လံာ်တၢ်သးဝံၣ်တဖၣ်အတၢ်သးဝံၣ်
SONG OF SONGS
လံာ်တၢ်သးဝံၣ်တဖၣ်အတၢ်သးဝံၣ်မ့ၢ်တၢ်အဲၣ်တၢ်ကွံ အထါတဖၣ်လၢအပိာ်ထွဲလိာ်အခံတမံၤဘၣ်တမံၤ, ဒီးအါဒၣ်တၢ်တက့ၢ်, မ့ၢ်တၢ်သးဝံၣ်အက့ၢ်အဂီၤတဖၣ်လၢပိာ်ခွါ တဂၤသးဝံၣ်ဝဲဆူပိာ်မုၣ်တဂၤအအိၣ်, ဒီးပိာ်မုၣ်တဂၤဆူပိာ်ခွါတဂၤအအိၣ်န့ၣ်လီၤ. လၢတၢ်ကွဲးကျိးထံတနီၤနီၤအပူၤန့ၣ်, လံာ်အံၤဘၣ်တၢ်ကိးအီၤလၢစီၤၡလိၤမိၤအတၢ်သးဝံၣ်, မ့ၢ်လၢတၢ်ပာ်အီၤဒ်အမ့ၢ်စီၤၡလိၤမိၤအတၢ်, လၢဧ့ၤဘြံၤ အတၢ်ကွဲးအပူၤအဃိလီၤ.
ပှၤယူဒၤဖိတဖၣ်ညီနုၢ်ထုးထီၣ်တၢ်သးဝံၣ်တဖၣ်အံၤအခီ ပညီဒ်တၢ်အဒိအတဲာ်တမံၤလၢကစၢ်ယွၤဒီးအပှၤဂီၢ်မုၢ် အတၢ်ရ့လိာ်ဘၣ်ထွဲအဘၢၣ်စၢၤန့ၣ်လီၤ. မ့မ့ၢ်ပှၤခရံာ်ဖိတဖၣ်ထုးထီၣ်ဝဲအခီပညီဒ်တၢ်အဒိအတဲာ်တမံၤ လၢခရံာ်ဒီးအတၢ်အိၣ်ဖှိၣ်အတၢ်ရ့လိာ်ဘၣ်ထွဲ, အဘၢၣ်စၢၤန့ၣ်လီၤ.
1
1 တၢ်သးဝံၣ်တဖၣ်အကျါအမုာ်ကတၢၢ်, တဖၣ်လၢစီၤၡလိၤမိၤ,
ပိာ်မုၣ်
2 နထးခိၣ်အတၢ်နၢမူတဖၣ်လုၣ်ဘၢယၤ,
အဂ့ၢ်ဒ်အံၤ, နတၢ်အဲၣ်ဂ့ၤဒိၣ်န့ၢ်ဒံးစပံးထံတက့ၢ်လီၤ.
3 သိလၢနဖှူအီၤန့ၣ်နၢမူဝဲ, ဒီးနမံၤမၤအသးဒ်သိနၢမူလၢအလူလီၤ အသးအသိးန့ၣ်လီၤ.
မၤသးဒ်န့ၣ်ဒီး, ပှၤပိာ်မုၣ်တအဲၣ်နၤအိၣ်တကဲနီတဂၤဘၣ်.
4 ကိးဃုာ်ယၤတက့ၢ်, ဒီးပကဃ့ၢ်ပိာ်လိာ်ပခံလီၤ.
မ်နကဲထီၣ်ယစီၤပၤ, ဒီးကိးနုာ်ယၤဆူနဒၢးပူၤတက့ၢ်.
ပကမုာ်လၤသးခုဒီးမၤလၢာ်ပဆၢကတီၢ်လၢတၢ်အဲၣ်ယိာ်အပူၤ
အါန့ၢ်ဒံးလၢစပံးထံအပူၤတက့ၢ်လီၤ.
ပှၤပိာ်မုၣ်ခဲလၢာ်အဲၣ်နၤန့ၣ်တလီၤကမၢကမၣ်ဘၣ်.
5 ဝ့ၢ်ယရူၤၡလ့ၣ်အဖိမုၣ်သ့ၣ်သုဧၢ, ယသူဘၣ်ဆၣ်ဒီးယဃံလၤယဲဒၣ် န့ၣ်လီၤ.
ယသူဒ်ပှၤက့ဒၢ်ဖိအဒဲတဖၣ်လၢမဲးမုၢ်ခိၣ်,
ဘၣ်ဆၣ်ဃံလၤယဲဒ်ယၣ်ဘျးသဒၢတဖၣ်, လၢစီၤၡလိၤမိၤအနူၢ်ပူၤအသိးန့ၣ်လီၤ.
6 လၢယဖံးယညၣ်သူအဃိဒီးကွၢ်တလီၤယၤတဂ့ၤ.
အဂ့ၢ်ဒ်အံၤ, မုၢ်ကိၢ်သွၣ်ဘၣ်ယၤလီၤ.
ယဒီပုၢ်ဝဲၢ်ခွါတဖၣ်သူၣ်ဒိၣ်သးဖျိးယၤ,
ဒီးမၢယမၤတၢ်လၢစပံးအလီၢ်လီၤ.
တၢ်ဆၢကတီၢ်တအိၣ်နီတစဲးလၢယကကွၢ်လီၤယသးအဂီၢ်ဘၣ်.
7 ယတၢ်အဲၣ်ဧၢ, တဲယၤလၢနကလဲၤဒုးအီၣ်နသိတဖၣ်အဆၣ်ဖဲလဲၣ်,
ဒီးနကဒုးအိၣ်ဘှံးအဝဲသ့ၣ်လၢမုၢ်ထူၣ်အဆၢကတီၢ်န့ၣ်ဖဲလဲၣ်.
ဘၣ်မနုၤလၢယကဘၣ်ဟးဝ့ၤဝီၤဒီးဃုနၤလၢသိအဂၤတဖၣ်အပှၤကွၢ် သိအကျါန့ၣ်လဲၣ်.
ပိာ်ခွါ
8 မုၣ်ကနီၤလၢအဃံလၤကတၢၢ်တဂၤဧၢ, နတသ့ၣ်ညါတၢ်လီၢ်ဘၣ်ဧါ.
လဲၤဒီးပိာ်ထီၣ်သိမဲာ်တဲးလဲးအဖုအဂီၢ်အခံ,
ဒီးဃုထံၣ်တၢ်အီၣ်ဆၣ်အလီၢ်လါဟ့လၢ အဝဲသ့ၣ်အဂီၢ်
ဘူးဒီးပှၤကွၢ်သိအဒဲတဖၣ်အဃၢၤန့ၣ်တက့ၢ်.
9 ယတၢ်အဲၣ်သးဘိဧၢ, မၤကတၢသူၣ်ကတၢသးထီၣ်ပိာ်ခွါတဖၣ်,
ဒ်ကသ့ၣ်မိၢ်တဒုအသိးလၢအထိၣ်ဟူးထိၣ်ဂဲၤထီၣ် စီၤပၤဖၤရိၤအလ့ၣ်ကဟၣ်အကသ့ၣ်ဒုးသုးတဖၣ်တက့ၢ်.
10 နခိၣ်သူလၢအလီၤစဲၤလၢနဘိးပၤအလိၤတဖၣ်န့ၣ်မၤဃံမၤလၤထီၣ် နဘိးပၤ,
ဒီးလၢအလီၤစဲၤလၢနကိာ်ကျၤခံတဖၣ်န့ၣ်လီၤဂာ်ဒီးဖဲအဝီတဖၣ် လၢတၢ်မၤအီၤလၢလၢၢ်လုၢ်ဒိၣ်ပှ့ၤဒိၣ်တဖၣ်လီၤ.
11 ဘၣ်ဆၣ်ဒီးပကပိာ်န့ၢ်နၤဖဲထူတပျံၤ
ဒီးတၢ်ကယၢကယဲတဖၣ်လၢတၢ်မၤအီၤလၢစ့န့ၣ်လီၤ.
ပိာ်မုၣ်
12 ယစီၤပၤမံနီၤလၢအလီၢ်ဆ့ၣ်နီၤခးအလိၤ,
ဖဲယတၢ်နၢမူနၢ်ဒူး, နၢမူထီၣ်လၢကလံၤကျါလီၤ.
13 ပှၤလၢယအဲၣ်အီၤတဂၤနၢမူဒ်မူရၣ်အသိး,
ဖဲအဝဲမံနီၤလၢယနုၢ်ကဆူးပူၤန့ၣ်လီၤ.
14 ပှၤလၢယအဲၣ်အီၤတဂၤလီၤဂာ်ဒ်သ့ၣ်ဂီၤစုမ့ၣ်တကရူၢ်အသိး, လၢအဘိၣ်ထီၣ်ဖးထီၣ်ဖဲဧ့ၣ်က့ဒံၤစပံးအလီၢ်တဖၣ်လီၤ.
ပိာ်ခွါ
15 နဃံနလၤဆံးဒိၣ်လဲၣ်, ယတၢ်အဲၣ်ဧၢ,
နမဲာ်ချံတဖၣ်ကတြ့ၣ်ကတြိၣ်ဒ်ထိၣ်လွံၢ်အမဲာ်ချံတဖၣ်လၢအပှဲၤ ဒီးတၢ်အဲၣ်အသိးလီၤ.
ပိာ်မုၣ်
16 ယပှၤသးဘိဧၢ, နက့ၢ်နဂီၤတဖၣ်ဃံလၤဆံးဒိၣ်လဲၣ်,
နမၤသးခုယၤဆံးဒိၣ်လဲၣ်,
နီၣ်လါဟ့ကမ့ၢ်ပမံနီၤအလီၢ်,
17 သ့ၣ်ဆှိအ့ရ့းကမ့ၢ်ပဟံၣ်အတၢ်တီတဖၣ်,
ဒီးသ့ၣ်ဆှိကမ့ၢ်ပဟံၣ်ခိၣ်ဒုးလာ်န့ၣ်လီၤ.