30
Paaknamtui Hal natu Biaknatau
(Pusuana 37:25-28)
1 “Paaknamtui hal natu in biaknatau khat acacia thing taw vawt in.
2 A sau centimetre 45, a zai centimetre 45, le a saang centimetre 90 hi tu a, a pangh kikim in kiing li nei tu hi. A kiing li in a dokte biaknatau taw sakhat hi tu hi.
3 A sitna tung, a pangh li teng le a dokte khamh ciitak taw tuam in a, a mong kiimkot teng khamh taw zial in.
4 A zawn natu thingpumte thun natu in khamh kual nii vawt in, a tungsang pangh a kiingte nii nuai ah bul in.
5 A zawnna thingpumte acacia thing taw vawtin, khamh taw tuam in.
6 Thuciamna Thingkuang mai ah a kikhai puankhaite pua sangah tua biaknatau koi in. Tua mun sia no kong mu natu mun ahi hi.
7 Aaron in zing simin meivakte kinging tu hong pai ciang biaknatau tungah ngimnamtui hal tu hi.
8 Ama in nitakin mei a det ciang tuabang ma in vawt tu hi. Hi ngimnamtui biakpiakna sia hong pai tu hun theampo tatsat ngawlin a vawt tu ahi hi.
9 Hi biaknatau tungah a kikhaam ngimnamtui biakpiakna, nganhing biakpiakna ahibuale, antang taw biakpiakna bangma pia heak vun, Sapittui biakpiakna zongh buak heak vun.
10 Mawphelna in a kipia nganhing chi, tua biaknatau dok lite tung a noina taw Aaron in kum khatin khatvei a zeksa biaknatau thiansuana vawt tu hi. Hi biakpiakna sia hong pai tu hun theampo kum simin kivawt tu hi. Keima Topa tungah hong ki aap hi biaknatau sia thiangtho sitset tu hi,” ci hi.
Topa Ompuina Puanbuk atu Phiangshia
11 Topa in Moses tungah,
12 “Israel mite ii mihing simna a nei ciang, a mi phaza a kisim laitak amate tungah tuasiatna a thet ngawl natu in mi theampo in a nuntakna ii man kei tungah hong pia tu uh hi.
13 Mihing simna ah a kihel peuma in, a kizangh ngei khaikhin taw tee in a kinget za sum pia tu hi. A kuama po in tua sumte kei tungah biakpiakna in hong pia tu hi. Ref 30:13 Pu 38:25-26; Mt 17:24
14 Kum kul pan a tungsia a pha peuma mihing simna ah a kihel theampo in kei tungah tua sum hong pia tu hi.
15 A nuntakna ii man hi sum a piak uh ciang a haute in a tamzaw, a zawngte in a tawmzaw ci bangin pia ngawl tu hi.
16 Israel mite tung pan hi sum khon in a, ka ompuina Puanbuk puuaphatna in zangh in. Hi phiangshia sia a nuntakna ii man tu hi a, tuasia taw amate ka cin ka kep tu ka phawk tu hi,” ci hi.
Taaukuang
17 Topa in Moses tungah,
18 “Taaukuang khat le taau taw kivawt a ngakna khat vawt in. Puanbuk le biaknatau kilaklaw ah koi in a, a sungah tui koi in. Ref 30:18 Pu 38:8
19 Aaron le a tapate in tua tui a khut le a peangte silna in a zak tu hi a,
20 amate puanbuk sung ahibuale biaknatau nai ah biakpiakna ante pia tu in a pai ma in kisil tu hi. Tuasia ciang amate kithatlum ngawl tu hi.
21 Amate a thi ngawl natu in a khut le a peangte a sil kul hi. Hi ngeina sia amate le a suan a paalte in a tawntung a zui tu ahi hi,” ci hi.
Noi Sathau
22 Topa in Moses tungah,
23 “A phabel hel namtuite — Myrrh paaknamtui tui kilogramme 6, a ngimnamtui thingzungthum kilogramme 3, tu ngimnamtui kilogramme 3,
24 le cassia kilogramme 6 la in. A vekpi in a ngitna sia a kizangh ngei khaikhin taw kitee hi tu hi. Olive thau litre 4 belap in,
25 paaknamtui hel bangin noi sathau thiangtho vawt in.
26 Hi sathau sia ka ompuina Puanbuk, Thuciamna Thingkuang,
27 sabuai le a na theampo, meikhuam le a na theampo, paaknamtui halna biaknatau,
28 meihal biakpiakna biaknatau le a na theampo le kisilna kuang le a ngakna teng noai in.
29 Hi nate hi bangin na aap tu uh a, tua hile thiangtho sitset tu hi. Tuate a thutha peuma tua thianthona vaang in ngim ngasak tu hi.
30 Tuaciang Aaron le a tapate sathau noai in a, keima na a seam thiampi tu in thupha taw kipsak in.
31 Israel mite tungah, ‘Hi a thiangtho noi sathau sia ka nasepna sung hong pai tu hun theampo ah kizangh top tu hi.
32 Hi sathau sia nautaangte tungah na buak buatu uh a, hisia taw a kibang khat po vawt natu in hi sathau helzia sia ma na zangh buahet tu uh hi. Tuasia in thiangtho a, a thiangtho in na vawt kul hi.
33 Hi sathau taw a kibang a vawt khat po ahibuale thiampi ahi ngawl khat pawpo tungah a zangh sia keima mi in kisim nawn ngawl tu hi,’ ci in” ci hi.
Paaknamtui
34 Topa in Moses tungah, “A nuai a hel namtuite — stacte, onycha, galbanum le frankincense paaknamtui ciitak te a khen kikim tekin la in.
35 Tua nate paaknamtui hel bangin, ngimnamtui vawtna ah zangh in. A sit ahi natu le a thiantho natu in ci saw in.
36 Aheap sia suuvui in a, ka ompuina Puanbuk ah paipui in, Thuciamna Thingkuang mai ah the in. Hi ngimnamtui sia a thiangtho sinsen in ngaisun in.
37 Tua paaknamtui taw kibangin noma atu khat po sia a helnazia sia ma zangh in na vawt buatu hi. Kei tungah hong ki aap a thiangtho na khat bangin ngaisun in.
38 Tua paaknamtui taw kibangin zak tu khat po a vawt a om le keima mi in kisim nawn ngawl tu hi,” ci hi.Ref 30:22-38 Pu 37:29