8
Ezekiel ii Pathian Mukholsak A niina
Jerusalem ah Milim Biakna
1 Saltan zawk a kum lukna, tha luk tha, a ni nga ni in, Judah mi saltaangte ii lampuite taw ka inn sungah ka tokhawm uh hi. Thakhat thu in Vaanglianpipa Topa vaang ka tungah hong theng hi.
2 Ka etto ciang meikuang bang mihing pianlim khat mangmuna ka nei hi. A kawng nuai sia teng sia meikuang taw kibang a, a kawng tungsia teng sia taau nawt thiang bangin taang hi.
3 Ama in khut taw a kibang khat hong zanin ka sam pan hong zamh hi. Tua zawkciang hi mang muna sungah Pathian ii thaa in vui sung a saangna ah kei hong khaito a Jerusalem ah hong paipui hi. Ama in Pathian a thin uuksak milim khat omna Biakinnpi ii saksang kongpi tumna sungnung ah hong paipui hi.
4 Tua mun Cheber Ngunhui ah ka om lai a ka mu bangma in, Israel ii Pathian ompuina a lak khuavak taang velvol sia ka mu hi.
5 Pathian in kei tungah “A thithei mihing awng, saksang en in,” hong ci hi. Ka et ciang, kongpi tumna hui ah a om biaknatau kungah Pathian a thin uuksak milim sia ka mu hi.
6 Pathian in kei tungah hong ci hi, “A thithei mihing awng, a piang nate na mu ziam? Ka mun thiangtho pan a khuala vaial na ah hong not keak Israel mite ii hi sungah a vawt a kiihuai ngamtatna en in. Hi sangin a mindai huai zaw nate ngawngawn na mu tu hi”.
7 Ama in suumsung puanung tumna ah hong paipui a, panghawng khat hong lak hi.
8 Ama in, “A thithei mihing awng, hi sung pan pang sulet in,” hong ci hi. Pang ka sulet a, kongkha khat ka mu hi.
9 Ama in, “Tum in amate ii tua munah a sia le a kiihuai na a septe en in,” ci in hong sawl hi.
10 Tua ahikom tumin ka en hi. Pangte tungah ngul limte le a dang a thiangtho ngawl nganhing limte, tuaciang Israel mite ii a biak a dang nate ii lim a kisuai teng ka mu hi.
11 Israel mite lampui sawmsalite tua munah om a, tuate ii sungah Shaphan ii tapa Jaazaniah zongh kihel hi. Amate khat simin ngimnamtui halna khat tek toai a, ngimnamtui a hal sia panin meikhu suak hi.
12 Pathian in hong dongh hi, “A thithei mihing awng, Israel lampuite ii a sepkute na mu ziam? Amate a vekpi in limte taw a kidim inndoi sungah biakna vawt uh hi. Amate kam zonna hisia hi: ‘Topa in hong mu ngawl hi! Ama in hi ngam taisan zo hi.’ ” ci uh hi.
13 Tua zawkciang, Topa in kei tungah, “Tuate sangin a kiihuai zaw lai a vawtte na mu tu hi,” hong ci hi.
14 Tua ahikom ama in Biakinnpi ii saksang kongpi ah hong paipui a, Tammuz pathian a thi hu in a kap nupite hong lak hi.
15 Ama in, “A thithei mihing awng, tuasia na mu ziam? Tuasia sang a kiihuai zaw lai nate mu tu ni hi,” hong ci hi.
16 Tua ahikom ama in Biakinnpi suum, a sungnung ah hong paipui hi. Tua mun thiangtho tumna nai, biaknatau le kongzin kilaklaw ah pasal kul le nga khawng a om hi. Amate in biakmun thiangtho sia nungngat in, nisuana sang nga in kunsuk a, nisuak sia bia uh hi.
17 Topa in kei tungah, “A thithei mihing awng, tua sia na mu ziam? Hi Judah mite in hi sungah na mu a kiihuai a vawt thawthongte theampo le ngamsung theampo a, a kizel ngoltol ngamtatna teng taw a lung a kim bua uh hi. Tua teng bek dom ngawlin amate Biakinn sung mama ah hong pai hamtang in tuate hong seam a, ka thin hong uuksak seseam uh hi. En in amate in thuak zawk mama ngawl tu za dongin kei hong selno hi!
18 Amate in ka thin uuk tutna theampo thuak tu hi. Amate ka khoaikhe buatu a, ka hesuak buatu hi. Amate in a nging thei zaza au in ka tungah thu hong ngen tu uh hi, ahihang amate aw ka ngai buatu hi,” hong ci hi.