35
Pathian ii Edom Daan A piakna
1 Topa in keima hong paupui hi.
2 Ama in, “A thithei mihing awng, Edom ngam sonsia in.
3 Keima, Vaanglianpipa Topa ii son teng mipi te tungah son in:
Edom mualte awng, Keima sia na ngal ka hi hi.
Nangma sia a kinusia ngamtongta kong suaksak tu hi.
4 Na khuapite lalcip in
ka nusia tu a,
Na ngam leitangte ngamtongta ka suaksak tu hi;
Tua hun ciang Topa ka hi hunlam na he tu hi.
5 “Nang sia Israel te ii ngal na hi tawntung a, a mawna a khialnate hu in a khakbelh daan a thuak hun, a tuasiat hun sungin Israel mite na thi mangsak hi.
6 Tua ahikom — Keima, Vaanglianpipa Topa sia a nungta takpi Pathian ka hi bangma — thina sia na thuak tu ma hi a, suakta thei ngawl tu ni hi. Mihing that in maw na hikom, nang sia thalup tu in hong kizuizen tu hi.
7 Edom mualtung ngam sia ngamtongta ka suaksak tu a, tua ngam kaantanin khual a haw pawpo ka thatlum tu hi.
8 Mualpite ahizong mualnote le kuam te ahizong ngalsung a kithat mithi luangte taw ka dimsak tu hi.
9 A tawntungin ngamtongta kong suaksak tu a, na khuapite sungah kuama teang kik ngawl tu hi. Tuasia ciang Topa ka hi hunlam nong he tu uh hi.
10 “Keima Topa sia Judah le Israel ngamte ii Pathian hi napi, hi ngamte nii le leitangte sia nangma aa hi a ka neisa hi, na ci hi.
11 Tua ahikom Keima, Vaanglianpipa Topa sia a nungta takpi Pathian ka hi bangma, ka mite tungah na thin uukna, na eenna le na ngaimawkna te kong thuk kik tu hi. Amate tungah na vawt nate hangin daan hong pia ka hi hunlam amate in he tu uh hi.
12 Tuaciangin, nangma in, Israel mualte sia a ngamtongta suak a, ka siasak hial zong keima thu hi zo hi, ci in nomuna taw na paunate Keima Topa in za ka hi hunlam na he tu hi.
13 Kei hong langpan in, kiphatsakna taw na kamham pauna te kong za zo hi,” hong ci hi. Ref 35:1-15 Is 34:5-17; 63:1-6; Jer 49:7-22; Eze 25:12-14; Amo 1:11-12; Oba 1-14; Mal 1:2-5
14 Vaanglianpipa Topa in, “Nang a ngamtongta mama khatin kong vawt tu a,
15 Keima neisa Israel a lalcip ciang na lungdam bangma in leitung buppi in na kiamsuk sia a lungdam tu uh hi. Seir mualte bek dom ngawlin Edom ngam theampo ngamtongta suak tu hi. Tua hun ciang keima in Topa ka hi hunlam mihing theampo in he tu uh hi.