5
1 ပှၤဖလ့ၡသးဖိတဖၣ်မၤန့ၢ်ယွၤအတၢ်အၢၣ်လီၤအီလီၤအတလါစီဆှံ ဝံၤအလီၢ်ခံန့ၣ်အဝဲသ့ၣ်စိာ်ကွံာ်အီၤလၢဝ့ၢ်အ့ဘ့ၣ်န့စၢ်ဆူ ဝ့ၢ်အၤစဒိးလီၤ.
2 လဲၤစိာ်ဝဲဆူအကစၢ်ဒၤကိၣ်အတၢ်လုၢ်လီၢ်အပူၤ ဒီးပာ်အီၤဖဲတၢ်ဂီၤန့ၣ်အကပၤလီၤ.
3 လၢခံတနံၤမုၢ်ဆ့ၣ်ထီၣ်ဂီၤဂီၤန့ၣ်ပှၤဝ့ၢ်ဖိလၢအၤစဒိးတဖၣ် ထံၣ်ဘၣ်လၢအတၢ်ဂီၤဒၤကိၣ်န့ၣ်လီၤဃံၤအီထီလာ်လၢဟီၣ်ခိၣ်လိၤ လၢယွၤအတၢ်အၢၣ်လီၤအီလီၤအတလါစီဆှံအမဲာ်ညါန့ၣ်လီၤ. မၤသးဒ်န့ၣ်ဒီး, အဝဲသ့ၣ်ဝံၣ်ထီၣ်အီၤဒီးပာ်ကဒါက့ၤအီၤလၢအလီၢ်လီၤ.
4 လၢမုၢ်ဆ့ၣ်ဝါထီၣ်ကဒီးတနံၤဂီၤဂီၤန့ၣ်အဝဲသ့ၣ်ထံၣ်လၢတၢ် ဂီၤန့ၣ်လီၤဃံၤကဒီးလၢယွၤအတၢ်အၢၣ်လီၤအီလီၤအတလါစီဆှံ အမဲာ်ညါန့ၣ်လီၤ. အခဲအံၤတဘျီန့ၣ်အခိၣ်ဒီးအစုတဖၣ်ကၢ်ကွံာ် ဝဲဒီးဒါလီၤအသးလၢတြဲၤအကျဲစၢၤဒီးအိၣ်တ့ၢ်ဒၣ်ထဲအမိၢ်ပှၢ် ဧိၤန့ၣ်လီၤ.
5 (လၢတၢ်န့ၣ်အဃိ, တုၤမုၢ်မဆါတနံၤအံၤ, ဒၤကိၣ်အပှၤလုၢ်တၢ်အခိၣ်တဖၣ် ဒီးပှၤဘူၣ်ထီၣ်ဘါထီၣ်အီၤတဖၣ်ခဲလၢာ်လၢဝ့ၢ်အၤစဒိး အပူၤန့ၣ်လဲၤခီတၢ်လီၢ်န့ၣ်အဖီခိၣ်ဒီးတဟးဝဲဒၣ်လၢအလိၤဘၣ်.)
6 ယွၤစံၣ်ညီၣ်ဝ့ၢ်အၤစဒိးအပှၤဂီၢ်မုၢ်တဖၣ်ဆါဆါကလဲာ်ဒီးမၤပျံၤမၤဖုးအီၤလီၤ. ယွၤစံၣ်ညီၣ်အဝဲသ့ၣ်ဒီးကယဲၢ်ပှၤအိၣ်ဝးတရံးဖဲတၢ်လီၢ်န့ၣ် ခီဖျိတၢ်ဒုးလီၤဘၣ်အဝဲသ့ၣ်လၢ ကအိၣ်ဒီးတၢ်ဆါအချံထီၣ်ဒီးညိး တဖၣ်လီၤ.
7 ဖဲအဝဲသ့ၣ်ထံၣ်လၢတၢ်န့ၣ်မၤအသးဒီးအဝဲသ့ၣ်စံးဝဲ, “ကီၢ်အံၣ်စရ့လးအကစၢ်ယွၤစံၣ်ညီၣ်ပှၤဒီးပကစၢ်ဒၤကိၣ်လီၤ. ပပျဲယွၤအတၢ်အၢၣ်လီၤအီလီၤအတလါအိၣ်ဒီးပှၤယံာ်ယံာ်ဖဲအံၤ တသ့လၢၤဘၣ်.”
8 မၤသးဒ်န့ၣ်ဒီး, အဝဲသ့ၣ်ဆှၢလီၤပှၤစိာ်တၢ်ကစီၣ်တဖၣ်ဒီး ကိးဖှိၣ်ပှၤဖလ့ၡသးဖိအစီၤပၤယဲၢ်ဂၤလိာ်န့ၣ်ဒီးသံကွၢ်ဝဲ, “မ့ၢ်ပကမၤကီၢ်အံၣ်စရ့လးအကစၢ်ယွၤအတၢ်အၢၣ်လီၤအီလီၤအတလါ စီဆှံန့ၣ်ဒ်လဲၣ်.”
အဝဲသ့ၣ်စံးဝဲ, “လဲၤစိာ်အီၤဆူဝ့ၢ်ကၤသးတက့ၢ်.” မၤသးဒ်န့ၣ်ဒီးအဝဲသ့ၣ်လဲၤစိာ်အီၤဆူဝ့ၢ်ကၤသး, လၢအမ့ၢ်ပှၤဖလ့ၡသးဖိအဝ့ၢ်အဂၤတဖျၢၣ်န့ၣ်လီၤ.
9 ဘၣ်ဆၣ်ဒီးဖဲအလဲၤတုၤဃီၤဖဲန့ၣ်န့ၣ်, ယွၤစံၣ်ညီၣ်စ့ၢ်ကီး ဝ့ၢ်အဝဲန့ၣ်, ဒီးဒုးအိၣ်ထီၣ်တၢ်ပျံၤတၢ်ဖုးဖးဒိၣ်လီၤ. အဝဲစံၣ်ညီၣ်အဝဲသ့ၣ်လၢတၢ်ဆါအချံထီၣ်ဒီးညိးတဖၣ်လၢအဘၣ်လၢ ကယဲၢ်ပှၤဝ့ၢ်ဖိခဲလၢာ်သးပှၢ်သးစၢ်ကိးဂၤဒဲးန့ၣ်လီၤ.
10 မၤသးဒ်န့ၣ်ဒီးအဝဲသ့ၣ်ဆှၢလီၤကီၢ်အံၣ်စရ့လးအကစၢ်ယွၤအတၢ် အၢၣ်လီၤအီလီၤအတလါစီဆှံဆူဝ့ၢ်ဧ့ကြိၣ်လၢအမ့ၢ်ပှၤဖလ့ၡသးဖိအဝ့ၢ်အဂၤတဝ့ၢ်န့ၣ်လီၤ. ဘၣ်ဆၣ်ဒီးဖဲအတုၤဖဲန့ၣ်ဒီးပှၤဂီၢ်မုၢ်ကိးပသူထီၣ်ဝဲ, “အဝဲသ့ၣ်ဟဲစိာ်ကီၢ်အံၣ်စရ့လးအကစၢ်ယွၤအတၢ် အၢၣ်လီၤအီလီၤအတလါစီဆှံဖဲအံၤ, ဒ်သိးအကမၤသံပှၤခဲလၢာ်န့ၣ်လီၤ.”
11 မၤကဒီးတစု, အဝဲသ့ၣ်ကိးန့ၢ်ပှၤဖလ့ၡသးဖိအစီၤပၤတဖၣ်ဒီးစံးဝဲ, “ဆှၢက့ၤကီၢ်အံၣ်စရ့လးအတၢ်အၢၣ်လီၤအီလီၤအတလါစီဆှံဆူ အလီၢ်ဒၣ်ဝဲဒ်သိးအသုတမၤသံပှၤဒီးပဟံၣ်ဖိဃီဖိတဖၣ်တဂ့ၤန့ၣ် တက့ၢ်.” တၢ်လီၤပျံၤလီၤဖုးဖးဒိၣ်အိၣ်ဝဲသကုၤလၢဝ့ၢ်ပူၤလၢ ကစၢ်ယွၤစံၣ်ညီၣ်အဝဲသ့ၣ်နးနးကလဲာ်အဃိလီၤ.
12 ပှၤလၢအတသံဘၣ်တဖၣ်ဒၣ်လဲာ်န့ၣ်, ဒိးဘၣ်တၢ်ဆါအချံထီၣ်ဒီးညိးတဖၣ်ဒီး ပှၤဂီၢ်မုၢ်ကိးပသူထီၣ်ဆူအကစၢ်တဖၣ်အအိၣ်လၢတၢ်မၤစၢၤ အဂီၢ်လီၤ.