2
1 တၢ်အံၤဝံၤအလီၢ်ခံ, စီၤဒၤဝံးသံကွၢ်ယွၤ, “ယဘၣ်လဲၤမၤန့ၢ်ဒီးပၢၤဃာ်ကီၢ်ယူဒၤအဝ့ၢ်တဖျၢၣ်ဖျၢၣ်ဧါ.”
ယွၤစံးဆၢဝဲဒၣ်, “မ့ၢ်လီၤ.”
စီၤဒၤဝံးသံကွၢ်ဝဲ, “ဝ့ၢ်လၢလဲၣ်တဝ့ၢ်လဲၣ်.”
ယွၤစံးဝဲဒၣ်, “ဝ့ၢ်ဃ့ဘြိၣ်” လီၤ.
2 မၤသးဒ်န့ၣ်ဒီး, စီၤဒၤဝံးလဲၤဆူဝ့ၢ်ဃ့ဘြိၣ်, လဲၤကိးဃုာ်ဝဲဒၣ်အမါခံဂၤလၢအမ့ၢ်နီၢ်အဃံနိၣ်လၢဝ့ၢ်ယံးစရ့လး ဒီးနီၢ်အဘံၤကါယံးလးလၢအမ့ၢ်တ့ၢ်စီၤနၤဘလးအမါမုၣ် ကမဲလၢဝ့ၢ်ကၤမ့ၢ်လးတခီန့ၣ်လီၤ.
3 အဝဲလဲၤကိးဃုာ်စ့ၢ်ကီးအပှၤတဖၣ်ဒီးအဟံၣ်ဖိဃီဖိတဖၣ်ဒီး အဝဲသ့ၣ်သူၣ်လီၤဆီလီၤအသးလၢဝ့ၢ်တဖၣ်လၢအအိၣ်ဝးတရံးဝ့ၢ်ဃ့ဘြိၣ်န့ၣ်လီၤ.
4 အန့ၣ်ဝံၤဒီးပှၤကီၢ်ယူဒၤဖိတဖၣ်ဟဲဆူဝ့ၢ်ဃ့ဘြိၣ်ဒီးဖှူ စီၤဒၤဝံးဒ်ကီၢ်ယူဒၤအစီၤပၤအသိးန့ၣ်လီၤ.
ဖဲစီၤဒၤဝံးနၢ်ဟူတ့ၢ်လၢပှၤဂီၢ်မုၢ်လၢဝ့ၢ်ယၤဘ့ၣ်အိၣ်လၢ ကီၢ်ကံးလဧးအပူၤခူၣ်လီၤဘျၢလီၤစီၤစီလူးန့ၣ်,
5 အဝဲဆှၢလီၤပှၤတနီၤဃုာ်ဒီးတၢ်ကစီၣ်ဒ်အံၤ, “မ်ယွၤဆိၣ်ဂ့ၤသုလၢသုဒုးနဲၣ်သုတၢ်သူၣ်တီသးရၤဆူသု စီၤပၤခီဖျိသုခူၣ်လီၤဘျၢလီၤအီၤအဃိန့ၣ်တက့ၢ်.
6 ဒီးခဲအံၤမ်ယွၤသူၣ်ကညီၤသးကညီၤသုဒီးမၤတီအကလုၢ်ဒီးသု တက့ၢ်. ယဲဒၣ်စ့ၢ်ကီးယကမၤဘၣ်သုဂ့ၤဂ့ၤလၢတၢ်လၢသုမၤတ့ၢ်လီၤအဃိ န့ၣ်လီၤ.
7 မ်သုဂံၢ်ဆူၣ်ဘါဆူၣ်ဒီးသူၣ်ဒူသးဒူတက့ၢ်. သုစီၤပၤစီၤစီလူးသံဝဲလံ. ဒီးကီၢ်ယူဒၤအပှၤဂီၢ်မုၢ်ဖှူလံယၤဒ်အဝဲသ့ၣ်အစီၤပၤအသိး န့ၣ်လံ.”
8 သုးခိၣ်ကျၢၢ်လၢစီၤစီလူးအသုးမုၢ်အပူၤ, စီၤန့ၢ်အဖိခွါစီၤအဘံန့ၢ်ဃ့ၢ်ပူၤဖျဲးကွံာ်ဒီးစီၤစီလူး အဖိခွါစီၤအံၤၡဘိၡ့းခီဂာ်ကွံာ်ထံကျိယၢ်ဒ့ၣ်ဆူဝ့ၢ်မၤ ဃန့ၤန့ၣ်လီၤ.
9 ဖဲန့ၣ်စီၤအဘံန့ၢ်ဒုးကဲထီၣ်စီၤအံၤၡဘိၡ့းလၢစီၤပၤလၢ လီၢ်ကဝီၤတဖၣ်လၢအမ့ၢ်ကံးလဧး, အၤၡူၢ်, ယံးစရ့လး, အ့ဖရဲၣ်, ဒီးဘံၣ်ယၤမံၣ်အဖီခိၣ်ဒီးလၢအံၣ်စရ့လးခဲလၢာ် အဖီခိၣ်နီၢ်နီၢ်န့ၣ်လီၤ.
10 ဖဲအဝဲဘၣ်တၢ်ဒုးကဲထီၣ်အီၤလၢစီၤပၤန့ၣ်, အဝဲအသးအိၣ်အနံၣ်လွံၢ်ဆံဒီးအဝဲပၢတၢ်ခံနံၣ်န့ၣ်လီၤ.
မ့မ့ၢ်ယူဒၤအဒူၣ်န့ၣ်သူၣ်တီသးသးရၤဒီးစီၤဒၤဝံး,
11 ဒီးအဝဲပၢတၢ်လၢဝ့ၢ်ဃ့ဘြိၣ်လၢကီၢ်ယူဒၤအပူၤနွံနံၣ်ဒီး ဃုလါန့ၣ်လီၤ.
12 စီၤအဘံန့ၢ်ဒီးစီၤပၤအံၤၡဘိၡ့းအပဒိၣ်ပပှၢ်တဖၣ်ဟးထီၣ်လၢ ဝ့ၢ်မၤဃန့ၤဒီးလဲၤဆူဝ့ၢ်ကံးဘိၣ်လီၤ.
13 နီၢ်စရူၤယၤအဖိခွါစီၤယိၤအာ်ဒီးစီၤဒၤဝံးအပဒိၣ်ပပှၢ်အဂၤ တဖၣ်လဲၤသဂၢၢ်အီၤဖဲကွံတကွံဖဲအဝဲသ့ၣ်ခဲလၢာ်ဆ့ၣ်နီၤဝဲ တဖုလၢကွံတကပၤဒီးအဂၤတဖုလၢကွံအဘးခီတကပၤန့ၣ်လီၤ.
14 စီၤအဘံန့ၢ်စံးဘၣ်စီၤယိၤအာ်, “မ်ပအိၣ်ဒီးပှၤသးစၢ်တနီၤလၢကွံအကၢၢ်နံၤတခီစုာ်စုာ်, ဒုးပြၢလိာ်အသးလၢတၢ်စုကဝဲၤတက့ၢ်.”
စီၤယိၤအာ်စံးဝဲ, “ဂ့ၤလံ” န့ၣ်လီၤ.
15 လၢတၢ်န့ၣ်အဃိပှၤတဆံခံဂၤကဲထီၣ်ခၢၣ်စးလၢစီၤအံၤၡဘိၡ့း ဒီးပှၤဘံၣ်ယၤမံၣ်ဖိအဒူၣ်အဂီၢ်ဒီးဒုးတၢ်ဒီးစီၤဒၤဝံးအပှၤတဆံ ခံဂၤန့ၣ်လီၤ.
16 ပှၤတဂၤစုာ်စုာ်ဖီၣ်န့ၢ်အဒုၣ်အဒါလၢအခိၣ်ဒီးဆဲးနုာ်အနးဆူ အဒုၣ်အဒါအကပၤ, အဃိသတးဒီးပှၤခံဆံလွံၢ်ဂၤလိာ်လီၤဃံၤသံဝဲလီၤ. ဒီးလၢတၢ်န့ၣ်အဃိ, တၢ်လီၢ်အဝဲန့ၣ် လၢအအိၣ်လၢဝ့ၢ်ကံးဘိၣ်အပူၤန့ၣ်ဘၣ်တၢ်ကိးအီၤလၢ, “ဃ့လကးဟစူရံၣ်” လၢအခီပညီမ့ၢ်ဝဲနးတဖၣ်အပျီန့ၣ်လီၤ.
17 အန့ၣ်ဝံၤဒီး, တၢ်ဒုးဆူၣ်ဆူၣ်ကလဲာ်တဘျီကဲထီၣ်ဝဲဒၣ်, ဒီးစီၤအဘံန့ၢ်ဒီးပှၤအံၣ်စရ့လးဖိတဖၣ်ဘၣ်တၢ်မၤနၢၤကွံာ်အီၤလၢ စီၤဒၤဝံးအပှၤတဖၣ်န့ၣ်လီၤ.
18 နီၢ်စရူၤယၤအဖိခွါသၢဂၤလၢအမံၤမ့ၢ်ဝဲစီၤယိၤအာ်, စီၤအဘံၡဲၤဒီးစီၤဧစၤအ့လးန့ၣ်အိၣ်ဝဲဖဲန့ၣ်လီၤ. စီၤဧမၤအ့လးလၢအဃ့ၢ်တၢ်ချ့ဝဲထဲသိးဒီးတၤဟိအမံၤတဒု,
19 စးထီၣ်လူၤစီၤအဘံန့ၢ်ဒီးဃ့ၢ်လိၤလိၤဆူအဝဲအအိၣ်န့ၣ်လီၤ.
20 စီၤအဘံန့ၢ်ကွၢ်တရံးတၢ်ဒီးစံးဝဲဒၣ်, “စီၤဧစၤအ့လးဧၢ, မ့ၢ်နၤဧါ.”
ဒီးအဝဲစံးဆၢ, “မ့ၢ်ယၤလီၤ.”
21 စီၤအဘံန့ၢ်စံးဝဲဒၣ်, “ဆိကတီၢ်လူၤယၤတက့ၢ်. လူၤပှၤသုးဖိအဂၤတဂၤဒီးဟံးန့ၢ်တၢ်လၢအိၣ်ဒီးအီၤတက့ၢ်.” ဘၣ်ဆၣ်ဒီးစီၤဧစၤအ့လးလူၤထွဲဒၣ်အီၤန့ၣ်လီၤ.
22 မၤကဒီးတစု, စီၤအဘံန့ၢ်စံးဘၣ်အီၤ “ဆိကတီၢ်နတၢ်လူၤယၤတက့ၢ်. ဘၣ်မနုၤနမၤဆူၣ်ယၤဒ်သိးယကမၤသံနၤနၣ်လဲၣ်. ယကွၢ်နဒီပုၢ်ဝဲၢ်စီၤယိၤအာ်အမဲာ်ကသ့ဒ်လဲၣ်.”
23 ဘၣ်ဆၣ်ဒီးစီၤဧစၤအ့လးတဆိကတီၢ်လူၤအီၤဘၣ်. လၢတၢ်န့ၣ်အဃိ, စီၤအဘံန့ၢ်ဆဲးကဒါချၢအီၤလၢအဘီ ဒီးဆဲးဘၣ်အီၤဖဲအဟၢဖၢဒီးဖျိထီၣ်ဆူအချၢဃံန့ၣ်လီၤ. စီၤဧစၤအ့လးလီၤဃံၤဆူဟီၣ်ခိၣ်လိၤဒီးသံဝဲလီၤ. ဒီးပှၤကိးဂၤဒဲးလၢအဟဲဆူတၢ်လီၢ်ဖဲအဝဲလီၤဃံၤဝဲန့ၣ်, အိၣ်ကတီၢ်ဒီးဆၢထၢၣ်ဖဲန့ၣ်လီၤ.
24 ဒီးစီၤယိၤအာ်ဒီးစီၤအဘံၡဲၤလူၤထွဲစီၤအဘံန့ၢ်ဒီးဖဲ မုၢ်လီၤနုာ်အကတီၢ်န့ၣ်အဝဲသ့ၣ်ဟဲတုၤဝဲဖဲတၢ်လူၢ်ခိၣ်အၤမၤ လၢအအိၣ်ဝဲဖဲဝ့ၢ်ကံၤဃးအမုၢ်ထီၣ်, ဝ့ၢ်လၢအအိၣ်ဖဲကျဲလဲၤဆူပှၢ်မုၢ်ကနၢကံးဘိၣ်အလိၤန့ၣ်လီၤ.
25 ပှၤတဖၣ်လၢဘံၣ်ယၤမံၣ်အဒူၣ်ပာ်ဖှိၣ်ကဒီးအသးဝးတရံးစီၤ အဘံန့ၢ်ဒီးဟံးန့ၢ်အခီၣ်တဃာ်ဖဲတၢ်လူၢ်တလူၢ်အဒီခိၣ်လီၤ.
26 စီၤအဘံန့ၢ်ကိးထီၣ်ဆူစီၤယိၤအာ်အအိၣ်ဒီးစံးဝဲ, “မ့ၢ်ပကဘၣ်ဒုးတၢ်ဆူညါတဘိယူၢ်ဃီန့ၣ်ဧါ. လၢတၢ်အကတၢၢ်န့ၣ်တၢ်အဂၤတအိၣ်နီတမံၤဘၣ်. မ့မ့ၢ်ကအိၣ်ဒၣ်ထဲတၢ်သူၣ်ခၣ်သးခၣ်ဧိၤန့ၣ်နထံၣ်တသ့ဘၣ်ဧါ. ပမ့ၢ်ဒၣ်နထံဖိကီၢ်ဖိကဒဲကဒဲလီၤ. လၢနကဟ့ၣ်လီၤနကလုၢ်ဒ်သိးနပှၤတဖၣ်ကဆိကတီၢ်ဒုးပှၤအဂီၢ်န့ၣ်, ကယံာ်ဒံးဆံးယံာ်လဲၣ်.”
27 စီၤယိၤအာ်စံးဆၢဝဲ, “ယဆိၣ်တၢ်ခီဖျိကစၢ်ယွၤလၢအမူဝဲ တဂၤလၢနမ့ၢ်တကတိၤတၢ်ဘၣ်ဒီး, ယပှၤတဖၣ်ကလူၤထွဲဒၣ် နၤတုၤလၢခဲမုၢ်ဆ့ၣ်ဂီၤခီန့ၣ်လီၤ.”
28 အန့ၣ်ဝံၤဒီးစီၤယိၤအာ်အူထီၣ်ကွဲၤဒ်တၢ်ပနီၣ်တမံၤ အသိးလၢအပှၤတဖၣ်ကဆိကတီၢ် တၢ်လူၤထွဲပှၤအံၣ်စရ့လးဖိတဖၣ်အဂီၢ်န့ၣ်လီၤ. မၤသးဒ်န့ၣ်ဒီးတၢ်ဒုးတၢ်ယၤဆိကတီၢ်အသးလီၤ.
29 စီၤအဘံန့ၢ်ဒီးအပှၤတဖၣ်လဲၤတၢ်ခီဖျိထံကျိယၢ်ဒ့ၣ်အတၢ်တြီၤ သီတနၤကျၢၤန့ၣ်လီၤ. အဝဲသ့ၣ်ခီဂာ်ထံကျိယၢ်ဒ့ၣ်, ဒီးလဲၤတၢ်လၢခံသီတဂီၤကျၢၤဝံၤအလီၢ်ခံအဝဲသ့ၣ်ဟဲက့ၤတုၤ ကဒါက့ၤဖဲဝ့ၢ်မၤဃန့ၤန့ၣ်လီၤ.
30 တုၤစီၤယိၤအာ်ဆိကတီၢ်ကွံာ်အတၢ်လူၤထွဲတၢ်န့ၣ်, အဝဲပာ်ဖှိၣ်က့ၤအပှၤတဖၣ်ခဲလၢာ်, ဒီးထံၣ်ဝဲလၢပှၤတဆံခွံဂၤ ဃုာ်ဒီးစီၤဧစၤအ့လးန့ၣ်လီၤမၢ်ဝဲဒၣ်လီၤ.
31 စီၤဒၤဝံးအပှၤတဖၣ်မၤသံတ့ၢ်စီၤအဘံန့ၢ်အပှၤအဂၤသၢကယၤဃုဆံ လၢစီၤဘံၣ်ယၤမံၣ်အဒူၣ်အကျါလီၤ.
32 စီၤယိၤအာ်ဒီးအပှၤတဖၣ်ဟံးန့ၢ်စီၤဧစၤအ့လးအစိၣ်ဒီးခူၣ်လီၤကွံာ်အီၤ ဖဲအဒူၣ်ဖိထၢဖိအသွၣ်ခိၣ်လၢဝ့ၢ်ဘ့ၤသလ့ဃ့ၣ် အပူၤန့ၣ်လီၤ. အန့ၣ်ဝံၤဒီး, အဝဲသ့ၣ်လဲၤတၢ်သီတနၤကျၢၤဒီးလၢမုၢ်ဆ့ၣ်ထီၣ် ဂီၤဂီၤန့ၣ်ဟဲက့ၤတုၤကဒါက့ၤဆူဝ့ၢ်ဃ့ဘြိၣ်န့ၣ်လီၤ.