3
Kiciamna Thak ii A Naseamte
1 Tu a teng ih son ciang koma le koma a kisuangtaak kik bang hi nong sa uh ziam? Ngualdang pawlkhatte bangin note tungah piak tu ahizong, noma in ko tung a nong piak tu uh ahizong, kiheaksakna laite kul tu ziam?
2 Noma mama sia mihing theampo ii heak tu le sim tu in, kote lungtang tungah a ki at, ka nei uh laithak sia na hi uh hi.
3 Christ ama mama in hi laithak at in kote puak tu in hong thaak a hina thu kitel mama hi. Tua lai sia laitui taw ki at ngawlin, a nungta Pathian ii Thaa taw ki at a, suangpheak tungah ki at ngawlin, mihingte lungtang tungah ki at hi.Ref 3:3 Pu 24:12; Jer 31:33; Eze 11:19; 36:26
4 Christ tungtawnin Pathian ka muan uh manin hi bangin ka ci thei uh hi.
5 Hi nasep ka sep thei natu in koma sungah son ngam tu sep theina bangma ka nei bua uh hi. Tua sep theina ka nei uh sia Pathian kung panin hong pai ahi hi;
6 Lai taw ki at Thukham pan hi ngawl a, Thaa pan hong piang thuciamthak a tu in, hong seamsak thei sia ama ahi hi. A ki at thukham in thina piangsak a, ahihang Thaa in nuntakna pia hi.Ref 3:6 Jer 31:31
7 Thukham sia suangpheak tungah a kikhuak laimalte hi a, a kipiak laitakin, Pathian ii vaangletna kilangh hi. Moses ii maitang tungah a taang sia mial vaial ahihang nasia takin taang ahikom, tua laitak Israel mite in a maitang a salh zo bua uh hi. Thina hong puak Thukham in, ama hun sung tua za in vaangletna taw hong pai ahile, Ref 3:7 Pu 34:29
8 Thaa ii tukna le dianna taw kisai vaangletna in bangza in nasia zaw tu ziam!
9 Kimawsakna a piangsak thu sia vaanglian ahile; ngupna a piangsak sia ii tukna le dianna sia bangza in vaanglian zaw tu ziam!
10 Tua vaangletna a taangzaw pek sia hangin a bosa hunsung a, a taang mama ii vaangletna sia a bo zo hi, kici thei hi.
11 Banghang ziam cile, tawmvei sung bek a kikhom sia sungah vaangletna om ahile a tawntungin a kikhomsuan vaangletna sia bangza in tamzaw kan tu ziam!
12 Hi lametna ka nei uh hu in, kote ka hang mama uh hi.
13 Kote in a maitang pan a vaangletna, a mial vaial in a bona sia Israel mite ii mu ngawl natu in, dial taw a maitang a seal, Moses bang ka hi bua uh hi.Ref 3:13 Pu 34:33
14 Amate thinsung kikhak takpi hi; amate in thuciamlui thubute a sim uh ciang tuni dongin, tua dial in a thinsung uh siin lai hi. Mihing khat in Christ taw a kizop ciang bek in, tua dial sia kihepsak hi.
15 Tuni ngawngawn dongin Moses Thukham a sim uh ciangin tua dial in amate thinsung siincip lai hi.
16 Ahihang kiheam thei hi. Moses thu laithiangtho sungah: “Topa sang ah a kiheak ciangin ama dial sia kiheam hi,” ci hi.Ref 3:16 Pu 34:34
17 Tu in hi lai sungah “Topa” ci in a ki at sia Thaa ahi hi; Topa ii Thaa omna munah suatakna om hi.
18 Tua ahikom eite theampo in, a kisiin ngawl maitangte taw Topa vaangletna kilanghsak vun. Thaa ahi Topa kung pan hong pai tua vaangletna sia ma in a nasia vaial vaangletna sungah ama ii pianzia bangin eite hong kheal hi.