1 Zan khat Belshazzar kumpipa in a uliante tulkhat samin anneak poaipi khat vawt a, sapittui nekhawm uh hi. 2 Sapittui a neak laitakin a pa Nebuchadnezzar ii Jerusalem Biakinnpi pan a laak khamh hai, ngunn haite le kuangte sungtan pui tu in thupia hi. Kumpipa in ama le a uliante, a zipite le a zinote taw sapittui a neak thei natu in tuate la in a sawl ahi hi. 3 Thakhat thu in khamh haite le kuangte kitumpui a, a vekpi in tuate taw sapittui ne in 4 khamh, ngunn, taau, thik, thing le suang taw a kivawt pathiante pok uh hi.

5 Thakhat thu in mihing khut khat kilangh a, meiinn mei a taangbelna mun, kumpi inn sung pang tungah lai at hong kipan hi. Kumpipa in lai a at tua khut sia mu hi. 6 Kumpipa lau mama in, a mai daang a, a khup liing tu kipan hi. 7 Ama in mitbum thiamte, bum le aitoaite le aksi enthiamte sam tu in oksan hi. Tua a sapte hong thet ciang, kumpipa in amate tungah, “Hi lai a ki at sia a sim thei, a khiakna hong son thei pawpo kumpi puantual sandup kisilhsak tu a, minphatna khamh khi a ngawng ah awsak in kumpi ngam sungah a zalian a thumna in ka koi tu hi,” ci hi. 8 Tua kumpi thudokte mai ah hong pai uh a, ahihang lai ki at sia a sim thei, a khiakna a son thei kuama om ngawl hi. 9 Belshazzar kumpipa sia a thinngimna taw in a mai daang vaial a, a uliante in a ci a law he ngawl hi.

10 Kumpipa ii nu in kumpipa le a uliante ngamlum lialuana aw za a an neakna inndoi sungah tum hi. Ama in, “Kumpipa awng a tawntungin nungta ta in! Nong hesuakna in thinnuam ngawlin maidaangin om heak in. 11 Na ngam sungah a thiangtho pathiante ii thaa a nei mihing khat om hi. Na pa kumpi ahi lai in, hi sia pa in, pathiante ii ciimna taw kibangin ciimna, heakna le ngaisut thiamna nei hi. Tuaciang na pa, Nebuchadnezzar kumpipa in ama sia aisaan theite, mitbum thiamte, bumtoai aitoaite le aksi enthiamte a ukpi tu in koi hi. 12 Ama sia a tumdang hi theina nei a, ciim in, mang khiak thei pilna, thu kheldoknate zo theina le thutumdangte sontel theina nei hi; tua ahikom kumpipa in Belteshazzar ci a, a min a phua pa Daniel sam in, tua hile ama in hite theampo ii khiakna hong sonthiang siat tu hi,” ci hi.

13 Daniel sia thakhatin kumpipa omna ah kipaipui a, kumpipa in Daniel tungah, “Judah ngam pan ka pa, kumpipa ii hi sungah hong pai pui Judah sal Daniel na hi na'am? 14 A thiangtho pathiante ii thaa sia na sungah om a thiamna, heakna le ciimna na nei hunlam ka za hi. 15 Hi a ki at lai a sim tu le a khiakna hong son tu in thudokte le mitbum thiamte hong kipaipui napi amate in a khiakna he zo ngawl hi. 16 Nangma in a khiakna kiphualsealte le thutumdangte sonthiang thei hi, ci in tu in ka za zo hi. Hi lai ki at sia na sim thei a, a khiakna nong son thei le, kumpipa puantual sandup hong kisilhsak tu a, minphatna khamh khi na ngawng ah aw in, kumpi ngam sungah a zanei a thumna na hi tu hi,” ci hi.

17 Daniel in, “Na letsongte nangma atu keam po in, ahibuale ngualdang khat po pia in. Kumpipa awng, lai ki at sia kong sim tu a, a khiakna kong son tu hi.

18 “Lianbel Pathian in na pa Nebuchadnezzar sia kumpi lian khat in koi a, zatakna le vaangletna pia hi. 19 Ama sia lian mama ahikom ngam theampo, minam theampo le paunam theampo pan mihingte in ama kiita in liing uh hi. Mihing khat pawpo a thatlum nuam le thatlum a, a nungtasak nuam le nungtasak hi. Ama in a upat nop pawpo upat a, a maimawlsak nop pawpo maimawlsak hi. 20 Ahizong ama sia kiphasak, thinpui, ngilo ahikom a kumpi tokhum pan kinot a, a minthanna taan hi. 21 Ama sia mihing huamsung pan kihawlkeak a, nganhing ngaisutna hong nei hi. Ama sia ngam laate taw teang khawmin, khuital bangin lopa ne a, daaitui dal tu nei ngawlin a pua sangah lum hi. Lianbel Pathian in mihingte ii kumpi ngam theampo uk a, ama ii dei pawpo tungah tua ngamuknate pia thei hi ci sia a khak belin ama in phawk hi.

22 “Ahihang nangma, a tapa in, hi thu theampo he hi napi na kiniamkhiak bua hi. 23 Vantung Topa na langpan a, a Biakinn pan na laak haite kuangte nong paipui hi. Nangma, na uliante, na zite le na zinote in tua haite taw zu ne in, khamh, ngunn, taau, thik, thing le suang taw a kivawt khuamu thei ngawl, khua za thei ngawl a, bangma a he ngawl pathiante na pok uh hi. Ahitazong na thi tu le na nun tu hong khensat a, na sep na vawt theampo hong uk Pathian na upat bua uh hi. 24 Tua hu in Pathian in hi kammalte at tu in tua khut sawl hi.

25 “Tua a ki at kammal in hi bang ahi hi: ‘MENE, MENE, TEKEL, U-PARSIN.’ ‘Sim, sim, khaitee, kikhen,’ a cina ahi hi. 26 A khiakna in hi bang ahi hi: ii a khiakna in Pathian in na kumpi ngam ii hunte hong simsak zo a, a hun bo zo hi; 27  ii a khiakna in nang sia toaitee na tungah hong kitee zo a, zaang leih in hong kimu hi. 28  ii a khiakna in na ngam kikhentham a Mede mite le Persia mite tungah kipia hi,” ci hi.

29 Thakhat ma in Belshazzar in Daniel sia kumpi puantual sandup silhsak tu le minphatna khamh khi a ngawng ah awsak tu in a naseamte thupia hi. Tuaciang ama in Daniel sia a ngam sungah zalian a thumna in koi hi. 30 Tua zan mama in Babylon kumpipa Belshazzar sia kithatlum a, 31 tua laitak kum sawmluk le kum nii a pha Mede mi Darius in a kumpi za suan hi.