17
1 “ Topa na Pathian sia mealhemna khat pawpo a nei khui ahibuale tuu taw bia heak vun; Topa in tuasia ngaimaw hi.
2 “Sonteena in na khuate uh khat sungah pa ahibuale numei khat sia pathian dangte ahibuale ni, tha, aksite a biakna taw
3 Topa tungah maw in a thuciamna palsat in, Topa thupiak a langpan ahi hi, Ref 17:3 Pu 22:20
4 tuabang thu na za uh le, pha takin kantel vun. Hi bang thusiate Israel te sungah a piang takpi le,
5 tua pa khua pua sangah paipui in suang taw deanglum vun.
6 Ahizong tetti nii ahibuale a tamzaw in ama khial hi ci in tetti a pang le bekma tua pa kithatlum thei tu a; tetti khat bek a om le ama kithatlum ngawl tu hi. Ref 17:6 Mi 35:30; Thkna 19:15; Mt 18:16; 2 Cor 13:1; 1 Tim 5:19; Heb 10:28
7 Tetti te in ama suang taw deang masa tu a, tuaciang a taang lai mite in deang tu hi; hi siatnate hi bangin bosak tu nu hi. Ref 17:7 1 Cor 5:13
8 “Khua sung thukhente atu in khensat haksa ahi, neisa kituuna, pumpi kiliamsuana, mihing thalupna le mihing thisakna a khentel tu thute hong om tu hi. Hi bang thute a om ciang Topa na Pathian ii tealsa biakna mun khat sia ah pai in,
9 tua thu sia Levi mi thiampite le tua laitak a seam thukhenmangte mai ah puak vun a, amate in khensatsak vun.
10 Amate in thu khensatna nei tu a, amate hong son bang linlian in noma seam tu nu hi.
11 A thu khensatna saang vun a, a son bangin a khawng a kheakin zui vun.
12 Vaipuak nei thukhenpa ahibuale thiampipa thu ni ngawlin a ta ngam pawpo sia kithatlum tu hi; tuabangin Israel te sung pan hi bang thusiate nilkeak tu nu hi.
13 Tuasia ciang hi thu a za theampo lau tu uh a, kuama dang tuabangin ngamta ngam nawn ngawl tu uh hi.
Kumpi khat ii Zui tu Thute
14 “ Topa na Pathian ii hong piak tu ngam la in, na teen zawk uh ciang na kiim na paam a om minamte theampo bangma in kumpi khat kisamh sa in nei tu na khensat tu uh hi. Ref 17:14 1 Sa 8:5
15 Kumpi tu in na teal uh sia Topa ii a tealsa mi hi hamtang sak vun. Ama sia na mipui khat hi nak tu a; ngamdangmi khat, na kumpi in koi heak vun.
16 Kumpipa in ama ngalkaphonpi atu in siphu tampi nei thei ngawl tu hi, siphu lei tu in Egypt ah mite sawl ngawl tu hi, banghang ziam cile Topa in a mite tualai ah heak kik ngeingawl tu hi, ci in a sonsa hi. Ref 17:16 1 Kum 10:28; 2 Khang 1:16;9:28
17 Kumpipa in zi tam nei ngawl tu hi, banghang ziam cile hisia in ama Topa kung pan lampialsak tu hi; tuaciang ama le ama khamh le ngunn taw hau heak hen. Ref 17:17 1 Kum 11:1-8; 1 Kum 10:14-22,27; 2 Khang 1:15;9:27
18 Kumpi a sua ciang ama in Levi mi thiampite ii kep thubu ciil sia pan la in a kikhum kik Pathian thukhamte le hilciannate a ki at thubu khat nei tu hi.
19 Tua laibu sungah thupiak theampo thumaan takin a zui natu le Topa zatakna zia a heak thei natu in, ama kungah tua thubu koi in a khan tawntungin sim tu hi.
20 Tuabang a hina taw a Israel mipuite sangin ama phazaw tuan kisa ngawlin Topa thupiakna te a zui ngawl natu khaamsak tu hi.Tuasia ciang ama kum tampi mang tu a, a suan a paalte in Israel ngam, khang tam mama uk tu uh hi.