4
Tungbealte sungah Thaa Sumngum
1 Pathian in ama ii hong hesuakna taw hi nasep tu hong pia ahikom ka thin uh a kiam bua hi.
2 Thuku theampo le a maizumhuai ngamtat nate theampo ka vawk uh hi; theamna taw na ka seam bua uh a, Pathian ii kammal zongh leilot thu ka suaksak bua uh hi. Pathian muna ah thumaanna ii a kicing khuavak sungah ka nungta uh a, mihing sim ii a pha in a tel thei natu ka hanciam uh hi.
3 Banghang ziam cile, kong hil uh lungdamna thu kiseal ahile a mangthangte mun pan bekma in a kiseal ahi hi.
4 Hi leitung pathian ngilopa in amate thinsung sia khuazing sungah keamcip ahikom um ngawl uh hi. Pathian taw a kibang linlian Christ ii minthanna huvau tua Lungdamna Thupha pan hong pai, amate tungah hong taang khuavak a mu thei ngawl natu in ama in vawt hi.
5 Banghang ziam cile, kote kong hil thu in koma ii thu ahi bua hi; Jesus Christ sia Topa hi ci in kong hil uh a, Jesus hangin note ii naseamte bang ka hi uh hi.
6 “Khuazing sung pan khuavak hong taang tu hi!” a ci Pathian sia ma in Christ ii maitang ah a taang Pathian ii vaangletna heak natu in kote thinsung ah a khuavak hong taangsak ahi hi.Ref 4:6 Pian 1:3
7 Ahitazong vaangletna lianbel sia Pathian neisa hi a, kote aa hi ngawl hi ci sia a kilak natu in thaa thu ah sumngum a nei kote sia tungbeal thawthong taw kibang khu hi.
8 Kote ngim nga nithi ka hi uh hang, ka lalcip bua uh a, khat vevei lungmang ka hi uh hang, thinkiam ngeingawl khu hi;
9 ngal tam mama a om hang ngualtamh sel ngeingawl khu hi. Khat vevei nasia takin hong kiliamsua kale hong kisusia zo ngawl hi.
10 Jesus ii nuntakna ka pumpi uh sungah a kimu thei natu in, ama thina sia, a thithei ka pumpi uh sungah ka vom top uh hi.
11 Hi a thithei ka pumpi uh pan ama ii nuntakna a kimu thei natu in, ka nuntak sung tawntung, Jesus hangin thi tu launa ka nei tawntung uh hi.
12 Thina in kote sungah na hong seam hi, ahihang nuntakna in note sungah na hong seam hi, cinopna hi.
13 Laithiangtho in, “Um ka hikomin ka son hi,” ci hi. Tua upna thin bangma in kote zongh in um ka hi uh hu in, ka son uh hi.Ref 4:13 Ps 116:10
14 Topa Jesus sia nuntakna sungah a thosak kik Pathian in kote zongh Jesus taw hong thotosak tu a, note taw kingawm in ama omna munah hong la khawm tu hi, ci in ka he uh hi.
15 Hite theampo sia note atu hi a; Pathian ii thuthiamna in mihing a tam vaialte tungah a thet ciangin, amate in Pathian minthan natu in lungdamko thungetnate a tamzaw nei tu uh hi.
Upna taw Nuntakna
16 Hi thu hu in kote ka thin uh a kiam ngei bua hi. Ih pumpi cii le sa sia dadam in muamuat ahihang ih thaa nuntakna sia ni khat zawk ni khat hong kithaksua hi.
17 Tuaciang, hi tawmvei hunsung ka thuak uh ngimna tawmnote in, tua ngimna sangin a tamzaw pek, a lian mama tawntung minthanna sungah kote hong then tu hi.
18 A kimu thei nate mitsuan ka hi bua uh a, a kimu thei ngawl nate hizaw hi. A kimu theite sia tawmvei sung bek kikhom a, a kimu thei ngawlte sia a tawntungin kikhom hi.