လံာ်စီၤၡမူၤအ့လးခံဘ့ၣ်တဘ့ၣ်
SAMUEL
လံာ်ခံၡမူၤအ့လးလၢအပိာ်ထွဲထီၣ်လံာ်တၢၡမူၤအ့လးအခံန့ၣ်, မ့ၢ်တၢ်စံၣ်စိၤတဲစိၤဘၣ်ဃးဒီးစီၤဒၤဝံးအတၢ်ပၢတၢ်ပြးဒ် စီၤပၤတဂၤအသိးန့ၣ်လီၤ. အခီၣ်ထံးကတၢၢ်န့ၣ်အဝဲပၢတၢ်လၢကီၢ်ယူဒၤကလံၤထံး (အဆၢဒိၣ် ၁-၄), ဝံၤဒီးကီၢ်ဒီဘ့ၣ်ညါဃုာ်ဒီးကီၢ်အံၣ်စရ့လးလၢကလံၤစိး (အဆၢဒိၣ် ၅-၂၄) န့ၣ်လီၤ. တၢ်အံၤမ့ၢ်တၢ်ကွဲးဖျါထီၣ်ဖျိဖျိဖျါဖျါတမံၤဘၣ်ဃးဒီး စီၤဒၤဝံး, ဘၣ်ဂဲၤပျုၢ်ဂဲၤဆှးဒီးအဒုၣ်အဒါတဖၣ်လၢထံ လီၢ်ကီၢ်ပူၤ, တဘျီဃီဃုာ်ဒီးပှၤတခီဘီမုၢ်ဖိတဖၣ်အစိကမီၤ, ဒ်လဲၣ်ဒ်လဲၣ်အဂ့ၢ်လၢကမၤဒိၣ်ထီၣ်လဲၢ်ထီၣ်အဘီအမုၢ်ဒီးမၤဂၢၢ် မၤကျၢၤအတၢ်ပၢတၢ်ပြးအဂီၢ်န့ၣ်လီၤ.
စီၤဒၤဝံးဘၣ်တၢ်ပာ်ဖျါထီၣ်အီၤဒ်အမ့ၢ်ပှၤတဂၤလၢအတၢ်စူၢ်တၢ် နာ်ယိာ်ဝဲ, ဒီးယူးယီၣ်ပာ်ကဲကစၢ်ယွၤ, ဒီးမ့ၢ်ပှၤတဂၤလၢအထုးန့ၢ်အပှၤ ဂီၢ်မုၢ်အတၢ်သူၣ်တီသးရၤဒီးအီၤသ့ဝဲန့ၣ်လီၤ. ဘၣ်ဆၣ်, တဘျီဘျီအဝဲဘၣ်တၢ်ပာ်ဖျါထီၣ်စ့ၢ်ကီးအီၤဒ်ပှၤလၢတသ့ သးကညီၤတၢ်ဒီးအသးဆူၣ်မၤတၢ်ဒဲးဘးလီၤပျံၤလီၤဖုးတဖၣ်လၢ တၢ်မၤပှဲၤက့ၤအကစၢ်ဒၣ်ဝဲအတၢ်အဲၣ်ဒိးဒီးတၢ်သးဆူၣ်သးဂဲၤဆၢ မၤန့ၢ်တၢ်တဖၣ်အဂီၢ်န့ၣ်လီၤ. ဘၣ်ဆၣ်ဖဲယွၤအဝံစီၤနၤသၣ်ဒုးကွၢ်ဆၢၣ်မဲာ်က့ၤအီၤအတၢ်ဒဲး ဘးတဖၣ်န့ၣ်, အဝဲဒၣ်အၢၣ်လီၤဝဲဒီးတူၢ်လိာ်တၢ်စံၣ်ညီၣ်လၢယွၤဟ့ၣ်လီၤအီၤ န့ၣ်လီၤ.
စီၤဒၤဝံးအတၢ်အိၣ်မူဒီးအတၢ်မၤလၢအကဲထီၣ်လိၣ်ထီၣ်တဖၣ်ဘၣ် သူၣ်ဘၣ်သးဒုးစဲဘူးကီၢ်အံၣ်စရ့လးအပှၤဂီၢ်မုၢ်အသးဒိၣ်မး တုၤဒၣ်လဲာ်, လၢခံဖဲပှၤဒီကလုာ်အတၢ်ကိၢ်တၢ်ဂီၤအကတီၢ်တဖၣ်လၢအဝဲသ့ၣ်ဆၢ န့ၢ်ဘၣ်စီၤပၤအသီတဂၤအခါန့ၣ်, အဲၣ်ဒိးဝဲလၢကဘၣ်မ့ၢ်ဒၣ်ပှၤတဂၤလၢစီၤဒၤဝံးအဒူၣ်ပူၤ, “စီၤဒၤဝံးအဖိခွါတဂၤ,” တၢ်န့ၣ်အခီပညီမ့ၢ်ဝဲဒၣ်စီၤ ဒၤဝံးအစၢၤအသွဲၣ်တဂၤလၢကလီၤဂာ်ဒီးအီၤန့ၣ်လီၤ.
1
1 စီၤစီလူးသံဝံၤအလီၢ်ခံန့ၣ်, စီၤဒၤဝံးဟဲက့ၤကဒါက့ၤဝဲ လၢတၢ်မၤနၢၤပှၤဧမၤလ့းဖိတဖၣ်ဒီးအိၣ်ဝဲဒၣ်ဖဲဝ့ၢ်စံးကလး ခံသီန့ၣ်လီၤ.
2 မုၢ်ဆ့ၣ်ထီၣ်တနံၤန့ၣ်ပှၤသးစၢ်တဂၤလၢစီၤစီလူးအသူၣ်ဒဲအလီၢ်န့ၣ်ဟဲတုၤဝဲဒၣ်လီၤ. လၢတၢ်ဒုးနဲၣ်အတၢ်သးအုးအဂီၢ်န့ၣ်, အဝဲဖှီယာ်ကွံာ်အတၢ်ကူတၢ်သိးတဖၣ်ဒီးပာ်ထီၣ်ဖၣ်ကမူၣ်ဖၣ်ဆါ လၢအခိၣ်ဖီခိၣ်လီၤ. အဝဲလဲၤဆူစီၤဒၤဝံးအအိၣ်ဒီးထိၣ်လီၤပှီၤအသးဒီးဆုးလီၤ အခိၣ်လၢတၢ်ယူးယီၣ်ပာ်ကဲအပူၤန့ၣ်လီၤ.
3 စီၤဒၤဝံးသံကွၢ်အီၤ, “နဟဲနဲလၢလဲၣ်တခီလဲၣ်.” အဝဲဒၣ်စံးဆၢဝဲ,
“ယဃ့ၢ်ထူၣ်ဖျဲးထီၣ်လၢပှၤအံၣ်စရ့လးဖိအသူၣ်ဒဲလီၢ်တခီန့ၣ် လီၤ.”
4 စီၤဒၤဝံးစံးဝဲ, “တဲဘၣ်ယၤတၢ်လၢအမၤတ့ၢ်အသးတက့ၢ်.” အဝဲစံးဆၢဝဲ, “ပသုးမုၢ်ထွးထီၣ်ဃ့ၢ်ကွံာ်ဝဲလၢတၢ်ဒုးပျီ အပူၤဒီးပပှၤအါဂၤဘၣ်တၢ်မၤသံကွံာ်အီၤလံ. စီၤစီလူးဒီးအဖိခွါစီၤယိနၤသၣ်စ့ၢ်ကီးဘၣ်တၢ်မၤသံကွံာ် အီၤလံ.”
5 စီၤဒၤဝံးသံကွၢ်အီၤ, “စီၤစီလူးဒီးစီၤယိနၤသၣ်သံဝဲ န့ၣ်နသ့ၣ်ညါဒ်လဲၣ်.”
6 အဝဲဒၣ်စံးဆၢဝဲ, “ယလဲၤဘၣ်အတီၤလၢကစၢၢ်ကံးလဘိ အဒီခိၣ်, ဒီးယထံၣ်လၢစီၤစီလူးထိၣ်လီၤဃံၤအသးလၢအဘီ ဖီခိၣ်ဒီးဒုၣ်ဒါအလ့ၣ်ကဟၣ်ဒုးသုးတဖၣ်ဒီးကသ့ၣ်ဒုးသုးတဖၣ် ဘူးတ့ၢ်မးလၢကတုၤဆူအအိၣ်န့ၣ်လီၤ.
7 အန့ၣ်ဒီးအဝဲဃၣ်အသးဒီးထံၣ်ယၤဒီးကိးယၤလီၤ. ယစံးဆၢအီၤ, မ့ၢ်တၢ်ဒိၣ်ဧၢလီၤ.
8 အဝဲသံကွၢ်ယၤလၢယမ့ၢ်မတၤလဲၣ်ဒီးယတဲဘၣ်အီၤလၢယမ့ၢ်ပှၤဧမၤလ့းဖိတဂၤန့ၣ်လီၤ.
9 အန့ၣ်ဒီးအဝဲစံး, ဟဲဖဲအံၤဒီးမၤသံယၤတက့ၢ်. ယဘၣ်ဒိဘၣ်ထံးတ့ၢ်အၢအၢသီသီဒီးဘူးတ့ၢ်မးလၢယကသံလီၤ.
10 လၢတၢ်န့ၣ်အဃိ, ယလဲၤထီၣ်ဆူအအိၣ်ဒီးမၤသံအီၤန့ၣ်လီၤ. အဂ့ၢ်ဒ်အံၤ, ယသ့ၣ်ညါလၢတပူၤဂ့ၤတပူၤဂ့ၤန့ၣ် တုၤအဝဲဒၣ်လီၤဃံၤလၢအဘီလိၤတဘျီဃီန့ၣ်ကသံဝဲဒၣ်လီၤ. အန့ၣ်ဝံၤဒီး, ယဟံးန့ၢ်စီၤပၤအခိၣ်သလုးလၢအဝဲအခိၣ်လိၤဒီး ထံဖှံၣ်လၢအဝဲအစုဒုၣ်လိၤဒီးယဟဲစိာ်လီၤဆူနအိၣ်လီၤ, တၢ်ဒိၣ်ဧၢ.”
11 စီၤဒၤဝံးဖှီယာ်ကွံာ်အကူအသိးတဖၣ်လၢတၢ်သးအုးအပူၤဒီး ကယဲၢ်အပှၤခဲလၢာ်မၤဝဲဒ်န့ၣ်အသိးစ့ၢ်ကီးလီၤ.
12 အဝဲသ့ၣ်သူၣ်အုးသးအုးဝဲဒီးဟီၣ်တၢ်ယၢၤတၢ် ဒီးဒုၣ်တၢ်အီၣ်တၢ်အီတုၤလၢမုၢ်ဟါလီၤအကတီၢ်လၢစီၤစီလူးဒီးစီၤယိနၤသၣ် ဒီးကီၢ်အံၣ်စရ့လး, ယွၤအပှၤဂီၢ်မုၢ်အဂီၢ်န့ၣ်လီၤ. အဂ့ၢ်ဒ်အံၤ, ပှၤဘၣ်တၢ်မၤသံကွံာ်အီၤအါအါကလဲာ်လၢတၢ်ဒုးတၢ် ယၤအပူၤအဃိလီၤ.
13 စီၤဒၤဝံးသံကွၢ်ပှၤသးစၢ်တဂၤ, လၢအဟဲစိာ်န့ၢ်အီၤတၢ်ကစီၣ်န့ၣ်, “နဟဲလၢလဲၣ်ခီလဲၣ်.”
အဝဲဒၣ်စံးဆၢဝဲ, “ယမ့ၢ်ပှၤဧမၤလ့းဖိတဂၤလီၤ. ဘၣ်ဆၣ်ဒီးယအိၣ်ဆိးလၢနထံနကီၢ်အပူၤန့ၣ်လီၤ.”
14 စီၤဒၤဝံးသံကွၢ်အီၤ, “နဒူတုၤဒၣ်လဲာ်နမၤသံစီၤပၤလၢ ယွၤဃုထၢအီၤတဂၤန့ၣ်သ့ဒ်လဲၣ်.”
15 အန့ၣ်ဝံၤဒီး, စီၤဒၤဝံးကိးဃီၤအဝဲအပှၤအကျါတဂၤဒီးစံးဘၣ် အီၤ, “မၤသံကွံာ်အီၤတက့ၢ်.” ပှၤတဂၤန့ၣ်ကျီပှၤဧမၤလ့းဖိတဂၤ န့ၣ်ဒီးမၤသံကွံာ်အီၤန့ၣ်လီၤ.
16 အဂ့ၢ်ဒ်အံၤ, စီၤဒၤဝံးစံးဘၣ်တ့ၢ်ပှၤဧမၤလ့းဖိလၢ, “နဒုးလီၤဘၣ်တၢ်အံၤလၢနလိၤဒၣ်နဲလီၤ. နစံၣ်ညီၣ်ဃၣ်လီၤနသးဖဲနအၢၣ်လီၤတ့ၢ်လၢနမၤသံကွံာ်ပှၤတဂၤလၢ ယွၤဃုထၢအီၤလၢအကကဲထီၣ်စီၤပၤန့ၣ်လီၤ.”
17 စီၤဒၤဝံးသးဝံၣ်တ့ၢ်တၢ်မိၣ်တၢ်မးအတၢ်သးဝံၣ်အံၤလၢ စီၤစီလူးဒီးအဖိခွါစီၤယိနၤသၣ်အဂီၢ်,
18 ဒီးမၤလိာ်ဝဲလၢတၢ်ကသိၣ်လိန့ၢ်ပှၤကီၢ်ယူဒၤအပှၤဂီၢ်မုၢ်န့ၣ်လီၤ. (တၢ်န့ၣ်ဘၣ်တၢ်ကွဲးနီၣ်ကွဲးဃါအီၤလၢစီၤယၤၡၣ်အလံာ်ပူၤန့ၣ်လီၤ.)
19 “လၢကီၢ်အံၣ်စရ့လးအတၢ်လူၢ်တဖၣ်အဖီခိၣ်န့ၣ်ပခိၣ်ပနၢ်တဖၣ်သံဝဲလံ.
ပှၤအဒူကတၢၢ်လၢပပှၤသုးဖိတဖၣ်အကျါလီၤဃံၤကွံာ်ဝဲလံ.
20 ဘိးဘၣ်သ့ၣ်ညါအီၤလၢဝ့ၢ်ကၤသးအပူၤ
မ့တမ့ၢ်လၢဝ့ၢ်အၤၡးကလိၣ်အကျဲဘိတဖၣ်အပူၤ န့ၣ်တဂ့ၤ.
ဒုးသးခုပှၤပိာ်မုၣ်တဖၣ်လၢကီၢ်ဖလ့ၡသးတဂ့ၤ.
ပျဲပှၤတစူၢ်တနာ်ယွၤအဖိမုၣ်တဖၣ်သူၣ်ဖှံသးညီတဂ့ၤ.
21 မ်မူခိၣ်စူၤထံမ့ၢ်ဂ့ၤ, ပစီၤထံမ့ၢ်ဂ့ၤသုတလီၤလၢကံးလဘိ အတၢ်လူၢ်တဖၣ်အဒီခိၣ်တဂ့ၤ.
မ်အစံၣ်ပျီတဖၣ်အိၣ်သယုၢ်အိၣ်လီၤဃီထီဘိတက့ၢ်.
အဂ့ၢ်ဒ်အံၤ, ပှၤအဒူအဃိၤအကတီၤတဖၣ်ဒါလီၤအသးဖဲန့ၣ် လၢတၢ်မဲာ်ဆှးအပူၤလီၤ.
စီၤစီလူးအကတီၤန့ၣ်တဘၣ်တၢ်ဖှူကပီၤထီၣ်အီၤလၢသိ နီတစုလၢၤဘၣ်.
22 စီၤယိနၤသၣ်အချံၣ်န့ၣ်မၤသံတၢ်
ဒီးစီၤစီလူးန့ၣ်တသးကညီၤဘၣ်တၢ်ဘၣ်.
ကျီကွံာ်ပှၤအဂံၢ်ဆူၣ်ဘါဆူၣ်ဒီးမၤသံဒုၣ်ဒါ တဖၣ်န့ၣ်လီၤ.
23 စီၤစီလူးဒီးစီၤယိနၤသၣ်မ့ၢ်ပှၤလီၤလးဒီးပှၤလီၤအဲၣ် လီၤကွံတဖၣ်လီၤ.
မူသကိးဒ်သိးသိးသံသကိးဝဲဒ်သိးသိးန့ၣ်လီၤ.
မ့ၢ်ပှၤချ့န့ၢ်ဒံးလံာ်ကြီကြာ်တဖၣ်ဒီးအဂံၢ်အဘါဆူၣ် န့ၢ်ဒံးခ့ယုၢ်တဖၣ်တက့ၢ်န့ၣ်လီၤ.
24 ကီၢ်အံၣ်စရ့လးအပှၤပိာ်မုၣ်သ့ၣ်ဧၢ, ဟီၣ်တၢ်ယၢၤတၢ်လၢ စီၤစီလူးအဃိတက့ၢ်.
အဝဲဒုးကူဒုးသိးထီၣ်သုလၢတၢ်ကူတၢ်သိးဂီၤဆှူၣ် တဖၣ်,
ဒီးကယၢကယဲသုလၢတၢ်မျၢ်လုၢ်ဒိၣ်ပှ့ၤဒိၣ်တဖၣ်ဒီးထူန့ၣ်လီၤ.
25 ပှၤသုးဖိအဒူအဃိၤတဖၣ်လီၤဃံၤကွံာ်လံ.
အဝဲသ့ၣ်ဘၣ်တၢ်မၤသံကွံာ်အီၤလၢတၢ်ဒုးတၢ်ယၤ ပူၤလံ. စီၤယိၤနၤသၣ်လီၤဃံၤသံဝဲလၢတၢ်လူၢ်ဒီခိၣ် န့ၣ်လီၤ.
26 ယသူၣ်အုးသးအုးလၢနဃိ, ယဒီပုၢ်ဝဲၢ်စီၤယိနၤသၣ်ဧၢ, နလီၤအဲၣ်လၢယဂီၢ်ဒိၣ်မးလဲၣ်.
နတၢ်အဲၣ်လၢယဂီၢ်လီၤလးနးလဲၣ်. ဂ့ၤန့ၢ်ဒိၣ်န့ၢ်ဒံးပိာ်မုၣ်တဖၣ်အတၢ်အဲၣ်တက့ၢ်လီၤ.
27 ပှၤသုးဖိအဒူအဃိၤတဖၣ်လီၤဃံၤကွံာ်လံ. အဝဲသ့ၣ်အစုကဝဲၤ တဖၣ်ဘၣ်တၢ်ပာ်လီၤတဲာ်တ့ၢ်အီၤဒီးတဂိာ်တသီၣ်တၢ်လၢၤဘၣ်.