23
1 Paul in Council te tangtan in en a, “Ka Israel mipuite awng! Pathian mai ah ka nuntakzia sia tuni mama dong ka thin thiangtho a, kithasunna nei ngawl khi hi,” ci hi.
2 Thiampi Lianbel Ananias in, Paul nai ah a dingte munah, a muk beksak vun, ci in sawl hi.
3 Paul in, “Pathian in note hong vel tatak tu hi — no leikaang taw a kizut innpangte awng! Thukham taw kizui in, kei thu hong khen tu in, tuak ah na to uh a, ahihang kei vel tu a, na kisawl uh ciangin, Thukham paltan na hi uh hi!” ci hi.Ref 23:3 Mt 23:27-28
4 “Pathian Thiampi Lianbelpa selno ni hi!” ci in Paul kungah a om pasalte in ci uh hi.
5 Paul in “Ka Israel mipuite awng, ama Thiampi Lianbel ahi hunlam ka he bua hi. Laithiangtho in, ‘Note ii na mite a ukpa sia sonsia thei ngawl tu nu hi,’ ci hi,” ci in zo kik hi.Ref 23:5 Pu 22:28
6 Tuate sungah pawlkhat Sadducee te hi a, a dangte sia Phariseete hi ci in, Paul in a mu ciangin, Council te tungah, “Ka Israel mipuite awng! Kei in Pharisee te suan Pharisee khat ka hi hi. Hi sungah thusit ka thuak theina ii ahang sia mithi sa te tho kik tu hi, ci in lametna ka nei hang ahi hi!” ci hi.Ref 23:6 Sawl 26:5; Php 3:5
7 Hi thu a son po ciangin, Phariseete le Sadducee te kihau tu in, hong kipan paih a, tuaciang, Council upate sia hong kikhen hi.
8 Banghang ziam cile Sadducee te in thina panin mihingte tho kik ngawl tu hi, tuaciang, vantunglalang ahizong, thaa ahizong om ngawl hi, ci uh hi; ahihang Phariseete in, hi thu nam thum teng sia um siat hi.Ref 23:8 Mt 22:23; Mk 12:18; Lk 20:27
9 Auna aw nging vaial a, Pharisee pawl mi Thukham hil sya pawlkhat hong ding a, nasia takin nalh uh hi: “Hisia pa tungah bangma khialna mu zo ngawl khu hi! Vantunglalang khat ziam, thaa khat ziam in, ama paupui takpi hi thei tu hi!” ci uh hi.
10 Kam kinialna uh a aw hong ngam vaial a, ngalkap hon ukpa in, Paul pumpi mama a kilaaithap tu lau hi. Tua ahikom tu a mipawlte sungah ngalkapte paisak a, amate kung pan Paul la keak in, ngalkap huang sungsang ah paipui uh hi.
11 A zan ciangin, Topa in Paul kungah ding a, “Lau heak in! Hi sung Jerusalem ah kei atu tetti pang zo ni hi, Rome khua sung zongh ah tuabang ma in, seam nanak lai tu ni hi,” ci hi.
Paul Suamlup Kisawm
12 A zingsang ciangin Jew te pawlkhat kisitua in, ngealna khat nei uh hi. Amate in Paul a thalup mateng in an le tui ne ngawl tu hi, ci in kiciamna vawt uh hi.
13 Hi bangin a ngeal khawmte mihing sawmli vaal pha uh hi.
14 Tuaciang amate in thiampi liante le upate kungah pai a, “Paul ka thalup uh mateng bangma ne ngawl tu, ci in thupi takin, ka kiciam uh hi.
15 Tuaciang, tu in, noma le Council te in, Paul ii thu a maanzaw a kan nuam bangin, nong kiheang tu uh a, Rome ngalkap hon ukpa munah Paul hong paipui suk natu in na son tu uh hi. Ahihang hisung hong thet suk ma in, ama thatlum tu in ka kingingkhol tu uh hi,” ci uh hi.
16 Ahihang Paul suapuinu ii tapa in, hi kisuam nopna thu za hi; tua ahikom kulh huang sungah pai in a thu bang teng Paul munah son hi.
17 Tuaciang Paul in ngalkap bute khat sam a, “Ngalkap hon ukpa kungah hi tangvalpa paipui ta'n; ngalkap hon ukpa munah son tu thu khat ama in nei hi,” ci hi.
18 Ngalkap bupa in paipui in, ngalkap hon ukpa kung then a, “Thongtaak Paul in hi tangvalpa nang kungah paipui tu in hong sawl hi. Banghang ziam cile ama in nang tungah son tu thu khat nei hi,” ci hi.
19 Ngalkap hon ukpa in a khut panin len a, ama mama in paipui in, “Kei tung nong son tu, bang thu nei ni ziam?” ci in dongh hi.
20 Ama in, “Jew upa thuneite in, thukimna khat nei a, Paul ii thu a maan zaw kan nuam bangin, kivawt theam in, Council te kungah Paul na paipuisuk natu in, zing ciang hong ngen tu hi.
21 Ahihang amate thu na um heak in, banghang ziam cile mihing sawmli vaal in, ama pangin ngak tu uh hi. Ama a thalup mateng, anne ngawl tuidawn ngawlin, om tu in kiciamna vawt zo hi. Tu in amate in tuabang vawt tu in, kingingta zo a, nangma thukhensatna hong ngak lai hi,” ci hi.
22 Ngalkap hon ukpa in, “Hi thu teng nong ko hunlam kuama tungah son heak in,” ci in tangvalpa ciasak hi.
Paul sia Ngamuk mangpa Felix kungah Puak
23 Tua zawkciangin, ngalkap hon ukpa in, ngalkapbu nii sam a, “Tu nitak nai kua in ngalkapte zanii Caesarea ah pai tu in, kithoaisak vun a, tuate taw a kop tu in, siphu ngalkap sawmsali le tei toai zanii taw a ding tu in kithoaisak vun,
24 Paul to natu siphu pawlkhat zongh, vaihawmsak tavun a, ngamuk mangpa Felix kungah a pha takin then tavun,” ci hi.
25 Tua zawkciangin, ngalkap hon ukpa in, hi bangin lai khat at hi.
26 “Claudius Lysias in a zatak huai ngamuk mangpa Felix kong paupui hi.
27 Jew te in hisia pa man a, thatlum tu in kithoai hi. Ama sia Rome ngammi khat hi ci in ka heak hu in, ka ngalkapte taw pai in ka suatak uh hi.
28 Amate in bang teng mawsak nuam ziam ci in ka heak nopna taw amate ii Council ah ka paipui suk hi.
29 Kei muna pan ama in thi natu ahizong, thongtaak natu ahizong, a thuak natu za dongin ngamtat khialna bangma nei ngawl hi; a maw zonna uh sia amate thukham taw bek kisai ahi hi.
30 Tuaciang Jew te pawlkhat in a thasawmna uh ka zaak ciangin, nangma kungah puak tu in thakhat thu in ka khensat hi. Ama a mawsakte munah, ama sia nangma mai ah thu vawt tavun ka ci hi,” ci hi.
31 Ngalkapte in thupiaknate seam suak uh hi. Amate in, Paul la a, tua nitakin, Antipatris dong paipui uh hi.
32 A zing ciangin peang a pai ngalkapte sia kulh huang ah heak kikin, siphu ngalkapte taw paisuak tu in aap uh hi.
33 Amate in Caesarea ah paipui uh a, ngamuk mangpa lai pia in, Paul sia ama tungah aap uh hi.
34 Ngamuk mangpa in, laithak sim a, Paul munah bang ngamkhen sung pan ni ziam ci in dongh hi. Cilicia ngam pan ahi hunlam a tel ciangin,
35 ama in “Thu hong sua nuamte hong thet ciangin, na thu kong sit tu hi,” ci hi. Tua zawkciangin ama in, Paul sia ngamuk mangpa phualpi ah a cingte taw a kikoi natu thupia hi.