27
1 စီၤဒၤဝံးစံးလီၤအသး, “လၢမုၢ်နံၤတဖၣ်အံၤအပူၤတနံၤနံၤ န့ၣ်စီၤစီလူးကမၤသံယၤလီၤ. တၢ်အဂ့ၤကတၢၢ်လၢယကြၢးမၤန့ၣ်, မ့ၢ်တၢ်ဃ့ၢ်ပူၤဖျဲးဆူကီၢ်ဖလ့ၡသးအပူၤလီၤ. အန့ၣ်တစု, စီၤစီလူးကဆိကတီၢ်အတၢ်လူၤဃုယၤလၢကီၢ်အံၣ်စရ့လးအပူၤဒီးယကပူၤဖျဲးလီၤ.”
2 မၤသးဒ်န့ၣ်ဒီးစီၤဒၤဝံးဒီးအပှၤအဂၤဃုကယၤန့ၣ်လဲၤတဘျီဃီ ဆူဝ့ၢ်ကၤသးဆူစီၤမၤဧိးအဖိခွါစီၤပၤစီၤအၤကံၣ်အအိၣ်လီၤ.
3 စီၤဒၤဝံးဒီးအပှၤအဂၤဃုကယၤသူၣ်လီၤဆီလီၤအသးဖဲန့ၣ်လၢ ဝ့ၢ်ကၤသးဃုာ်ဒီးအဒူၣ်ဖိထၢဖိတဖၣ်လီၤ. စီၤဒၤဝံးအိၣ်ဃုာ်ဒီးအမါခံဂၤလၢအမ့ၢ်, ပှၤယံးစရ့လးမုၣ်နီၢ်အဃံနိၣ်, ဒီးပှၤကၤမ့လးမုၣ်နီၢ်အဘံၤကါယံးလးလၢအမ့ၢ်တ့ၢ်စီၤနၤဘလးအမါန့ၣ်လီၤ.
4 ဖဲစီၤစီလူးနၢ်ဟူလၢစီၤဒၤဝံးဃ့ၢ်ဆူဝ့ၢ်ကၤသးဒီးအဝဲ ဆိကတီၢ်ကွံာ်အတၢ်ဃုစီၤဒၤဝံးန့ၣ်လီၤ.
5 စီၤဒၤဝံးစံးဘၣ်စီၤအၤကံၣ်, “နမ့မ့ၢ်ယတံၤသကိးဒီးပျဲ ယဟံးန့ၢ်ဝ့ၢ်ဖိတဝ့ၢ်လၢယကအိၣ်ကဆိးလၢအပူၤတက့ၢ်. တၢ်ဒိၣ်ဧၢ, အတွးတအိၣ်ဘၣ်လၢယဂီၢ်လၢယကအိၣ်ဆိးဒီးနၤလၢဝ့ၢ်ခိၣ်အပူၤဘၣ်.
6 မၤသးဒ်န့ၣ်ဒီး, စီၤအၤကံၣ်ဟ့ၣ်အီၤဝ့ၢ်ဖိစံးကလးဒီးလၢတၢ် ဂ့ၢ်အံၤအဃိစးထီၣ်ဖဲန့ၣ်ဝ့ၢ်စံးကလးဘၣ်ဃးဒီးကီၢ်ယူဒၤ အစီၤပၤတဖၣ်န့ၣ်လီၤ.
7 စီၤဒၤဝံးအိၣ်ဆိးလၢကီၢ်ဖလ့ၡသးအပူၤတဆံဃုလါလီၤ.
8 အကတီၢ်ဖဲန့ၣ်, စီၤဒၤဝံးဒီးအပှၤတဖၣ်လဲၤဒုးပှၤဂီၢ်မုၢ်လၢ ဝ့ၢ်ကၡူၢ်, ဝ့ၢ်က့စ့ၢ်, ဒီးကီၢ်ဧမၤလ့းလၢအအိၣ်ဖဲန့ၣ်ယံာ်တ့ၢ်လံ န့ၣ်လီၤ. စီၤဒၤဝံးဂုာ်ဆူၣ်အဝဲသ့ၣ်အကီၢ်တုၤလၢဝ့ၢ်ၡူၢ်ဒီး ကျဲဒီဘိပၢၢ်လၢကီၢ်အဲၤကူပတူး,
9 ဒီးမၤသံကွံာ်ဝဲကယဲၢ်ပှၤပိာ်ခွါတဖၣ်, ပိာ်မုၣ်တဖၣ်ဒီးဟံး န့ၢ်ကွံာ်အသိ, ဂီၤဘုၣ်ဂီၤဖံး, ကသ့ၣ်ယီၤ, ကီၤလၤအူးဒီးအတၢ်ကူတၢ်သိးတဖၣ်ဒၣ်လဲာ်လီၤ. အန့ၣ်ဝံၤဒီးအဝဲဟဲက့ၤဆူစီၤအၤကံၣ်အအိၣ်လီၤ.
10 စီၤအၤကံၣ်သံကွၢ်အီၤ, “ခဲအံၤတဘျီနလဲၤဒုးတၢ်ဂုာ်တၢ်ဖဲလဲၣ်.” စီၤဒၤဝံးစံးဆၢဝဲလၢ, အဝဲလဲၤလီၤဆူကီၢ်ယူဒၤအကလံၤထံး, မ့တမ့ၢ်ဆူပှၤယရၤဃမအ့လးဖိအဒူၣ်ထၢအလီၢ်ကဝီၤ, မ့တမ့ၢ်ပှၤက့ၣ်ဖိအိၣ်ဆိးအလီၢ်ကဝီၤန့ၣ်လီၤ.
11 စီၤဒၤဝံးမၤသံကွံာ်ဝဲပိာ်ခွါတဖၣ်ဒီးပိာ်မုၣ်တဖၣ်ခဲလၢာ် ဒ်သိးပှၤလဲၤကဒါက့ၤဆူဝ့ၢ်ကၤသးဒီးတဲဖျါထီၣ်တၢ်ဘၣ်ဃးဒီးအဝဲဒၣ်ဒီး အပှၤတဖၣ်မၤတ့ၢ်တၢ်နီၢ်နီၢ်န့ၣ်အသုတအိၣ်နီတဂၤ တဂ့ၤအဂီၢ်လီၤ. တၢ်အံၤမ့ၢ်တၢ်လၢစီၤဒၤဝံးမၤတ့ၢ်ဝဲဒီကတီၢ်ညါဖဲအဝဲအိၣ်လၢ ကီၢ်ဖလ့ၡသးအပူၤအခါန့ၣ်လီၤ.
12 မ့မ့ၢ်ဒီးစီၤအၤကံၣ်နာ်စီၤဒၤဝံးဒီးစံးလီၤအသး, “အဝဲဘၣ်တၢ်သးဟ့အီၤနးနးကလဲာ်လၢ အပှၤကလုာ်ပှၤအံၣ်စရ့လးဖိဒၣ်ဝဲ ဒီးအဝဲကဘၣ်မၤယခ့ယပှၤအတၢ်မၤလၢအတၢ်အိၣ်မူတစိၤဒၣ်အီၤန့ၣ်လီၤ.”