22
1 “Ka mipui Jew te awng, note mai ah keima le keima ka kihuukna kammalte hong ngai tavun!”
2 Hebrew kam in a pau a zaak uh ciang, amate thim seseam uh hi; tuaciang Paul in zom to lai a:
3 “Kei sia Jew mi khat hi in, Cilicia ngam Tarsus khua ah ka suak a, ahihang hi sung Jerusalem ah, Gamaliel ii sangpatang khat in a khangto ka hi hi. Ih taanghpupite ii nasia takin Thukham kihil nate, ka sin zo hi, tuaciang tuni in hi sungah a om no theampo taw ma kibangin, kei zongh Pathian atu a ki aap mama pa ka hi hi.Ref 22:3 Sawl 5:34-39
4 Hi Lampi a zuite sia a thi dongin, a vawtsiapa ka hi hi. Pate le numeite manin, thong sung denna in, a neipa ka hi hi.Ref 22:4-5 Sawl 8:3; 26:9-11
5 Thiampi Lianbelpa le Council buppi in, ka son teng sia, thumaan hi ci in hong lak thei tu hi. Amate kung panin, Damascus a om, ih mipui Jew te a laithakte zongh keima in ka nga hi. Tua ahikom, tua munah a om hi mite man tu in ka pai a, tuaciang amate thikkol bul sa in, Jerusalem ah daan piak tu in ka ciapui kik hi.
Paul in A Kikhealna Thuson
(Sawl. 9:1–19; 26:12–18)
6 “Tuabangin khualhaw a, Damascus khua ka thet dektak sunkim laitak hun khawngin, thakhat thu in van pan, a taang mama khuavak khat in ka kiimkot hong taankeak hi.
7 Lei ah ka puk a, ‘Saul, Saul awng! Banghangin kei hong vawtsia ni ziam?’ hong cina aw khat ka za hi.
8 ‘Akua ni ziam Topa?’ ci in ka dongh hi. ‘Keima in nong vawtsiat Nazareth khua mi Jesus ka hi hi,’ hong ci hi.
9 Kei taw a omkhawm mite in, khuavak taang sia mu ahihang, kei hong paupuipa aw a za bua uh hi.
10 ‘Bang vawt tu khi ziam, Topa’ ci in ka dok ciangin, Topa in kei tungah, ‘Tho in a, Damascus khua sungah va pai ta'n, tua munah Pathian ii nangma sep tu hong seesak theampo hong kison tu hi,’ hong ci hi.
11 khuavak taang mama sia hu in, ka mit hong taw a, tua ahikom ka kitholpuite in, Damascus khua sung dong ka khut panin, hong len a hong paipui hi.
12 “Tua khuapi sungah Ananias minnei pasal khat om a, ama sia biakna mi Thukham a zui tua munah a teang Jew te theampo ii a zatak pa ahi hi.
13 Ama hong pai a ka kungah dingin, ‘Suapui Saul awng, khuamu kik in!’ hong ci hi. Tua hun lian laitakin, khua ka mu thei kik a, ama ka en hi.
14 Ama in, ‘Ih taanghpupite ii Pathian in, ama deina a tel tu, a thutang a Naseampa a mu tu le ama aw taw a pau a za tu in nang hong teal zo hi.
15 Banghang ziam cile na mu le na zaak teng mihing theampo tungah a son tu in nang sia ama ii tetti khat na hi tu hi.
16 Tu in banghang ngangak lai ni ziam? Tho in a, tui kiphumin, ama tung thungetna taw, na mawnate, kisilthiangsak in,’ hong ci hi.
Gentile te tungah Thuhil tu in Paul Kisam
17 “Jerusalem khua ah ka cia kik a, Biakinn sungah thungen in ka om laitakin, mukholna khat ka nei a,
18 tua ii sungah Topa ka mu a, ama in, ‘Manlang takin Jerusalem nusia zok in, banghang ziam cile hi sungah a om mihingte in, kei huvau tetti na pan nate hong saang ngawl tu hi,’ hong ci hi.
19 ‘Topa awng, synagogue te ah ka pai a, nang hong umte manin ka vel bul sia, amate in pha takin hong he nginge hi.
20 Tuaciang, na tettipa Stephen a kithalup lai in keima mama zongh tua munah ka om a, a thalup tu thukim in, a thatte ii puantualte zongh kepsak lai khi hi,’ ci in ka zo hi.Ref 22:20 Sawl 7:58
21 Kei tungah Topa in ‘Va pai ta'n,’ ‘banghang ziam cile a khualana Gentile te kungah kong puak tu hi,’ hong ci hi.
22 Paul ii hi bang teng a son ciang dong, amate in ngai uh hi; ahihang tua zawkciangin, amate in a aw nei za taw au a, “Ama heam vun! Thatlum vun! A nungta tu in kilawm ngawl hi!” ci uh hi.
23 Amate in ciik au uh a, a puansilh uh vik in, vui sungah leivui lawn uh hi.
24 Rome ngalkap hon ukpa in Paul sia kulh huang sungah paipuisak in, banghangin Jew te in hi bangin, ciik au in oksan ziam ci sia a kiheak thei natu ama vel in thu dongh tavun, ci in a mite thupia hi.
25 Ahihang vel tu in a sawmcip uh ciang, a kung a ding ngalkap bupa munah Paul in, “Rome ngammi khat sia khialna lian khat pawpo atu thu kisit pepeu ngawl lai in, vel tu sia, no atu upadi taw kisi na ziam?” ci in dongh hi.
26 Ngalkap bupa in tua thu a zaak ciang, ngalkap hon ukpa kungah pai in “Bang law tu ni ziam? Tuasia pa sia Rome ngammi khat hi!” ci hi.
27 Tua ahikom ngalkap hon ukpa Paul kungah pai in, “Hong son ta'n, Rome ngammi khat na hi ziam,” ci in dongh hi.
“Hi khi hi,” ci in Paul in zo hi.
28 Ngalkap hon ukpa in, “Sum tam mama ka piak ciangin kei zongh ngammi khat ka suak thei pheang hi,” ci hi.
Paul in “Ahihang kei ka hile ka pian panin Rome ngammi khat khi hi,” ci in zo hi.
29 Thakhat thu in, Paul thu a dongh tute ama kung pan heak kik uh hi; Paul sia Rome ngammi khat hi ci in a heak ciang, thikkol a bulsak huvau ngalkap hon ukpa patau hi.
Council mai ah Paul
30 Ngalkap hon ukpa in, Jew te in Paul sia bang teng tatak taw mawsiat ziam, ci in he nuam hi; tua ahikom a zing ciangin, a thikkol suusak a, tuaciang thiampi liante le Council bup kikhop natu in, thupia hi. Tuaciang, ama in Paul paipui a, amate mai ah dingsak hi.