31
Topa ii Ompuina Puanbuk A vawt tu Naseamte
(Pusuana 35:30—36:1)
1 Topa in Moses tungah,
2 “Judah minam sung pan Hur ii tupa ahi, Uri ii tapa Bezalel ka teal zo a,
3 ka vaangletna taw ama ka dimsak zo hi. Teltheina, thiamna, thiamneal tuatuam hi theina —
4 pungsaan ngeal thiamna tuatuamte le tuate sia khamh, ngunn, le taaute taw vawt theina ka pia zo hi.
5 Suangmanpha atna, thing ngelhna; le a dang thiamneal tuatuamte sep thiamna zongh ka pia zo hi.
6 Ama taw naseam khawm tu in Dan minam sung pan Ahisamach ii tapa Oholiab zongh ka teal zo hi. Vawt tu in kong thupiak theampo a vawt thei natu in a dang khutthiamte zongh thiamna nasia tak ka pia zo hi:
7 a vawt tute sia ka ompuina Puanbuk, Thuciamna Thingkuang le a sitna, Puanbuk sung vanh theampo,
8 sabuai le a vanhte, khamh ciitak taw kivawt meikhuam le a vanh theampo, ngimnamtui hal natu biaknatau,
9 meihal piak natu biaknatau le a na zak theampo, khut silna kuang le a ngakna,
10 Aaron le a tapate ii thiampi a sep ciang a silh tu thiampi puan manphate,
11 noi sathau le Mun Thiangtho ah zak tu ngimnamtuite ahi hi. Hi teng a vawt ciang, na tungah kong thupiak bang tatakin amate in vawt tu uh hi,” ci hi.
Sabbath, Tawlngakna Ni
12 Topa in Moses tungah
13 Israel mite tungah a son tu in, “Ka tawlngak ni ahi Sabbath na tang vun, banghang ziam cile tua ni sia hong pai tu hun theampo sung Keima, Topa in note keima mi in kong vawt hunlam a kilangh natu in keima le note kilaklaw ah lim khat ahi hi.
14 Tawlngakna ni sia na tan kul tu hi, banghang ziam cile tua ni sia thiangtho hi. Khat po in tua ni tang ngawlin na a seam le, kithatlum tu hi.
15 Ni luk sung nasep tu hun na nei uh a, ahizong ni sali ni sia a ciliap huai tawlngak ni, keima atu in a kikoituam ni ahi hi. Khat po in tua ni in na a seam le, kithatlum tu hi. Ref 31:15 Pu 20:8-11; 23:12; 34:21; 35:2; Thiam 23:3; Thkna 5:12-14
16 Israel mite in tua ni sia thuciamna lim khatin tang tu hi.
17 Tua thu in keima le Israel mite kilaklaw ah a kip tawntung lim ahi hi, banghang ziam cile Keima, Topa in vantung le leitung ni luk sung ka vawt a, ni sali ni in na seam ngawlin ka tawlnga hi,” ci hi. Ref 31:17 Pu 20:11
18 Sinai Mual tungah Pathian in Moses a paupui zawkciang, Pathian ama tatak ii thupiak teng a tungah a at sa suangpheakte nii sia Moses pia hi.