7
Israel Bo Kuanh
1 Topa in kei hong paupui hi.
2 Ama in “A thithei mihing awng, hisia in Vaanglianpipa Topa Keima ii Israel ngam tungah ka son ahi hi: hisia in ngam bup atu in a bona ahi hi!
3 “Israel awng, bona hun hong theng zo hi. Nang in ka thin uukna na phawk tu hi, banghang ziam cile na sep na vawt tungtaang ah thukhenna hong pia khi hi. A thasiathuai na ngamtatna theampo hong thuk kik tu khi hi.
4 Nang hong khoaikhe ngawl tu khi hi, tua ahibuale nang tungah hesuakna hong lak ngawl tu khi hi. Keima sia Topa ka hi hunlam na heak natu in a thasiathuai na ngamtatna te hu in, daan kong pia tu hi,” hong ci hi.
5 Hisia in Vaanglianpipa Topa ii ci ahi hi: “Na tungah tuasiatna khat zawkciang khat hong tung tu hi.
6 A vekpi kiman zo hi. Hisia in bona ahi hi. Nang sia a mansa na hi hi.
7 Ngam sungah a teang no mihingte atu in bona hong thetheng hi. Mual tung biakpiakna munte ah poai kikhaam nawn ngawlin buaina bek a om tu hun hong nai hi.
8 “Hai ngawlin ka thin uukna ii thahatna na phawk tu hi. Na sepna sate tungah thu kong khen tu a, a thasiathuai na ngamtat nate theampo kong thuk kik tu hi.
9 Nang kong khoaikhe buatu a, kong hesuak buatu hi. Keima sia Topa ka hi hunlam le nangma daan hong pia sia ka hi hunlam na heak natu in, a thasiathuai na ngamtatnate hu in daan kong pia tu hi.”
10 Israel atu in tuasiatna ni hong theng tu hi. Ngoltol ngamtatna pung vaial hi. Kiphatsakna sia a saangbel mun theng hi.
11 Ngoltol ngamtatna in khansiat seksolna tam piangsak vaial hi. Amate ii neisa a hauna a phatna, ahibuale a minthannate bangma a kikhe nawn buatu hi.
12 A hun hong theng hi. Vanh lei vanh zuak sia khiakna a nei nawn ngawl tu ni hong nai hi, banghang ziam cile Pathian ii daan piakna sia a kuama theampo tungah a kibangin tung tu hi.
13 Sumvawt a kuama po in, a supsa teng a nga kik dong a nungta buatu hi, banghang ziam cile Pathian thin uukna sia a kuama theampo tungah theng hi. A ngilote luhai thei ngawl tu hi.
14 Lemle kitum a mihing theampo kithoai khol hi; ahihang kuama ngalsim tu in kuan ngawl hi, banghang ziam cile Pathian ii thin uukna sia a kibangin mihing sim tungah tung tu hi.
Israel ii Mawnate hangin Daan piakna
15 Lampite ah ngal kisimna om a, innte sungah natna le ngilkialna om hi. Ngam pua sangah a om khat pawpo sia ngal kisimna ah thi tu a, khuapi sung a om khat pawpo sia natna le ngilkialna taw thi tu hi.
16 Pawlkhatte sia leikuamte pan a lau vakhute bangin mual tungah suakta to tu hi. A mawna uh hu in amate theampo mau tu uh hi.
17 A kuama po ii khutte sia thazawm tu a, a khupte huang tu hi.
18 Amate in khau-ip puan silhin liing ngawp tu uh hi. A lute uh kimeet tol tu a, kimaizumsak tu hi.
19 Amate in a khamh le a ngunnte lampi ah ninteak bangin vawk tu uh hi, banghang ziam cile Topa ii thin uuk ciangin, khamh le ngunn in amate hun zo ngawl hi. Khamh le ngunn in amate deina lungkimsak thei ngawl a, a ngil uh vasak thei ngawl hi. Khamh le ngunn in amate sia mawna sung zotpui hi.
20 Khatvei lai in amate ii a et hoi suang manphate kiphatsakpui hikale tu in amate in tuate sia a kiihuai milimte vawtna in zangh uh hi. Tua hu in Topa in amate haunate huatsasak hi.
21 Topa in, “Ngamdangmite in amate ka suttolsak tu a, thukham paltante in amate hauna theampo la in, a ninsak tu uh hi.
22 Manpha ka sak Biakinnpi a mindaisak a, phalakte in sulet in a nitsak ciangin ka kamkumh buatu hi.
23 Na theampo buai a, ngamsung sia kithalupna taw kidim a, khuapite sia ngoltol ngamtatna taw kidim hi.
24 A ngilobel minamte hi munah kong paipui tu a, na innte uh amate in ka tangsak tu hi. Na biakpiakna munte tua minamte in a nitsak ciang, na mi a thahat belte in a kimuanna uh bosua tu uh hi.
25 Thin kiamna hong theng tu hi. Thinnopna na zong tu uh a, ahihang na mu ngei buatu uh hi.
26 Tuasiatna khat zawkciang khat hong kizui tu a, thusia lasia zongh piangin tui bang hong luang tu hi. A mu kholnate hong pualaak natu in kamsaangte tungah na ngen tu uh hi. Thiampite in mite a hil tu bangma nei ngawl tu uh a, tuaciang upate in ngaisutna a piak tu nei ngawl tu uh hi.
27 Kumpipa khuangai in mau tu a, kumpipa tapa sia lametna bo in, tuaciang mite lau in liing tu uh hi. Na sepsa na vawtsate theampo hu in nang daan kong pia tu a, ngual tungah thu na khen bangin, na tungah thu kong khen tu hi. Hisia in, Keima sia Topa ka hina nang hong lak tu hi,” ci hi.