36
Israel te tungah Pathian ii Thupha
1 Topa in, “A thithei mihing awng, Israel mualte tungah ka thupuak a ngai natu son in a,
2 Keima, Vaanglianpipa Topa ii ka son tu thute hi bang hi: Israel ii a ngalte in eenna taw en in, ‘Tu in tua taanghlai mualte sia koma aa hi!’ ci hi.
3 “Tua ahiciang kamsaanna son in a, Keima, Vaanglianpipa Topa ii ci teng taangko in. A ngampaamte in Israel mualte la in, a sutol ciang, amate theampo in Israel te nunau uh hi.
4 Tua ahikom tu in, no, mualte, luamte le ngamkuamte, a lalsa in a kinusia munte, na kiimkot ngam theampo ii a sutol a nunau khuapite awng, Keima, Vaanglianpipa Topa ii son teng hong ngai tavun.
5 “Keima, Vaanglianpipa Topa in, a kiimkot ngamte le a tuatuanin Edom ngam tungah ka thin uuk mama na taw thu ka son hi. Amate in zawnsakna le lawp toaina taw keima leitangte le nganthana munte hong laaksakin amate ii neisa sua uh hi.
6 “Tua ahiciang Israel ngam tungah kamsaanna son in a; mualpite, mualnote, luamte, ngamkuamte sia minamte in selnoin a vaang bosak ahikom Keima, Vaanglianpipa Topa ii ka thin uukna taw kong ci teng son in.
7 Keima, Vaanglianpipa Topa in na kiimkot minamte vaang bosak tu khi hi, ci in a ciliap huai kamciam kong pia hi.
8 Ahihang, Israel ka mite awng, Israel mualte tungah nang atu in thingkung pote a tee boai in a nga nga kik tu hi. Hai ngawlin inn ah nong cia kik tu uh hi.
9 Nangma sang kong pang hi, na leitang a kitho kik tu in ka vawt tu a, anciite kipoai kik tu hi.
10 Na mite ka pungsak tu hi. Khuapite sungah na teang tu uh a, a kisia sate theampo na pua kik tu uh hi.
11 Na ngannote le mihingte kong pungsak tu hi. Nidang sangin na tamzaw tu uh a, ta tam mama na nei tu uh hi. Na teen ngei bangin tua munah kong teangsak tu a, nidang sangin na nuamsa zaw tu uh hi. Tua hun ciang Topa ka hi hunlam nong he tu uh hi.
12 No Israel ka mite na leitang tungah teang kik tu in kong pui kik tu hi. Tua leitang sia noma ngam suak tu a, na tate pukthisak kik ngeingawl tu hi.
13 “Keima, Vaanglianpipa Topa in ka ci hi: Mihingte in tua ngam sia mihing sa ne ngam hi ci a, a ngam sungah a tate kisuttol hi a ci uh sia thumaan ahi hi.
14 Ahihang tu pan kipan na tate hong suttol mihing sa ne khat hi nawn ngawl tu hi. Keima, Vaanglianpipa Topa in pau zo khi hi.
15 Hong selno ngamte ii thu na nadon kul nawn ngawl tu a, a mite ii hong nunauna zongh na mu nawn buatu uh hi. Tua ngam in hi minam ii tate suttol nawn ngawl tu hi. Keima, Vaanglianpipa in ka pau zo hi.”
Israel ii Nuntakna Thak
16 Topa in kei hong paupui hi.
17 Ama in, “A thithei mihing awng, Israel te a ngam sungah a teen lai in, a nuntakzia le a ngamtatna taw a ngam ninsak uh hi. Amate ngamtat luheak sia numei khat tha simin a nin nei hun sung bangin biakna taw kisai a thiangtho ngawlin ka ngaisun hi.
18 Amate in a ngam sungah mihing a thalupnate le a biak milimte taw in a ngam a nitsak nate hu in, ka thin uuk tutna daan a thuak tu uh hi.
19 Amate nuntakzia le a ngamtatnate ka mawsak a, ngamdang ah ka thethaang hi.
20 A paina pawpo ah ka min thiangtho mindaisak hi, banghang ziam cile mihingte in, ‘Hite in Topa mite hi napi Topa ngam a taisat uh kul hi,’ ci tu hi.
21 Tuasia in ka min thiangtho atu hong thintoisak hi, banghang ziam cile Israel mite in a paina theampo ah ka min daisak uh hi.
22 “Tu in Keima, Vaanglianpipa Topa ii thupuak sia Israel mite tungah son in: ka vawt tu sia in no Israel te atu hi ngawl a, na thetna ngam theampo ah na daisak sa ka min thiangtho atu ahi hi.
23 Minamte sungah na daisak uh ka min — ka min lian ii thiangthona amate tungah ka lak ciangin — keima sia Topa ka hi hunlam amate in hong he tu uh hi. Keima, Vaanglianpipa Topa ka pau zo hi. Nangma hong zanghin minamte tungah a thiangtho ka hi sia ka lak tu hi.
24 Minam theampo le ngam theampo pan kong la kik tu a, na ngam ah kong ciapui kik tu hi.
25 No tuithiangtho kong the tu a, milimte le hong ninsak nadangte theampo pan kong thiangsak tu hi.
26 Lungtang thak le thin thak kong pia tu hi. A thinpui na suang lungtang kong laaksak tu a, thu a ni lungtang kong pia tu hi. Ref 36:26-28 Eze 11:19-20
27 Ka thukhamte le ka thupiakte theampo na zui ka mu thei natu in ka thaa kong khum tu hi.
28 Tua hun ciang, na taanghpupite tungah ka piaksa ngam ah na teang tu uh hi. Note in keima mite na hi tu uh a, Keima in noma Pathian ka hi tu hi.
29 Hong ninsak nate theampo pan kong hun tu hi. No tungah kialpite hong tun nawn ngawl natu in an tam mama a pian natu thupia tu khi hi.
30 Minamte sungah kialpi hu in na mindai ngawl natu na thingnga kungte le na lote pan an tam mama ka piang thuasak tu hi.
31 Na ngitlonate le khialna na vawtte na phawk tu a, na mawna le na khialna te uh hu in, noma le noma na kinunau tu uh hi.
32 Israel awng, hi te theampo sia nang atu in a seam ka hi ngawl hunlam na heak tu ka dei hi. Na sep na vawtnate hu in na maizum in na maimawl tu ka dei hi. Keima, Vaanglianpipa Topa in ka pau zo hi.”
33 Vaanglianpipa Topa in, “Na mawna theampo pan kong thiansua zawkciang na khuapite ah kong teangsak kik tu a, a lalcip sate theampo na pua kik tu uh hi.
34 Na lo paam ah a pai pawpo in lopa in na lote khunel in duipui suak ahi hunlam mu tu uh hi, ahihang na lote kong thosak kik tu hi.
35 Mihingte theampo in hi lo duipui a sua ngei hang, tu in Eden Huan bang hi zo a, khuapite kisutham, kiphuulin a kisia sa in om ngei, hikale tu in mihing teang kik zo a, kulh taw ki uum zo hi ci tu hi.
36 A bo ngawl a taanglai na ngampaamte in Keima, Topa sia a kikhul sa lote ah an ciing kikin, a lalsa khuapite a pua kik Topa ka hi hunlam hong he tu uh hi; Keima, Topa in hi teng vawt tu in kong kamciam zo a — ka vawt tu hi,” ci hi.
37 Vaanglianpipa Topa in, “Israel te in ka tungah hu ka ngensak kik tu a, tuasia ciang tuuhon bangin amate ka pungsak tu hi.
38 Tua hun ciang, tu laitakin a lalcip khuapite sia poai sungah sangaw biakpiakna in a nei tuute taw a kidim ngei Jerusalem khuapi bangin mihing taw kidim kik tu hi. Tuasia ciang Keima, Topa ka hi hunlam hong he tu uh hi,” ci hi.