6
Tawpite Dum sungah Daniel
1 Darius in a kumpi ngamlian sung theampo uk tu in ngamkhen uk, za le kul panmun piak tu in khensat hi.
2 Tua banah, ukpite a lampui tu le kumpipa deina bang a seam tu in Darius in Daniel le a dang mihing nii teal thua hi.
3 Daniel in ngamkhen uk dangte, ahibuale nasep uk dangte sangin nasep a thiam zawkna sia hai ngawlin lak hi. Ama sia pil mama ahikom kumpipa in a kumpi ngamlian bup a uk tu in koi tu in ngaisun hi.
4 Tuasia ciang nasep uk dangte le ngamkhen uk tengin Daniel ii kumpi ngamlian uk nasepna encik a, a khialna zon tu hanciam uh hi. Ahihang Daniel sia muanhuai a, a thumaan le a citak khat ahikom amate in a khialna, a thumaan ngawlna mu zo ngawl uh hi.
5 Amate khat le khat kikum uh a, “Daniel sia a biakna taw kisai thu khat po taw, ahibuale mawsak natu thudang ih mu buatu hi,” ci uh hi.
6 Tuaciang amate kumpipa taw kimu tu in pai uh a, “Darius kumpipa awng, Nangma Kumpipa a tawntungin nungta ta'n!
7 Na kumpi ngamlian sungah naseam koma teng — nasep ukte, ngamkhen ukte, ngamkhen uk domte le a dang uliante — in kumpipa in ngat tak a zui tu thupiak khat nong suasak tu in thukim zo khu hi. Tu zo ni sawmthum sung teng Nangma Kumpipa tung simngawl, pathian khat pawpo, mihing khat pawpo tungah bangma peuma ngen thei ngawl tu hi, ci in thupia in. Hi thupiakna a paltan peuma tawpi a dim a kikhum dum sungah kikhia tu hi.
8 Tua ahiciang Nangma Kumpipa in hi thupiakna lai minthu in suaksak in. Tua hile tua thupiakna sia a kikheal thei ngawl Mede te le Persia te thukham suak tu hi,” ci uh hi.
9 Tuasia bangma in Darius kumpipa in tua thukham tungah a minthu hi.
10 Kumpipa thukham sia kumpipa in a minthu zo hi, ci thu Daniel in a heak ciang a inn ah cia hi. A inndawl tung inndoi khat sungah Jerusalem khua sang a maingat khelkite om hi. Tua munah, a vawt ngei tawntung bangma in, khelki kihongna te ah khupdin in ni khat sung thumvei veu Pathian tungah thungen hi.
11 Daniel ii a ngalte in Pathian tungah Daniel thunget a mu uh ciang,
12 a vekpi in Daniel mawsak tu in kumpipa kungah paikhawm tek hi. Amate in, “Kumpipa awng, tu zo ni sawmthum sung kumpipa tung simngawl, pathian khat pawpo tung, mihing khat pawpo tungah thungen khat a om peuma le tawpi a dim a, a kikhum dum sungah kilawn tu hi ci in thukham sungah na min na thu zo hi,” ci uh hi.
Kumpipa in, “Hi hi, tua in a kikheal thei ngawl a ngat thupiakna, Mede te le Persia te thukham khat ahi hi,” ci in zo kik hi.
13 Tua zawkciang amate in kumpipa tungah, “Judah salte khat ahi Daniel in Kumpipa Nangma hong zakta ngawl, na suasak thupiakna sia zui ngawl hi. Ama in ni khat sung thumvei peal ngawlin thungen hi,” ci uh hi.
14 Kumpipa sia hi thu a zaak ciang a thinnuam ngawl het a, Daniel a suatak thei natu lam khat a hi thei tawpin zong nuam hi. Nitum dong hanciamin khuangaisun hi.
15 Tuasia zawkciang Daniel ii ngalte kumpipa kungah pai kik a, ama tungah, “Kumpipa awng, nangma in Mede te le Persia te upadi te bangin kumpipa ii thu piaksa sia kikheal thei ngawl hi ci thu na he hi,” ci uh hi.
16 Tuasia ciang kumpipa in Daniel sia a mat natu le tawpi a dim a kikhum dum sungah a khiak natu in thupia hi. Kumpipa in Daniel munah, “Citakna taw a na, na sepsak na Pathian in nang hong suatak tahen,” ci hi.
17 Kuama in Daniel a suataksak thei ngawl natu in suangtum khat taw tawpi dum vang khakin, suang tungah kumpipa tazeik le a uliante ii tazeik khen uh hi.
18 Tua zawkciang kumpipa a inn ah cia kikin tua zanin mittang khat zongh si ngawl, an zongh ne ngawl, leangna do ngawlin om hi.
19 Zingsang khuavak tuungin kumpipa tho in, tawpi khumna dum ah pai hi.
20 Tua mun a thet ciang, “A nungta Pathian ii naseam Daniel awng! citakna taw a na, na sepsak na Pathian in tawpite kung pan hong hun thei ziam?” ci in thintoina taw biakpui hi.
21 Daniel in, “Kumpipa Nangma, a tawntungin nungta ta in!
22 Pathian in tawpite ii kei hong liamsua ngawl natu tawpite kam a hum tu in a vantunglalang sawl hi. Kumpipa awng ka maw ngawl hunlam le nang tungah kong khial ngawl hunlam Pathian in he a hikom hi bangin vawt hi,” ci in zo hi.
23 Kumpipa lungdam leilam a, tawpite khumna dum sung pan Daniel a kikaito natu in thupia hi. Tuabangin Daniel kaito uh a, liamna a nei vet ngawl hunlam mu uh hi, banghang ziam cile ama in Pathian muang hi.
24 Tua zawkciang kumpipa in Daniel a mawsak mihingte theampo mat tu in thupia a, a zite le a tate taw tawpi a dim dum sungah khiasuk hi. Dum taw a thet ma ngawngawn in, tawpi te in amate mat khat sua in a ngu a taang theampo duangleam hi.
25 Tua zawkciang Darius kumpipa in ngam theampo, minam theampo le paunam theampo pan mite tungah laithak hi:
“Kong nukset hi!
26 Ka kumpi ngamlian sung a om mihingte theampo in Daniel ii Pathian a kiitak natu le a zatak natu in thu ka pia hi.
“Ama in a nungta Pathian hi a,
a tawntungin uk tu hi.
A ngam kisiasak ngeingawl tu a,
a vaangletna bo ngeingawl tu hi.
27 Ama in ngum in suatak a;
vantung le leitung ah
a lamdangte le nalamdang laknate vawt hi.
Ama in Daniel sia
tawpite thalup natu pan suatak hi.”
28 Daniel sia Darius ii maan hun sung le Persia mi Cyrus ii maan hun sungin nuamsa hi.