4
1 ၁ အကတီၢ်ဝဲန့ၣ်ပှၤဖလ့ၡသးဖိတဖၣ်ပာ်ဖှိၣ်ထီၣ်အသးလၢကဒုးတၢ် ထီဒါကီၢ်အံၣ်စရ့လးန့ၣ်လီၤ. မၤသးဒ်န့ၣ်ဒီး, ပှၤအံၣ်စရ့လးဖိတဖၣ်ကျဲၤအသးလၢကဒုးအဝဲသ့ၣ်န့ၣ်လီၤ. ပှၤအံၣ်စရ့လးဖိတဖၣ်သူၣ်ထီၣ်အဒဲဖဲဝ့ၢ်အ့ဘ့ၣ်န့စၢ်ဒီးပှၤ ဖလ့ၡသးဖိတဖၣ်သူၣ်ထီၣ်အဒဲဖဲဝ့ၢ်အဖ့းအပူၤလီၤ.
2 ပှၤဖလ့ၡသးဖိတဖၣ်ဒုးတၢ်ဒီးတၢ်ဒုးဆူၣ်ဝဲဝံၤအလီၢ်ခံအဝဲ သ့ၣ်မၤနၢၤကွံာ်ပှၤအံၣ်စရ့လးဖိတဖၣ်ဒီးမၤသံကွံာ်ပှၤလွံၢ် ကထိလၢတၢ်ဒုးပျီပူၤန့ၣ်လီၤ.
3 ဖဲပှၤအိၣ်မူတ့ၢ်တဖၣ်ဟဲက့ၤဆူတၢ်သူၣ်ဒဲအလီၢ်န့ၣ်, ကီၢ်အံၣ်စရ့လးအခိၣ်အနၢ်တဖၣ်စံးဝဲ, “ဘၣ်မနုၤယွၤပျဲ ပှၤဖလ့ၡသးဖိတဖၣ်မၤနၢၤပှၤတနံၤအံၤန့ၣ်လဲၣ်. မ်ပလဲၤဒီးဟံးန့ၢ်ယွၤအတၢ်အၢၣ်လီၤအီလီၤအတလါစီဆှံလၢ ဝ့ၢ်ၡံလိၤဒ်သိးကလဲၤဃုာ်ဒီးပှၤဒီးအုၣ်က့ၤခီၣ်က့ၤပှၤလၢ ပဒုၣ်ပဒါအစုပူၤအဂီၢ်တက့ၢ်.”
4 မၤသးဒ်န့ၣ်ဒီးအဝဲသ့ၣ်ဆှၢလီၤပှၤစိာ်တၢ်ကစီၣ်တဖၣ်ဆူဝ့ၢ်ၡံလိၤဒီး ဟဲစိာ်ယွၤသ့တၢ်လၢာ်ကစၢ်အတၢ်အၢၣ်လီၤအီလီၤတလါစီဆှံ, လၢတၢ်ပာ်အီၤလၢလီၢ်ပစိာ်အိၣ်လၢတၢ်ဘၣ်တ့အိၣ်ဒီးအဒံးဆ့ လွံၢ်ဂၤအဖီခိၣ်န့ၣ်လီၤ. ဒီးစီၤဧ့လံၤအဖိခွါခံဂၤ, စီၤဃၤမနံဒီးစီၤဖံနဃၣ်ဟဲဃုာ်ဒီး ယွၤအတၢ်အၢၣ်လီၤအီလီၤအတလါစီဆှံန့ၣ်လီၤ.
5 ဒီးတုၤယွၤအတၢ်အၢၣ်လီၤအီလီၤအတလါစီဆှံဟဲတုၤဝဲန့ၣ်ပှၤ အံၣ်စရ့လးဖိတဖၣ်ကိးထီၣ်လၢတၢ်သးခုဖးဒိၣ်အကလုၢ်တုၤဟီၣ် ခိၣ်သတြုးထီၣ်ဝဲလီၤ.
6 ပှၤဖလ့ၡသးဖိတဖၣ်နၢ်ဟူတၢ်ကိးပသူထီၣ်ဒီးစံး, “ကနၣ်ကယဲၢ်တၢ်ကိးပသူထီၣ်အသီၣ်လၢပှၤဧ့ၤဘြံၤဖိတဖၣ် အသူၣ်ဒဲ အလီၢ်အပူၤန့ၣ်တက့ၢ်. အခီပညီမ့ၢ်တၢ်မနုၤလဲၣ်.” ဖဲအဝဲသ့ၣ်, သ့ၣ်ညါဝဲလၢယွၤအတၢ်အၢၣ်လီၤအီလီၤအတလါစီဆှံ ဟဲတုၤဆူပှၤဧ့ၤဘြံၤဖိအသူၣ်ဒဲအလီၢ်န့ၣ်,
7 အဝဲသ့ၣ်ပျံၤတၢ်ဒီးစံး, “ကစၢ်တဂၤဟဲတုၤဆူအဝဲသ့ၣ်သူၣ်အဒဲလီၢ်အပူၤလံ. ပဘၣ်အဖှီၣ်လီၤ. တၢ်ဒ်သိးအံၤလၢညါန့ၣ်တမၤတ့ၢ်အသးဒီးပှၤ နီတစုဘၣ်. ဒီးမ့ၢ်မတၤအုၣ်က့ၤခီၣ်က့ၤပှၤလၢကစၢ်တဖၣ်လၢအစိကမီၤဒိၣ် အံၤအစုပူၤကသ့န့ၣ်လဲၣ်.
8 အဝဲသ့ၣ်မ့ၢ်ကစၢ်တဖၣ်လၢအမၤသံတ့ၢ်ပှၤအဲၤကူပတူးဖိတဖၣ်လၢ မဲးမုၢ်ခိၣ်န့ၣ်လီၤ.
9 ဒီးပှၤဖလ့ၡသးဖိသ့ၣ်ဧၢ, အိၣ်ဒီးသးဒူတက့ၢ်. ဒုးတၢ်ဒ်ပှၤပိာ်ခွါတဖၣ်အသိးတက့ၢ်. မ့တမ့ၢ်ဘၣ်ဒီးပကကဲထီၣ်ပှၤဧ့ၤဘြံၤဖိတဖၣ်အကုၢ်, ဒ်အမ့ၢ်တ့ၢ်ပကုၢ်တဖၣ်အသိးလီၤ. မၤသးဒ်န့ၣ်ဒီးဒုးတၢ်ဒ်ပှၤပိာ်ခွါတဖၣ်အသိးတက့ၢ်.
10 ပှၤဖလ့ၡသးဖိတဖၣ်ဒုးတၢ်ဆူၣ်ဆူၣ်ဒီးမၤနၢၤကွံာ်ပှၤအံၣ်စရ့လးဖိလၢအက့ၤဃ့ၢ်ဆူ အဟံၣ်တဖၣ်အအိၣ်န့ၣ်လီၤ. တၢ်မၤသံမၤဝီဖးဒိၣ်အိၣ်ဝဲဒီးပှၤအံၣ်စရ့လးသုးဖိသၢကလး ဘၣ်တၢ်မၤသံကွံာ်အီၤန့ၣ်လီၤ.
11 ကစၢ်ယွၤအတၢ်အၢၣ်လီၤအီလီၤအတလါစီဆှံန့ၣ်ဘၣ်တၢ်မၤန့ၢ်အီၤ ဒီးစီၤဧ့လံၤအဖိခွါခံဂၤ, စီၤဃၤဖနံဒီးစီၤဖံနဃၣ်ခံဂၤလိာ်ဘၣ်တၢ်မၤသံကွံာ်အီၤန့ၣ်လီၤ.
12 ပှၤတဂၤလၢစီၤဘံၣ်ယၤမံၣ်အဒူၣ်ဃ့ၢ်ကျဲဒီဘိညါစးထီၣ်လၢတၢ်ဒုးပျီ ဆူဝ့ၢ်ၡံလိၤဒီးတုၤဃီၤဖဲန့ၣ်တနံၤဃီလီၤ. လၢတၢ်ဒုးနဲၣ်အတၢ်သးအုးအပူၤဖှီယာ်အဆ့ဒီးပဲထီၣ်ဖၣ်ကမူၣ် လၢအခိၣ်လိၤန့ၣ်လီၤ.
13 စီၤဧ့လံၤလၢအသူၣ်ကိၢ်သးဂီၤတၢ်လၢတၢ်အၢၣ်လီၤအီလီၤအတလါစီဆှံအဃိန့ၣ်, ဆ့ၣ်နီၤဝဲလၢတၢ်လီၢ်တတီၤလၢကျဲကပၤန့ၣ်ဒီး ကွၢ်ဃီၤတၢ်စူကညူးလီၤ. ပှၤတဂၤန့ၣ်ရၤလီၤတၢ်ကစီၣ်သကုၤဝ့ၢ်ဒီဝ့ၢ်ညါဒီးပှၤကိးဂၤ ကိးပသူထီၣ်လၢတၢ်ပျံၤတၢ်ဖုးအပူၤလီၤ.
14 စီၤဧ့လံၤနၢ်ဟူတၢ်သီၣ်တၢ်သဲဒီးသံကွၢ်ဝဲ, “တၢ်သီၣ်တၢ်သဲခဲလၢာ်အံၤမ့ၢ်တၢ်မနုၤလဲၣ်.” ပှၤတဂၤဃ့ၢ်ချ့ချ့ဆူစီၤဧ့လံၤ အအိၣ်ဒီးတဲဘၣ်အီလၢတၢ်ကစီၣ်န့ၣ်လီၤ.
15 (စီၤဧ့လံၤန့ၣ်ခဲအံၤအသးအိၣ်လံခွံဆံဃိးနံၣ်ဒီးအမဲာ်ချံဘူးကခံးလီၤ လၢာ်လၢာ်ဆ့ဆ့လံ.)
16 ပှၤတဂၤန့ၣ်စံးဝဲ, “ယဃ့ၢ်ပူၤဖျဲးလၢတၢ်ဒုးပျီဒီးဟဲက့ၤ ဃ့ၢ်ဆူအံၤကျဲဒီဘိညါတနံၤအံၤလီၤ.”
ဒီးစီၤဧ့လံၤသံကွၢ်အီၤ, “ယဖိခွါဧၢ, တၢ်မၤအသးဒ်လဲၣ်.”
17 ပှၤစိာ်တၢ်ကစီၣ်စံးဆၢဝဲ, “ပှၤအံၣ်စရ့လးဖိဃ့ၢ်ကွံာ်လၢပှၤဖလ့ၡသးဖိအအိၣ်လံ. မ့ၢ်တၢ်မၤနၢၤကွံာ်ပှၤလီၤပျံၤလီၤဖုးလီၤ. လၢန့ၣ်အမဲာ်ညါန့ၣ်နဖိခွါစီၤဃၤဖနံဒီးစီၤဖံနဃၣ်တဖၣ်ဘၣ် တၢ်မၤသံအီၤဒီးကစၢ်ယွၤအတၢ်အၢၣ်လီၤအီလီၤအတလါစီဆှံန့ၣ် ဘၣ်တၢ်မၤန့ၢ်အီၤလံ.”
18 တုၤပှၤတဂၤန့ၣ်ယၢၤထီၣ်ယွၤအတၢ်အၢၣ်လီၤအီလီၤအတလါစီဆှံအဂ့ၢ်န့ၣ် စီၤဧ့လံၤလီၤကဒါဆူလီၢ်ခံလၢအလီၢ်ဆ့ၣ်နီၤဖီခိၣ်ဘူးဒီး ကျဲစၢၤန့ၣ်လီၤ. အဝဲအသးပှၢ်ဒိၣ်မးဒီးဘီၣ်ဒိၣ်မးတုၤဒၣ်လဲာ် အတၢ်လီၤဃံၤန့ၣ်မၤကၢ်ကွံာ်အကိာ်ဒီးသံဝဲဒၣ်လီၤ. အဝဲမ့ၢ်တ့ၢ်ကီၢ်အံၣ်စရ့လးအခိၣ်အနၢ်တဂၤလၢအနံၣ်လွံၢ်ဆံ အပူၤန့ၣ်လီၤ.
19 စီၤဧ့လံၤအဒဲၣ်မုၣ်, စီၤဖံနဃၣ်အမါအိၣ်ဒီးအဟုးအသးဒီးဘူး ထီၣ်လၢကဆံးစၢ်ထီၣ်အဖိလံ. ဖဲအနၢ်ဟူဝဲလၢကစၢ်ယွၤအတၢ်အၢၣ်လီၤအီလီၤအတလါစီဆှံ ဘၣ်တၢ်မၤန့ၢ်အီၤဒီးအမံၤပှၢ်ဒီးအဝၤသံဝဲဒၣ်အဂ့ၢ်န့ၣ်အဝဲ အဟုးဆါထီၣ်သတူၢ်ကလာ်ဒီးဆံးစၢ်ထီၣ်အဖိလီၤ.
20 ဘူးလၢအကသံန့ၣ်ပိာ်မုၣ်လၢအမၤစၢၤအီၤန့ၣ်စံးဘၣ်အီၤ, “အိၣ်ဒီးတၢ်သးဒူတက့ၢ်. နမၤန့ၢ်ဖိခွါတဂၤလီၤ.” ဘၣ်ဆၣ်ဒီးတကနာ်ဃုာ်ဝဲဘၣ်ဒီးတစံးဆၢအီၤတၢ်နီတမံၤဘၣ်.
21 ပိာ်မုၣ်န့ၣ်ယုၢ်အဖိအမံၤလၢစီၤအံကဘိး, အခီပညီမ့ၢ်ဝဲ, “ကစၢ်ယွၤအလၤကပီၤပာ်တ့ၢ်ကွံာ်ကီၢ်အံၣ်စရ့လးလီၤ.” မ့ၢ်တၢ်ဒုးနဲၣ်လၢတၢ်မၤန့ၢ်ယွၤအတၢ်အၢၣ်လီၤအီလီၤအတလါစီ ဆှံဒီးအမံၤပှၢ်ဒီးအဝၤအတၢ်သံန့ၣ်အပနီၣ်လီၤ.
22 အဝဲဒၣ်စံးဝဲ, “ကစၢ်ယွၤအလၤကပီၤပာ်တ့ၢ်ကွံာ်ကီၢ်အံၣ်စရ့လးလံ. အဂ့ၢ်ဒ်အံၤကစၢ်ယွၤအတၢ်အၢၣ်လီၤအီလီၤအတလါ စီဆှံဘၣ်တၢ်မၤန့ၢ်အီၤလံ.”