28
Tyre Kumpipa Langpanin Kamsaanna
1 Topa in kei hong paupui hi.
2 Ama in, “A thithei mihing awng, Tyre khua ukpa tungah Keima, Vaanglianpipa Topa ii ka ci teng son in: Kiphatsakna taw kidimin, pathian khat ka hi na ci hi. Tuipite kiim uum kumpi tokhum tungah pathian khat bangin ka to hi, na ci hi. Nang sia pathian khat bangin kiheang hikale te, tuabang hi ngawl ni hi, thithei ni hi, pathian pianzia na nei bua hi.
3 Nangma sia Daniel sangin ciim zaw kisa ni hi, tuaciang nang heak zawk ngawl tu in thuku om thei ngawl tu in na um hi.
4 Na ciimna le na thiamnate in khamh le ngunnte taw hong hausak hi.
5 Nangma in sumvawt thiamnate taw summeet na vawt tan hi. Na hauna suangin bangza in kiphasak ni ziam!
6 “Tua ahiciang tu in hi sia, Keima, Vaanglianpipa Topa ii ka ci ahi hi: pathian khat bangin ciim kisa na hikom,
7 cizat a nei ngawl ngalte kong paisak tu a, kong simsak tu hi. Na ciimna le na thiamna taw na kholsa na pha theampo amate in susia tu uh hi.
8 Amate in nang hong thatlum in, tui taw kidim thaan ah hong puak uh hi.
9 Amate in nang thatlum tu in hong kuan ciangin pathian khat ka hi na ci ngam lai tu ziam? Hong thatlum tute na maingat ciang, nang sia a thithei na hi tu a, pathianzia a nei na hi bua het tu hi.
10 Pathian sel ngamdangmite khut sa taw ui thi in na thi tu hi. Keima, Vaanglianpipa Topa in thupia zo khi hi,” hong ci hi.
Tyre Kumpipa Zatakna
11 Topa in kei hong paupui kik hi.
12 Ama in, “A thithei mihing awng, Tyre kumpipa tungah a tung tu a seesa thuaknate atu in khuangai in. Ama munah Keima, Vaanglianpipa Topa ii ci teng son in: Khatvei lai in nang sia kicinna ii ettee pa na hi hi. Bangza in ciim in na mealpha ziam?
13 Pathian huan Eden ah na teang a, suang manpha namcin: ruby le diamond; topaz, beryl, carnelian le jasper; sapphire, emerald le garnet suangte taw na kizeam hi. Nang in khamh kizepna te na nei hi. Nang hong kibitphua ni in tuate sia nangma atu in a kivawt ahi hi.
14 Tua munah nang hong cing tu in, a kiitakhuai vantunglalang khat ka koi hi. Ka mual thiangtho tungah na teang a, suangmanpha tee vakil te kawm ah na vak hi.
15 Na ngamtatna sia nang hong bitphua ni pan kipan, a sia vawt tu na kipat dong paubanna a om bua hi.
16 Nang in vanh lei vanh zuakna taw na komla a, hite in ngoltol ngamtatna le mawna sung hong then hi. Tua ahikom ka mual thiangtho kong nusaisak a, vantunglalang, nang hong cing pa in suangmanpha tee vakil kawm pan nang hong not keak hi.
17 Na mealphat hu in na kiphasak a, tuaciang na minthanna in a mawmaw khat bangin hong diangsak hi. Hisia hu in nang sia lei denna in kong nei a, kumpi dangte kidop natu in kong nusia hi.
18 Vanh zuak vanh leina ah tua bang a sia na vawt hu in, na biakpiakna munte sia na siatsua hi. Tua ahikom tua khuapi sia a kaanghtum tu in ka hal hi. Nang hong ente theampo in tu in, vut le vai na sua hong mu uh hi.
19 Nang sia a tawntung bo in mangthang ni hi, tuaciang nang hong he ngei minamte theampo sia patau siat a, nang thuak sia bang a thuak lei tu lau uh hi,” hong ci hi.
Sidon Siat natu Kamsaanna
20 Topa in kei tungah,
21 “A thithei mihing awng, Sidon khuapi sia sonsia in.
22 Amate huvau, Keima, Vaanglianpipa Topa ii ci teng va son tan: Keima in na ngal ka hi hi, Sidon awng; nang tungah kong vawtte hu in mihingte in kei hong pok tu uh hi. Na sungah a teangte daan pia a, kei bangza in thiangtho ka hi sia ka lak ciang, amate in Keima, Topa ka hi hunlam hong he tu uh hi.
23 Nang tungah natnate kong tungsak tu a, na lampi te ah chi ka luangsak tu hi. Mun theampo panin nang, hong kisim tu a, na mite kithatlum tu uh hi. Tuasia ciang Keima, Topa ka hi hunlam nong he tu hi,” hong ci hi. Ref 28:20-26 Jol 3:4-8; Zec 9:1-2; Mt 11:21-22; Lk 10:13-14
Israel Thupha Kipia tu
24 Topa in, “Israel te nunau a, a zawnsak vawt kiim le paam ah minamte sia Israel te a na sak tu ling le lingkung te taw a kibang kik nawn buatu uh hi. Tuaciang amate in kei sia Vaanglianpipa Topa ka hi hunlam hong he tu uh hi,” ci hi.
25 Vaanglianpipa Topa in, “Israel mite ka thethaang na ngamte panin ka ciapui kik tu a, tuaciang minamte theampo in Keima sia, a thiangtho ka hi hunlam hong he tu uh hi. Ka naseampa Jacob tungah ka piak ngam ahi amate ii ngam ma ah Israel mite teang tu uh hi.
26 Tua munah amate sia ngam muangin teang tu uh hi. Amate in inn sa in sapithuan vawt tu uh hi. Amate a zawnsak vawt a ngampaamte theampo sia daan ka pia tu a, Israel te sia ngam muangin om tu uh hi. Tuasia ciang amate in, Kei sia Topa, a Pathian ka hi sia hong he tu uh hi,” ci hi.