27
Tyre Atu Mithi Vuina La
1 Topa in kei tungah:
2 “A thithei mihing awng, Tyre atu in mithi vuina la khat sa in,
3 tua khuapi sia tuipi kiil ah kiphutin, tuipi vaal dung theampo ah a teang mihingte taw sum a vawt hi. Hi khuapi munah Vaanglianpipa Topa ii ci teng son in:
“Tyre awng, a kicing na meal phatna kisuangtaak ni hi.
4 Na inn sia tuipi hi.
Nang hong sate in teambaw hoi khat bangin hong sa hi;
5 Amate in Hermon Mual pan mangtaakthingte
innthing tu in zangh hi.
Tuaciang na teambaw laandial mung tu in,
lamziikpi Lebanon panin Cedar thing zangh uh hi.
6 Amate in Bashan pan
oak thingkungte ngunkuang haw natu in la uh hi;
Na teambaw suat sia
Cyprus pan a laak taakthing taw vawt a
Tuaciang saiha taw
zeam uh hi.
7 Na teambaw puankhak uh sia puanneal taw kivawt hi,
Egypt pan a kitak
a kingelh puan hi.
A khuala na panin ol takin kitel thei paih hi.
Na tuipuante sia puan phabel taw kivawt a,
Cyprus tuikulh pan puan sandupte ahi hi.
8 Na ngunkuang hotte sia
Sidon le Arvad khuapite pan ahi uh hi.
Na teambaw naseamte sia
noma mihing a thiambelte ahi uh hi.
9 Teambaw lettamate sia Byblos pan a kisinsak a thiam sate veu ahi uh hi.
Tuipi tung a pai teambaw theampo ii teambaw naseamte sia,
na sumbukte sungah vanh lei vanh zuakte veu ahi hi.
10 “Persia, Lydia le Libya pan ngalkapte sia na ngalkaphonpi sungah hong seam uh hi. Amate in a lumte le a thik lukhute sia na ngalkap innte sungah khai uh hi. Amate sia na minthanna hong ngasakte ahi uh hi.
11 Arvad pan ngalkapte in na luphungte hong cinsak a, Gamad mite in na ngalvilna tausaangte hong cinsak hi. Amate ii lumte na luphung tungah khai uh hi. Amate in nang hong et hoi sakte ahi uh hi.
12 Spain ngam ah sum na vawt a, ngunn, thik, daan le haakte la in, vanh tam mamate thena in na nei hi.
13 Greece, Tubal le Meshech ah sum na vawt a, na vanh zuakte sia silate le taau vanhte thena in na nei hi.
14 Beth Togarmah panin Siphu, ngalsimna siphu le laate lei natu in na vanhte na zuak hi.
15 Rhodes mite in nang taw sum vawt hi; tuipi hui ah a teang mihing tam mamate in saiha le na vanhte ebony thingvomte taw hong theak uh hi.
16 Syria mite in na vanh zuakte le na vawtsa na tampite hong lei uh hi. Amate in emerald suang eng, puan sandup, paak kingelh puan, puanneal pha, tuipi muanpaak le ruby suangsante sia vanh manphate leina in hong nei hi.
17 Judah le Israel mite in vanh leina in zungtaang, khuaitui, olive thau le hel namtuite hong pia hi.
18-19 Damascus mite in na vanh zuakte le na vawtsa nate hong leina in, Helbon pan sapittui le Sahar pan tuumulte hong pia hi. Amate in a kihuansa thik le hel namtuite taw na vanhte hong theak uh hi.
20 Dedan mihingte zongh in na vanhte sia siphukungh puandap hamte taw hong theak uh hi.
21 Arabia te le Kedar ngamukte in na vanh zuakte sia tuuno, tuu le kealte taw hong theak uh hi.
22 Sheba le Raamah pan sumvawtte in na vanhte sia suangmanpha, khamh le hel namtui phabelte taw hong theak uh hi.
23 Haran khuapite ahi Canneh le Eden, Sheba sumvawtte, Asshur le Chilmad khuapite — tua teng theampo nang taw vanh zuak vanh lei uh hi.
24 Amate in puan hoi manhamte, puan sandupte, paak kingelh puante le a pawl iim-iam dappha puante le pha tak a kivawt khauhualte le khauzeente hong zuak uh hi.
25 Na vanh zuakte sia vanh puakna teambaw lianbel honte taw kipua hi.
Nang sia tuipi tungah a pai,
vanh ngit a kiheang teambaw taw na kibang hi. Ref 27:25-36 Tpl 18:11-19
26 Na ngunkuang hotte in tuipi hong zotpui ciang,
nisuana sang vuipi in lei taw kikhuala na ah hong lalsak hi.
27 Sumbuk vanh na neite theampo,
teambaw sungah na seppui naseamte theampo,
Na teambaw lettamate le sumvawtte,
teambaw tungah ngalkapte theampo —
tuipi sungah na teambaw a lal ciangin,
a vekpi bo siat mang siat hi.
28 Tuitaa teambaw naseamte ii auna aw sia
29 “Teambaw theampo, tu in kinusia hi.
tuaciang teambaw naseam theampo, vaalbo tungah kaato zo hi.
30 Amate in nasia tak khuangai in, nang atu mau uh hi.
a lu tungah leivui kithe in, vuttun sungah kilumliik uh hi.
31 Nang atu in amate a lu uh meettol a,
khau-ip puan silh uh hi.
Amate kapin a thin na sa mama uh hi.
32 Amate in nang atu mithi vuina la khat hong sak hi:
‘Tuipi sungah tu in a thimcip Tyre taw a kua teengat thei tu hi ziam?
33 Tuipi ngal ah na sumbuk vanhte a pai ciang,
nang in minam theampo ii kitaangsapte na kicingsak hi.
Sumbuk vanh na hauna taw kumpipate na hausak hi.
34 Tu in nang tuipi sungah lalcip zo ni hi;
Tuipi liante ii taw a thukna ah a taak na hi zo hi.
Na vanhte le nang atu na a seam theampo
nang taw tuipi sungah na bo siat zo uh hi.'
35 “Tuipivaalbo ah a teang theampo in na thuakna hu in liinglawng uh hi. A kumpipate ngawngawn lau in a maitang uh ah a launa lim kilak hi.
36 Nang sia a tawntungin, a mangthang na hi hi. Tuaciang leitung theampo ah sumvawtte patau siat a, nang thuakna bang a thuak thaak tu lau uh hi.