7
(၁ကွဲး.၁၇:၁-၁၅)
1 စီၤပၤဒၤဝံးအိၣ်ဂၢၢ်ဆိးကျၢၤဝဲလၢအနူၢ်ပူၤစီၤပူၤဒီး ယွၤကဟုဘံၣ်ကယာ်ဘၢအီၤပူၤဖျဲးဒီးကယဲၢ်အဒုၣ်အဒါတဖၣ်န့ၣ် လီၤ.
2 တုၤနုၤတစုစီၤပၤစံးဘၣ်ဝံနၤသၣ်, “ယအိၣ်ဆိးဖဲအံၤလၢ ဟံၣ်တဖျၢၣ်လၢအဘၣ်တၢ်ဘှီထီၣ်အီၤလၢသ့ၣ်ဆှိအ့ရ့းအပူၤလီၤ. မ့မ့ၢ်ကစၢ်ယွၤအတၢ်အၢၣ်လီၤအီလီၤအတလါစီဆှံန့ၣ်ဘၣ်တၢ်ပာ် အီၤလၢဒဲတဖျၢၣ်အပူၤလီၤ.”
3 စီၤနၤသၣ်စံးဆၢဝဲ, “ကယဲၢ်တၢ်တမံၤလၢ်လၢ်လၢအအိၣ်လၢနသးပူၤန့ၣ်မၤအီၤတက့ၢ်. အဂ့ၢ်ဒ်အံၤ, ယွၤအိၣ်ဒီးနၤလီၤ.”
4 ဘၣ်ဆၣ်ဒီးမုၢ်နၤအဝဲန့ၣ်ယွၤစံးဘၣ်စီၤနၤသၣ်,
5 “လဲၤဒီးတဲဘၣ်ယခ့ယပှၤစီၤဒၤဝံးလၢယစံးဘၣ်အီၤဒ်အံၤ, နတမ့ၢ်ပှၤတဂၤလၢကဘၣ်သူၣ်ထီၣ်တၢ်လုၢ်ဟံၣ်တဖျၢၣ်လၢယကအိၣ်လၢ အပူၤန့ၣ်ဘၣ်.
6 စးထီၣ်မုၢ်တနံၤလၢယမၤပူၤဖျဲးတ့ၢ်ကီၢ်အံၣ်စရ့လးအပှၤဂီၢ် မုၢ်လၢကီၢ်အဲၤကူပတူးအပူၤတုၤခဲကနံၣ်တစုန့ၣ်ယလဲၤဝ့ၤဝီၤ တၢ်ဒီးအိၣ်ဆိးလၢဒဲတဖျၢၣ်အပူၤန့ၣ်လီၤ.
7 လၢကယဲၢ်ယတၢ်လဲၤဃုာ်တၢ်ဒီးကီၢ်အံၣ်စရ့လးအပှၤဂီၢ်မုၢ်အပူၤန့ၣ်, ယတသံကွၢ်ဘၣ်ပှၤခိၣ်ပှၤနၢ်တဂၤဂၤလၢယဃုထၢပာ်လီၤအီၤနီတစုလၢ, ဘၣ်မနုၤအဝဲသ့ၣ်တသူၣ်ထီၣ်န့ၢ်ယၤတၢ်လုၢ်ဟံၣ်တဖျၢၣ် လၢအဘၣ်တၢ်ဘှီထီၣ်အီၤလၢသ့ၣ်ဆှိအ့ရ့းလဲၣ်, န့ၣ်ဘၣ်.
8 လၢတၢ်န့ၣ်အဃိတဲဘၣ်ယခ့ယပှၤစီၤဒၤဝံလၢယၤ, ယွၤသ့တၢ်လၢာ်စံးဘၣ်အီၤဒ်အံၤ, ယဟံးထီၣ်နၤလၢတၢ်ကွၢ်ထွဲသိဖိတဖၣ် လၢပျီတဖၣ်အပူၤဒီးဒုးကဲထီၣ်နၤလၢပှၤပၢဘၣ်ယပှၤ ဂီၢ်မုၢ်အံၣ်စရ့လးန့ၣ်လီၤ.
9 ယအိၣ်တ့ၢ်ဒီးနၤဖဲနလဲၤတၢ်တပူၤလၢ်လၢ်ဒီးယမၤနၢၤတ့ၢ်ကယဲၢ် နဒုၣ်နဒါခဲလၢာ်ဖဲနလဲၤထီၣ်ဒုးတၢ်န့ၣ်လီၤ. ယကဒုးမံၤဟူသၣ်ဖျါနၤထဲသိးခိၣ်နၢ်အဒိၣ်ကတၢၢ်တဖၣ် လၢဟီၣ်ခိၣ်ချၢန့ၣ်လီၤ.
10 ယဃုထၢတ့ၢ်တၢ်လီၢ်တတီၤလၢပှၤဂီၢ်မုၢ်အံၣ်စရ့လးအဂီၢ် ဒီးသူၣ်လီၤဆီလီၤအဝဲသ့ၣ်ဖဲန့ၣ်, ဖဲအဝဲသ့ၣ်ကအိၣ်ဆိးဝဲ တအိၣ်ဘၣ်ဒီးတၢ်မၤအၢမၤနးအီၤနီတစုဘၣ်န့ၣ်လီၤ. စးထီၣ်လၢအဝဲသ့ၣ်နုာ်လီၤဆူကီၢ်အံၤအပူၤလံၤလံၤန့ၣ်, အဝဲသ့ၣ်ဘၣ်တၢ်ဒုးအီၤလၢပှၤမၤတၢ်လၢတၢ်စုဆူၣ်ခီၣ်တကးအပူၤ တဖၣ်လီၤ.
11 ဘၣ်ဆၣ်ဒီးတၢ်အံၤတမၤကဒီးအသးလၢၤဘၣ်. ယအၢၣ်လီၤအီၤလီၤလၢယကကဟုကယာ်နၤလၢနဒုၣ်နဒါခဲလၢာ်, ဒီးဟ့ၣ်လီၤနၤလၢနစၢၤနသွဲၣ်တဖၣ်န့ၣ်လီၤ.
12 ဖဲနသံဒီးဘၣ်တၢ်ခူၣ်လီၤကွံာ်နၤဃုာ်ဒီးနမိၢ်ပၢ်ဖံဖုလၢ ပျၢၤတဖၣ်န့ၣ်, ယကဒုးကဲထီၣ်နဖိခွါတဖၣ်အကျါတဂၤ လၢစီၤပၤဒီးဒုးဆူၣ်ထီၣ်အဘီအမုၢ်န့ၣ်လီၤ.
13 အဝဲကမ့ၢ်ပှၤတဂၤလၢကသူၣ်ထီၣ်တၢ်လုၢ်ဟံၣ်တဖျၢၣ်လၢယဂီၢ်ဒီး ယကမၤလီၤတံၢ်လၢအဝဲအစၢၤအသွဲၣ်ကပၢတၢ်ဆူညါလီၤစိၤလီၤထီန့ၣ်လီၤ.
14 ယကမ့ၢ်အဝဲအပၢ်, ဒီးအဝဲကမ့ၢ်ယဖိခွါလီၤ. ဖဲအဝဲမၤကမၣ်တၢ်န့ၣ်ယကစံၣ်ညီၣ်အီၤဒ်ပၢ်တဂၤစံၣ်ညီၣ်အဖိခွါ အသိးန့ၣ်လီၤ.
15 ဘၣ်ဆၣ်ဒီးယတထုးကွံာ်ဘၣ်ယတၢ်ဆီၣ်ထွဲမၤစၢၤအီၤဒ်ယမၤဘၣ်တ့ၢ် စီၤစီလူး, ပှၤတဂၤလၢယသုးကွံာ်အီၤဒ်သိးနကဲထီၣ်စီၤပၤကသ့အဂီၢ်, အသိးန့ၣ်ဘၣ်.
16 နကအိၣ်ဒီးနစၢၤနသွဲၣ်တဖၣ်ထီဘိ, ဒီးယကဒုးအိၣ်ဂၢၢ်ဆိးကျၢၤ နဘီနမုၢ်လီၤထူလီၤယိာ်လီၤ. နစၢၤနသွဲၣ်အတၢ်ပၢတၢ်ပြးန့ၣ်အကတၢၢ်တအိၣ်ဘၣ်နီတစု ဘၣ်.”
17 စီၤနၤသၣ်တဲဘၣ်စီၤဒၤဝံး, ကယဲၢ်တၢ်ကိးမံၤဒဲးလၢကစၢ်ယွၤ လီၣ်ဖျါထီၣ်န့ၢ်အီၤန့ၣ်လီၤ.
(၁ကွဲး.၁၇:၁၆-၂၇)
18 တုၤနုၤတစု, စီၤပၤစီၤဒၤဝံးလဲၤနုာ်ဆူယွၤအဒဲစီဆှံလၢ ယွၤအိၣ်ဝဲဆိးဝဲအပူၤ, ဆ့ၣ်နီၤဝဲဒီးဘါထုကဖၣ်ဝဲ, “ယွၤ, ပၢဘၣ်တၢ်ခဲလၢာ်ကစၢ်ဧၢ, ယၤမ့ၢ်ဂ့ၤ, ယပှၤဟံၣ်ဖိဃီဖိမ့ၢ်ဂ့ၤ, တကြၢးဘၣ်ဒီးတၢ်လၢနမၤတ့ၢ်အီၤလၢယဂီၢ်န့ၣ်ဘၣ်.
19 အန့ၣ်ဒၣ်လဲာ်, ခဲကနံၣ်အံၤ, ယွၤပၢဘၣ်တၢ်ခဲလၢာ်ကစၢ်ဧၢ, နမၤတၢ်အါန့ၢ်အန့ၣ်တက့ၢ်လီၤ. နမၤတ့ၢ်တၢ်အၢၣ်လီၤအီလီၤတဖၣ်ဘၣ်ဃးဒီးယစၢၤယသွဲၣ်တဖၣ်လၢ နံၣ်လၢအကဟဲတဖၣ်အပူၤန့ၣ်လီၤ. ဒီးယွၤ, ပၢဘၣ်တၢ်ခဲလၢာ်ကစၢ်ဧၢ, နပျဲပှၤတဂၤထံၣ်တၢ်အံၤလီၤ.
20 ယစံးအါထီၣ်နၤတၢ်မနုၤကသ့ဒံးလဲၣ်. နသ့ၣ်ညါယၤ, နခ့နပှၤအံၤလီၤ.
21 တၢ်အံၤမ့ၢ်နတၢ်ဘၣ်နသးဒီးတၢ်တိာ်လၢနကမၤအီၤန့ၣ်လီၤ. နမၤတ့ၢ်ကယဲၢ်တၢ်မၤဖးဒိၣ်ကိးမံၤဒဲးအံၤလၢတၢ်သိၣ်လိ နဲၣ်ယုၤယၤအဂီၢ်န့ၣ်လီၤ.
22 နမ့ၢ်တၢ်ဒိၣ်နီၢ်မးလဲၣ်, ပၢဘၣ်တၢ်ခဲလၢာ်ကစၢ်, ယွၤဧၢ. ပှၤဒ်သိးနၤတအိၣ်ဘၣ်နီတဂၤဘၣ်. ပသ့ၣ်ညါတ့ၢ်ထီဘိလၢထဲဒၣ်နၤတဂၤန့ၣ်နမ့ၢ်ကစၢ်ယွၤန့ၣ်လီၤ.
23 လၢဟီၣ်ခိၣ်ချၢအံၤပှၤကလုာ်ဂၤလၢကလီၤဂာ်ဒီးအံၣ်စရ့လးလၢ နမၤပူၤဖျဲးအီၤလၢကုၢ်အလီၢ်ဒ်သိးနကဒုးကဲထီၣ်အီၤလၢနပှၤ ဂီၢ်မုၢ်ဒၣ်နဲန့ၣ်, တအိၣ်ဘၣ်နီတကလုာ်ဘၣ်. တၢ်အဒိၣ်အမုၢ်ဒီးတၢ်လီၤလးတဖၣ်လၢနမၤတ့ၢ်လၢအဝဲသ့ၣ်အဂီၢ် န့ၣ်ဒုးဟူထီၣ်သါလီၤနမံၤလၢဟီၣ်ခိၣ်ဒီဘ့ၣ်ညါလီၤ. နဟီထီၣ်ကွံာ်တ့ၢ်ပှၤကလုာ်အဂၤတဖၣ်ဒီးအဝဲသ့ၣ်အကစၢ်တဖၣ်ဖဲနပှၤ ဂီၢ်မုၢ်လဲၤထီၣ်ဒုးတၢ်အခါန့ၣ်လီၤ. ပှၤဂီၢ်မုၢ်အံၤမ့ၢ်ပှၤလၢနမၤထူၣ်ဖျဲးထီၣ်အီၤလၢ ကီၢ်အဲၤကူပတူးဒ်သိးကကဲထီၣ်နပှၤဒၣ်နဲန့ၣ်လီၤ.
24 နဒုးကဲထီၣ်တ့ၢ်အံၣ်စရ့လးလၢနပှၤဂီၢ်မုၢ်ဒၣ်နဲလီၤထူလီၤယိာ်, ဒီးနဲဒၣ်ယွၤဧၢ, နကဲထီၣ်အဝဲသ့ၣ်အကစၢ်ယွၤန့ၣ်လီၤ.
25 ဒီးခဲအံၤ, ကစၢ်ယွၤဧၢ, မၤလၢထီၣ်ပှဲၤထီၣ်တၢ်အၢၣ်လီၤအီ လီၤလၢနမၤတ့ၢ်ဘၣ်ဃးယၤဒီးယစၢၤယသွဲၣ်တဖၣ်အဂ့ၢ်တဘိယူာ်ဃီ ဒီးမၤတၢ်လၢနစံးတ့ၢ်လၢနကမၤအီၤတဖၣ်န့ၣ်တက့ၢ်.
26 နတၢ်မံၤဟူသၣ်ဖျါကဒိၣ်ဝဲ, ဒီးပှၤဂီၢ်မုၢ်ကစံးဝဲလီၤစိၤလီၤထီ, လၢယွၤ, သ့တၢ်လၢာ်ကစၢ်န့ၣ်မ့ၢ်ကစၢ်ယွၤလၢကီၢ်အံၣ်စရ့လးအဖီ ခိၣ်လီၤ. ဒီးနကကတီၤဃာ်ယစၢၤယသွဲၣ်အတၢ်ပၢတဘိယူၢ်ဃီန့ၣ်လီၤ.
27 သ့တၢ်လၢာ်ကစၢ်, အံၣ်စရ့လးအကစၢ်ယွၤဧၢ, ယအိၣ်ဒီးတၢ်သးဒူလၢယကဘါထုကဖၣ်တၢ်ထုကဖၣ်အဝဲအံၤဆူနအိၣ်လီၤ. အဂ့ၢ်ဒ်အံၤ, နလီၣ်ဖျါထီၣ်တ့ၢ်တၢ်ခဲလၢာ်အံၤဆူယၤ, နခ့နပှၤ, ဒီးနတဲဘၣ်တ့ၢ်ယၤလၢနကဒုးကဲထီၣ်ယစၢၤယသွဲၣ်တဖၣ် လၢစီၤပၤတဖၣ်န့ၣ်လီၤ.
28 ဒီးခဲအံၤ, ယွၤ, ပၢဘၣ်တၢ်ခဲလၢာ်ကစၢ်ဧၢ, နမ့ၢ်ကစၢ်ယွၤလီၤ. နဟံးဃာ်ဂၢၢ်ကျၢၤနတၢ်အၢၣ်လီၤအီလီၤတဖၣ်ထီဘိ, ဒီးနမၤတ့ၢ်တၢ်အၢၣ်လီၤလီၤလးအံၤဒီးယၤလီၤ.
29 ယဃ့နၤလၢနကဆိၣ်ဂ့ၤယစၢၤယသွဲၣ်တဖၣ်, ဒ်သိးအဝဲသ့ၣ်ကသးခုဘၣ်ဒံးလၢ နတၢ်ကွၢ်မဲာ်အပူၤန့ၣ်လီၤ. နဲဒၣ်, ယွၤပၢဘၣ်တၢ်ခဲလၢာ်ကစၢ်ဧၢ, နအၢၣ်လီၤအီလီၤတ့ၢ်တၢ်အံၤဒီးနတၢ်ဆိၣ်ဂ့ၤကအိၣ်ကဆိးလၢယစၢၤ ယသွဲၣ်တဖၣ်အဖီခိၣ်လီၤထူလီၤယိာ်လီၤ.”