin hong vawt ngawl hi.
9 “A kithau sa anvui a khan natu in tol tawm bek kisamh hi,” a ci uh bangma ahi hi.Ref 5:9 1 Cor 5:6
10 Ahihang note huvau in thinmuanna ka nei lai hi. Topa taw pum khatin ih nuntakna in, ngaisutna tumdang na nei ngawl natu in hong lungmuangsak a, hong nawngkaisak pa sia akua po ahizong, Pathian in daan pia tu hi, ci in ka um hi.
11 Ahihang kei ka hile, ka suapuite awng, vunteap at kul hi ci in thu hil lai ka hile banghangin hong kivawtsia lai ziam? Tua sia in thumaan hi thongle Christ ii thinglamtee thu ka hilna in bangma ngimna a piangsak buatu hi.
12 No hong nawngkaisak mite tai siat le ka oai hi; amate le amate cil kinget vet tahen!
13 Ka suapuite awng, no sia a suakta tu in hong kisam hi. Ahihang hi suatakna in chi le sa deina ii hong ukna tu a paulap nuam hisak heak vun. Tua taangin ki itna taw khat le khat kihu vun.
14 Banghang ziam cile Thukham buppi sia thupiak khat in kingawm hi: “Nangma le nangma na ki it bangin na innpaamte na it in.”
15 Ahihang ngamsate bangin na ngamta uh a, khat le khat kisuu in na kiliamsak uh le, tuasia ciang kidawm tavun, tua ahibuale khat le khat kilalcipsak tu nu hi.Ref 5:14 Thiam 19:18;
Thaa le Mihing Pianzia
16 Kong son thu in hi sia ahi hi: Thaa in na nuntakna uh zeaksak vun, tua hile mihing pianzia ii deinate na lungkimsak buatu uh hi.
17 Banghang ziam cile ih mihing pianzia ii deite sia Thaa ii deite taw kilangpan hi, tuaciangin Thaa ii deite sia mihing pianzia ii deite taw kilangpan hi. Hite nii in kingal hi, na ngamtat nop uh bangin na ngamta thei bua uh hi a cinopna hi.Ref 5:17 Rom 7:15-23
18 Thaa in hong lampui le Thukham khutnuai ah na om nawn bua uh hi.
19 Mihing pianzia ii sepna sia thiang takin kimu hi. Tua sia in nu le pa paktatna, a kiihuai le zummawk ngamtatnate;
20 milim biakna le bum le ai toaina te hi. Mihingte khat le khat kingalin kido uh hi; amate ki eangin, thin uukin, ultup uh hi. Amate a pawl a pawlin kikhen hi;
21 kidungawkna, zukhamna, sikvil loklenna le hite taw a kibang ngamtatna dangte nei uh hi. Kidop natu kong piak ngei bangin tu in kong ci hi: hi bang ngamtate a neite in Pathian Ngam lua ngawl tu hi.
22 Ahihang Thaa in itna, lungdamna, thinnopna, thinsauna, dikna, phatna, thumaanna,
23 kiniam khiakna le eima le eima ki uk zawknate piangsak hi. Hi te a langpan thukham bangma a om bua hi.
24 Tuaciang Christ Jesus ii neisa ahite in, a mihing pianzia le tua ii uukna le deinate sia thi khawmsak zo hi.
25 Thaa in nuntakna ei hong pia zo hi; ama in ih nuntakna zongh hong uk nanak tu hi.
26 Ei sia khat le khat tungah kiphasakin, kitaw in, ih ki eang buatu hi.