28
1 လၢခံတယံာ်ဘၣ်န့ၣ်, ပှၤဖလ့ၡသးဖိတဖၣ်ပာ်ဖှိၣ်ထီၣ်အသုးမုၢ်သံၣ်ဘိ ဒ်သိးကဒုးပှၤအံၣ်စရ့လးဖိတဖၣ်ဒီးစီၤအၤကံၣ်စံးဘၣ် စီၤဒၤဝံး, “နနၢ်ပၢၢ်လၢနၤဒီးနပှၤတဖၣ်ကဘၣ်ဒုးတၢ်လၢယအိၣ်တကပၤလီၤ.”
2 စီၤဒၤဝံးစံးဝဲဒၣ်, “မ့ၢ်သၢၣ်. ယမ့ၢ်နခ့နပှၤဒီးနကထံၣ်ဘၣ် တၢ်လၢယမၤအီၤသ့န့ၣ်လၢနနီၢ်ကစၢ်ဒၣ်နဲလီၤ.”
စီၤအၤကံၣ်စံးဝဲ, “ဂ့ၤလံ. ယကဒုးကဲထီၣ်နၤလၢပှၤခိးယသးသမူဂၢၢ်ဂၢၢ်ကျၢၤကျၢၤလီၤ.”
3 ခဲအံၤ, စီၤၡမူၤအ့လးသံဝဲလံ. ဒီးကယဲၢ်ပှၤအံၣ်စရ့လးဖိ ခဲလၢာ်ဟီၣ်တၢ်ယၢၤတၢ်လၢအဂီၢ်ဒီးခူၣ်လီၤကွံာ်အီၤလၢအဟံၣ် အိၣ်အလီၢ်လၢဝ့ၢ်ရၤမါအပူၤလီၤ. စီၤစီလူးမၢဆူၣ်ပှၤဖးတၢ်ဟဲဝံဟဲစိာ်ဒီးပှၤကိးတၢ်အကလၤတဖၣ် လၢကဟးထီၣ်ကွံာ်လၢကီၢ်အံၣ်စရ့လးအပူၤလီၤ.
4 ပှၤဖလ့ၡသးဖိအသုးမုၢ်တဖၣ်ပာ်ဖှိၣ်ထီၣ်အသးဒီးသူၣ်လီၤအဒဲ ဖဲအဘူးဒီးဝ့ၢ်ၡူန့ၣ်လီၤ. စီၤစီလူးပာ်ဖှိၣ်ပှၤအံၣ်စရ့လးဖိတဖၣ်ဒီးသူၣ်လီၤအဒဲဖဲ ကစၢၢ်ကံးလဘိန့ၣ်လီၤ.
5 ဖဲစီၤစီလူးထံၣ်ပှၤဖလ့ၡသးဖိတဖၣ်အသုးမုၢ်ဒီးအဝဲပျံၤတၢ် ဖုးတၢ်နးနးကလဲာ်လီၤ.
6 မၤသးဒ်န့ၣ်ဒီး, အဝဲသံကွၢ်ယွၤလၢကဘၣ်မၤတၢ်မနုၤလဲၣ်န့ၣ်လီၤ. ဘၣ်ဆၣ်ဒီးလၢတၢ်မံမီၢ်မ့ၢ်ဂ့ၤ, လၢအူရံၣ်ဒီးတူမံၢ်မ့ၢ်ဂ့ၤ, ခီဖျိဝံတဖၣ်မ့ၢ်ဂ့ၤန့ၣ်, ယွၤတစံးဆၢအီၤနီတမံၤဘၣ်.
7 အန့ၣ်ဒီးစီၤစီလူးဟ့ၣ်လီၤအကလုၢ်ဆူအသုးခိၣ်သုးနၢ်တဖၣ် အအိၣ်ဒီးစံးဝဲ, “ဃုန့ၢ်ယၤပှၤပိာ်မုၣ်တဂၤလၢအကိးပှၤအကလၤဒီးယကလဲၤဒီးသံကွၢ်တၢ်ဒီးအီၤန့ၣ်လီၤ.”
အဝဲသ့ၣ်စံးဘၣ်အီၤ, “အိၣ်လၢဝ့ၢ်ဧ့ၣ်ဒိၢ်အပူၤတဂၤန့ၣ်လီၤ.”
8 မၤသးဒ်န့ၣ်ဒီး, စီၤစီလူးပျိာ်လီၤဆီအက့ၢ်အဂီၤ, ဒီးကူထီၣ်သိးထီၣ်တၢ်ကူတၢ်သိးအဂၤ, ဒီးဖဲမုၢ်ခံးလီၤန့ၣ် အဝဲဒီးအပှၤခံဂၤလဲၤတၢ်ဒ်သိးကထံၣ်လိာ်ဒီးပိာ်မုၣ်န့ၣ်လီၤ. စီၤစီလူးစံးဘၣ်ပိာ်မုၣ်န့ၣ်, “ကူၣ်လိာ်တၢ်ဒီးပှၤသံတဖၣ်အကလၤဒီး တဲယၤလၢတၢ်မနုၤကမၤအသးတက့ၢ်. ကိးထီၣ်ပှၤလၢယတဲအမံၤတဂၤအကလၤတက့ၢ်.”
9 ပိာ်မုၣ်န့ၣ်စံးဆၢအီၤ, “နသ့ၣ်ညါသပှၢ်တၢၢ်လၢစီၤစီလူးမၤတၢ်မနုၤမနုၤန့ၣ်လီၤ. အဝဲမၢဆူၣ်ပှၤဖးတၢ်ဟဲဝံဟဲစိာ်တဖၣ်ဒီးပှၤကိးတၢ်အကလၤတဖၣ် လၢအကဟးထီၣ်ကွံာ်လၢကီၢ်အံၣ်စရ့လးအပူၤလီၤ. အန့ၣ်သတးဒီး, နဂဲၤလိာ်ပာ်ပျံၤသကွီၤလၢယဂီၢ်ဒီးလၢတၢ်ကမၤသံယၤအဂီၢ်န့ၣ်ဘၣ်မနုၤလဲၣ်.”
10 တုၤနုၤတစုစီၤစီလူးမၤတၢ်ဆိၣ်စီဆှံတခါစံးဝဲ, “ယအၢၣ်လီၤခီဖျိယွၤလၢအမူဝဲတဂၤအမံၤ, လၢနမၤတၢ်အံၤအဃိဒီးနတဘၣ်တၢ်စံၣ်ညီၣ်နၤဘၣ်န့ၣ်လီၤ.”
11 ပိာ်မုၣ်န့ၣ်သံကွၢ်အီၤ, “ယကဘၣ်ကိးန့ၢ်နၤလၢမတၤတဂၤလဲၣ်.”
စီၤစီလူးစံးဝဲ, “စီၤၡမူၤအ့လးလီၤ.”
12 ဖဲပိာ်မုၣ်န့ၣ်ထံၣ်ဘၣ်စီၤၡမူၤအ့လးဒီးကိးကလူဝဲဒီးစံး ဘၣ်စီၤစီလူး, “ဘၣ်မနုၤလၢနလံၣ်အီၣ်လီအီၣ်ယၤလဲၣ်. နမ့ၢ်စီၤပၤစီၤစီလူးလီၤ.”
13 စီၤစီလူးစံးဘၣ်ပိာ်မုၣ်န့ၣ်, “ပျံၤတၢ်တဂ့ၤ. နထံၣ်တၢ်မနုၤလဲၣ်.”
ပိာ်မုၣ်စံးဆၢဝဲ, “ယထံၣ်ဘၣ်ပှၤအကလၤတဂၤဟဲထီၣ်လၢဟီၣ်ခိၣ်လာ်လီၤ.”
14 စီၤစီလူးသံကွၢ်ဝဲ “တၢ်န့ၣ်လီၤဂာ်ဒီးမနုၤလဲၣ်.”
ဒီးပိာ်မုၣ်န့ၣ်စံးဆၢဝဲ, “တၢ်န့ၣ်မ့ၢ်ပှၤပိာ်ခွါသးပှၢ် တဂၤဟဲထီၣ်ဝဲလီၤ. အဝဲသိးဃာ်ဆ့ကၤဖးထီတဘ့ၣ်လီၤ.”
တုၤနုၤတစု, စီၤစီလူးသ့ၣ်ညါဝဲလၢအမ့ၢ်စီၤၡမူၤအ့လး ဒီးတီၤလီၤဝဲဒၣ်ဆူဟီၣ်ခိၣ်လိၤလၢတၢ်ယူးယီၣ်ပာ်ကဲအပူၤလီၤ.
15 စီၤၡမူၤအ့လးစံးဘၣ်စီၤစီလူး, “ဘၣ်မနုၤနမၤတံာ်တာ်ယၤလဲၣ်. ဘၣ်မနုၤနမၢယဟဲက့ၤလဲၣ်.”
စီၤစီလူးစံးဆၢဝဲဒၣ်, “ယအိၣ်လၢတၢ်ကီတၢ်ခဲဖးဒိၣ်အပူၤလီၤ. ပှၤဖလ့ၡသးဖိတဖၣ်ဒုးတၢ်ဒီးယၤလီၤ. ဒီးကစၢ်ယွၤတကနၣ်ဃုာ်ယၤဘၣ်. အဝဲတစံးဆၢယၤခီဖျိ ဝံမ့ၢ်ဂ့ၤ, တၢ်မံမီၢ်မ့ၢ်ဂ့ၤနီတစဲးလၢၤဘၣ်. လၢတၢ်န့ၣ်အဃိ ယကိးနၤလၢနကတဲဘၣ်ယၤ, လၢကဘၣ်မၤမနုၤလဲၣ်အဂ့ၢ်န့ၣ်လီၤ.”
16 စီၤၡမူၤအ့လးစံးဝဲဒၣ်, “တုၤကစၢ်ယွၤကဲထီၣ်နဒုၣ်နဒါဒီး တကနၣ်ဃုာ်နၤန့ၣ်ဘၣ်မနုၤနကိးယၤလဲၣ်.
17 ယွၤမၤဘၣ်တ့ၢ်နၤဒ်အစံးတ့ၢ်ဝဲခီဖျိယၤအသိးန့ၣ်လီၤ. အဝဲဟံးထီၣ်ကွံာ်ဘီမုၢ်လၢနစုပူၤဒီးလၢနလီၢ်န့ၣ်ဟ့ၣ်လီၤ ဝဲဆူစီၤဒၤဝံးအအိၣ်လၢနလီၢ်လံ.
18 နတစူၢ်ဘၣ်ယွၤအကလုၢ်ဒီးနတမၤဟးဂီၤတ့ၢ်ပှၤဧမၤလ့းဖိဒီး ကယဲၢ်တၢ်အိၣ်ဒီးအဝဲသ့ၣ်ခဲလၢာ်န့ၣ်ဘၣ်. တၢ်န့ၣ်မ့ၢ်တၢ်ဂ့ၢ်လၢယွၤမၤတၢ်အံၤလၢနၤလၢမုၢ်မဆါတမံၤအံၤလီၤ.
19 အဝဲကဟ့ၣ်လီၤနၤဒီးကီၢ်အံၣ်စရ့လးဆူပှၤဖလ့ၡသးဖိတဖၣ်အစု ပူၤလီၤ. ခဲမုၢ်ဆ့ၣ်န့ၣ်နၤဒီးနဖိခွါတဖၣ်ကလဲၤသကိးဒီးယၤ ဒီးယွၤကဟ့ၣ်လီၤကီၢ်အံၣ်စရ့လးအသုးမုၢ်ဆူပှၤဖလ့ၡသးဖိတဖၣ်အစုပူၤလီၤ.”
20 တဘျီဃီန့ၣ်စီၤစီလူးဒါလီၤအသးဘျၢယူာ်ကလာ်လၢဟီၣ်ခိၣ်လိၤ, ပျံၤတၢ်နးနးကလဲာ်ခီဖျိစီၤၡမူၤအ့လးအတၢ်ကတိၤအဃိ န့ၣ်လီၤ. အဝဲဒၣ်အဂံၢ်ဘါစၢ်ဝဲ, မ့ၢ်လၢ, သ့တနံၤကျၢၤသီတနၤကျၢၤန့ၣ်တအီၣ်တၢ်နီတမံၤဘၣ်အဃိလီၤ.
21 ပိာ်မုၣ်တဂၤန့ၣ်လဲၤဆူအအိၣ်ဒီးထံၣ်လၢအဝဲပျံၤတၢ်နးနးကလဲာ်အဃိစံးဘၣ်အီၤ, “တၢ်ဒိၣ်ဧၢ, ဝံသးစူၤတက့ၢ်. ယဟ့ၣ်လီၤယသးသမူခီဖျိယညိကွံာ်ယသးဒ်နဃ့တၢ်အသိးန့ၣ်လီၤ.
22 ခဲအံၤဝံသးစူၤမၤဒ်ယဃ့ကညးနၤအသိးတက့ၢ်. ပျဲယကတဲာ်ကတီၤတၢ်အီၣ်တနီၤလၢနဂီၢ်တက့ၢ်. နဘၣ်အီၣ်တၢ်ဒ်သိးနဂံၢ်နဘါကအိၣ်လၢတၢ်လဲၤတၢ်က့ၤအဂီၢ်လီၤ.”
23 စီၤစီလူးဂ့ၢ်လိာ်ဝဲဒီးစံးလၢအဝဲတအီၣ်တၢ်နီတမံၤဘၣ်. ဘၣ်ဆၣ်ဒီးအသုးခိၣ်သုးနၢ်တဖၣ်မၢဆူၣ်အီၤဒ်သိးကအီၣ်တၢ်အဂီၢ်လီၤ. လၢခံကတၢၢ်န့ၣ်အဝဲတူၢ်လိာ်ဝဲဒီးဂဲၤဆၢထၢၣ်လၢဟီၣ်ခိၣ်ဒီး ဆ့ၣ်နီၤလၢလီၢ်မံခးအလိၤလီၤ.
24 ပိာ်မုၣ်န့ၣ်မၤချ့ချ့ဒီးမၤသံဂီၤဖံးတဒုလၢအဘုၣ်ဘီၣ်ထီၣ် တ့ၢ်ဃာ်ဝဲန့ၣ်လီၤ. အန့ၣ်ဝံၤဒီးဟံးန့ၢ်ဝဲကိၣ်ကမူၣ်တနီၤ, ကတဲာ်ကတီၤအီၤဒီးဘၢမံကိၣ်လၢတအိၣ်ဒီးကိၣ်မံၣ်ဘၣ်န့ၣ်လီၤ.
25 အဝဲပာ်လီၤတၢ်အီၣ်တၢ်အီလၢစီၤစီလူးဒီးအသုးခိၣ်သုးနၢ် တဖၣ်အမဲာ်ညါဒီးအဝဲသ့ၣ်အီၣ်ဝဲလီၤ. ဒီးလၢတနၤဃီအပူၤန့ၣ်အဝဲသ့ၣ်ဟးထီၣ်ကွံာ်ဝဲဒၣ်လီၤ.