6
(၁ကွဲး.၁၃:၁-၁၄, ၁၅:၂၅-၁၆:၆, ၄၃)
1 မၤကဒီးတစု, စီၤဒၤဝံးကိးဖှိၣ်သုးဖိအဂ့ၤကတၢၢ်လၢ ကီၢ်အံၣ်စရ့လးအပူၤ, ခဲလၢာ်မ့ၢ်ဝဲသၢကလးဂၤန့ၣ်,
2 ဒီးလဲၤကိးအီၤဆူကီၢ်ယူဒၤအဝ့ၢ်ဘၤလ့ၤဒ်သိးကဟဲက့ၤစိာ် ကစၢ်ယွၤအတၢ်အၢၣ်လီၤအီလီၤအတလါစီဆှံ, လၢတၢ်ကိးအီၤလၢယွၤသ့တၢ်လၢာ်အမံၤ ဒီးဘၣ်တၢ်ပာ်ထီၣ်တ့ၢ်အီၤလၢလီၢ်ပစိာ်လၢအအိၣ်ခ့ရူာ်တဖၣ်အလိၤ, လၢအအိၣ်ဖဲန့ၣ်, န့ၣ်လီၤ.
3 အဝဲသ့ၣ်ဟံးထီၣ်အီၤလၢစီၤအဘံနဒၤအဟံၣ်လၢအအိၣ်ဝဲလၢ ကစၢၢ်ဒီခိၣ်န့ၣ်ဒီးပာ်ထီၣ်အီၤလၢလ့ၣ်အသီတဆိအလိၤန့ၣ်လီၤ. စီၤအဘံနဒၤအဖိခွါတဖၣ်လၢအမ့ၢ် စီၤဧူးစၤဒီးစီၤအဃံယိၤ ဆှၢလ့ၣ်န့ၣ်,
4 အိၣ်ဒီးစီၤအဃံယိၤလၢအဟးဝဲလၢတၢ်မဲာ်ညါန့ၣ်လီၤ.
5 စီၤဒၤဝံးဒီးကယဲၢ်ပှၤအံၣ်စရ့လးဖိတဖၣ်ဂဲၤကလံာ် ဒီးသူၣ်ဝံၣ်သးဆၢလၢာ်ဂံၢ်လၢာ်ဘါဒ်သိးကမၤလၤကပီၤယွၤအဂီၢ်န့ၣ်လီၤ. အဝဲသ့ၣ်ဒ့တနၢ်တဖၣ်, သီတူၢ်တဖၣ်, ဒၢတဖၣ်, ပှ့ၤသၣ်တဖၣ်, ဒီးစှၢၢ်စှံးတဖၣ်န့ၣ်လီၤ.
6 ဖဲအဝဲသ့ၣ်ဟဲတုၤဝဲဆူစီၤနၤကိၢ်အကြဲၢ်ပူၤန့ၣ်မ့ၢ်လၢဂီၤ ဖံးဖါတဖၣ်အခီၣ်ဘၣ်တိၢ်အဃိ, စီၤဧူးစၤယူာ်ထီၣ်အစုဒီးဖီၣ်ဃာ် ယွၤအတၢ်အၢၣ်လီၤအီလီၤအတလါစီဆှံန့ၣ်လီၤ.
7 တဘျီဃီန့ၣ်ယွၤ, ကစၢ်ယွၤအသးဒိၣ်ထီၣ်ဘၣ်စီၤဧူးစၤဒီးမၤသံကွံာ်အီၤ လၢအတယူးယီၣ်တၢ်အဃိန့ၣ်လီၤ. စီၤဧူးစၤသံဖဲန့ၣ်လၢယွၤအတၢ်အၢၣ်လီၤအီလီၤအတလါစီဆှံ အဃၢၤန့ၣ်လီၤ.
8 လၢတၢ်န့ၣ်အဃိ, စးထီၣ်ဖဲန့ၣ်တၢ်လီၢ်အံၤဘၣ်တၢ်ကိးအီၤလၢ ဖ့းရ့းဧူးစၤန့ၣ်လီၤ. စီၤဒၤဝံးအသးဒိၣ်ကဲၤထီၣ်ဝဲ မ့ၢ်လၢယွၤစံၣ်ညီၣ်စီၤဧူးစၤလၢတၢ်သးထီၣ်အပူၤအဃိန့ၣ်လီၤ.
9 တုၤနုၤတစုစီၤဒၤဝံးပျံၤဘၣ်ယွၤဒီးစံးဝဲဒၣ်, “ယက့ၤစိာ်ယွၤအတၢ်အၢၣ်လီၤအီလီၤအတလါစီဆှံဃုာ်ဒီးယၤခဲအံၤကသ့ဒ်လဲၣ်.”
10 လၢတၢ်န့ၣ်အဃိ, အဝဲပာ်လီၤတ့ၢ်အသးလၢတက့ၤစိာ်လၢၤယွၤအတၢ် အၢၣ်လီၤအီလီၤအတလါစီဆှံန့ၣ်ဒီးအီၤဆူဝ့ၢ်ယရူၤၡလ့ၣ်ဘၣ်န့ၣ်လီၤ. အခိၣ်တလိာ်အဝဲဃၣ်ကွံာ်အသးလၢကျဲဒီးလဲၤစိာ်အီၤဆူ ပှၤအိၣ်ဆိးဖဲဝ့ၢ်ကးအပူၤစီၤဧိၤဘ့းအ့ဒိၣ်အဟံၣ်န့ၣ်လီၤ.
11 ယွၤအတၢ်အၢၣ်လီၤအီလီၤအတလါစီဆှံအိၣ်ဖဲန့ၣ်သၢလါဒီး ယွၤဆိၣ်ဂ့ၤစီၤဧိၤဘ့းအ့ဒိၣ်ဒီးအဟံၣ်ဖိဃီဖိန့ၣ်လီၤ.
12 စီၤပၤစီၤဒၤဝံးနၢ်ဟူဘၣ်ဝဲလၢ, မ့ၢ်လၢယွၤအတၢ်အၢၣ်လီၤအီ လီၤအတလါစီဆှံအဃိ, ယွၤဆိၣ်ဂ့ၤစီၤဧိၤဘ့းအ့ဒိၣ်အဟံၣ်ဖိဃီဖိဒီး ကယဲၢ်တၢ်အိၣ်ဒီးအီၤခဲလၢာ်န့ၣ်လီၤ. လၢတၢ်န့ၣ်အဃိအဝဲစိာ်ထီၣ်ယွၤအတၢ်အၢၣ်လီၤအီလီၤအတလါစီဆှံ လၢစီၤဧိၤဘ့းအ့ဒိၣ်အဟံၣ်ဒီးက့ၤစိာ်အီၤဆူ ဝ့ၢ်ယရူၤၡလ့ၣ်အိၣ်ဒီးတၢ်မၤမူးဖးဒိၣ်တမူးန့ၣ်လီၤ.
13 ဖဲပှၤတဖၣ်လၢအစိာ်ထီၣ်ယွၤအတၢ်အၢၣ်လီၤအီလီၤအတလါစီဆှံ ခါထီၣ်အခီၣ်ကါဃုကါဝံၤအလီၢ်ခံန့ၣ်, စီၤဒၤဝံးမၢအအိၣ်ကတီၢ်ဖဲအဝဲလုၢ်ထီၣ်ပာ်ထီၣ်ကျီၢ်ဖါတဒု ဒီးဂီၤဖံးဖိအဘီၣ်တဒုဆူယွၤအအိၣ်အခါန့ၣ်လီၤ.
14 စီၤဒၤဝံးကူဒၣ်ထဲတၢ်ကံးယာ်လုၣ်ဖီဝါကဆှၣ်ဖိတဘ့ၣ်လၢအယီၢ် ဒ့လိၤဒီးဂဲၤကလံာ်လၢာ်သူၣ်လၢာ်သးလၢတၢ်မၤလၤကပီၤယွၤအဂီၢ် န့ၣ်လီၤ.
15 မၤသးဒ်န့ၣ်ဒီးအဝဲဒီးကယဲၢ်ပှၤအံၣ်စရ့လးဖိခဲလၢာ် က့ၤစိာ်ထီၣ်ယွၤအတၢ်အၢၣ်လီၤအီလီၤအတလါစီဆှံဆူဝ့ၢ်ယရူၤၡလ့ၣ်အိၣ် ဒီးတၢ်သူၣ်ခုသးခုအတၢ်ကိးပသူထီၣ်ဒီးကွဲၤတဖၣ်အသီၣ်န့ၣ်လီၤ.
16 တုၤတလါစီဆှံန့ၣ်ဘၣ်တၢ်က့ၤစိာ်နုာ်အီၤဆူဝ့ၢ်ပူၤဒီး, စီၤစီလူးအဖိမုၣ်နီၢ်မံၤကၤလးကွၢ်ဃီၤတၢ်လၢပဲတြီဖိဒီး ထံၣ်ဘၣ်စီၤပၤစီၤဒၤဝံးဂဲၤကလံာ်ဒီးစံၣ်ဝ့ၤစံၣ်ဝီၤလၢယွၤ အမဲာ်ညါသတးဒီးပိာ်မုၣ်န့ၣ်အသးဘၣ်အၢအီၤလၢအသးကံၢ်ပူၤန့ၣ် လီၤ.
17 အဝဲသ့ၣ်ဟဲစိာ်ဃီၤတလါစီဆှံန့ၣ်ဒီးပာ်ထီၣ်အီၤလၢအလီၢ်ဖဲ ယွၤအဒဲစီဆှံပူၤ, တၢ်လီၢ်ဖဲစီၤဒၤဝံးမၤပာ်န့ၢ်အလီၢ်န့ၣ်လီၤ. အန့ၣ်ဝံၤဒီးအဝဲလုၢ်ထီၣ်တၢ်လုၢ်တၢ်ပာ်တဖၣ် ဒီးတၢ်လုၢ်မၤဃူမၤဖိးတဖၣ်ဆူယွၤအအိၣ်န့ၣ်လီၤ.
18 ဖဲအဝဲလုၢ်ထီၣ်ပာ်ထီၣ်တၢ်လုၢ်တၢ်ပာ်တဖၣ်ဝံၤန့ၣ်, အဝဲဆိၣ်ဂ့ၤပှၤဂီၢ်မုၢ်လၢယွၤ, သ့တၢ်လၢာ်ကစၢ်အမံၤအပူၤ,
19 ဒီးဟ့ၣ်နီၤလီၤတၢ်အီၣ်တၢ်အီတဖၣ်ဆူအဝဲသ့ၣ်ခဲလၢာ်အအိၣ်န့ၣ် လီၤ. အဝဲဟ့ၣ်လီၤပိာ်ခွါဒီးပိာ်မုၣ်တဂၤစုာ်စုာ်လၢကီၢ်အံၣ်စရ့လး အပူၤ, လၢကိၣ်တဂၤတလိၣ်, တၢ်ညၣ်အကၣ်တဂၤတလိၣ်ဒီးစပံးသၣ်ဃ့တနီၤန့ၣ်လီၤ. အန့ၣ်ဝံၤဒီးပှၤကိးဂၤဒဲးက့ၤဆူအဟံၣ်န့ၣ်လီၤ.
20 တၢ်န့ၣ်ဝံၤအလီၢ်ခံ, ဖဲစီၤဒၤဝံးက့ၤဆူအဟံၣ် ဒ်သိးကဆၢဂ့ၤဆၢဝါအဟံၣ်ဖိဃီဖိန့ၣ်နီၢ်မံၤကၤလးဟးထီၣ်လၢကသဂၢၢ်အီၤအဂီၢ်လီၤ. ပိာ်မုၣ်န့ၣ်စံးဝဲ, “တနံၤအံၤ, ကီၢ်အံၣ်စရ့လးအစီၤပၤမၤဒိၣ်ထီၣ်အမံၤတဖျၢၣ်လၢအဂီၢ်ဒၣ်ဝဲန့ၣ်လီၤ. အဝဲပာ်ဖျါထီၣ်တ့ၢ်အသးဒ်တၢ်ပျုၢ်တဂၤအသိး လၢအဝဲအပဒိၣ်ပပှၢ်တဖၣ်ဒီးအကုၢ်ပိာ်မုၣ်တဖၣ်အမဲာ်ညါန့ၣ်လီၤ.”
21 စီၤဒၤဝံးစံးဆၢဝဲဒၣ်, “ယဂဲၤကလံာ်ဒ်သိးယကမၤလၤကပီၤယွၤ, ပှၤလၢအဃုထၢထီၣ်ယၤလၢနပၢ်ဒီးအဟံၣ်ဖိ ဃီဖိအလီၢ်, ဒ်သိးကဒုးကဲထီၣ်ယၤအပှၤဂီၢ်မုၢ်အခိၣ်အနၢ်တဂၤ န့ၣ်လီၤ. ဒီးယကဂဲၤကလံာ်ဒံးဆူညါလၢတၢ်မၤလၤကပီၤယွၤအဂီၢ်,
22 ဒီးမၤလီၤယသူးယသ့ၣ်အါန့ၢ်အအံၤတက့ၢ်လီၤ. နဆိကမိၣ်လၢယမ့ၢ်တၢ်ကလီကလီ, ဘၣ်ဆၣ်ဒီးပိာ်မုၣ်ဖိတဖၣ်န့ၣ်ကဆိကမိၣ်ဒိၣ်ယၤလီၤ.”
23 စီၤစီလူးအဖိမုၣ်နီၢ်မံၤကါလးန့ၣ်အဖိတအိၣ်ဘၣ်နီတဂၤ, နီတစုဘၣ်.