2
1 နီၢ်ဃးနၤဘါထုကဖၣ်ဝဲ,
“ယွၤမၤပှဲၤတ့ၢ်ယသးဒီးတၢ်သူၣ်ခုသးခု
လၢတၢ်လၢအမၤတ့ၢ်ဝဲအဃိန့ၣ်ယသူၣ်ဖှံသးညီ ဆံးဒိၣ်လဲၣ်.
ယနံၤဘၣ်ယဒုၣ်ယဒါတဖၣ်,
ယသူၣ်ခုသးခုဒိၣ်မးလဲၣ်. အဂ့ၢ်ဒ်အံၤ, ကစၢ်ယွၤမၤစၢၤတ့ၢ်ယၤလီၤ.
2 ပှၤစီဆှံဒ်ယွၤတအိၣ်ဝဲနီတဂၤဘၣ်.
ပှၤလီၤဂာ်ဒီးအီၤတအိၣ်နီတဂၤဘၣ်.
ပှၤဒီဒၣ်အိၣ်ပှိၤပှၤဒ်ပကစၢ်ယွၤတအိၣ်ဘၣ်.
3 ဆိကတီၢ်ကွံာ်နတၢ်ကတိၤဒိၣ်ကတိၤသွါနသးလၢနကလုၢ်ဖးဒိၣ်န့ၣ်တက့ၢ်.
မၤဘှ့ၣ်ဘှီၣ်နတၢ်ကတိၤဒိၣ်ကတိၤသွါတဖၣ်တက့ၢ်.
အဂ့ၢ်ဒ်အံၤ, ယွၤန့ၣ်မ့ၢ်ကစၢ်ယွၤလၢအသ့ၣ်ညါတၢ်,
ဒီးအဝဲစံၣ်ညီၣ်ကယဲၢ်ပှၤဂီၢ်မုၢ်အမၤတၢ်န့ၣ်လီၤ.
4 ပှၤသုးဖိအဂံၢ်အဘါဆူၣ်တဖၣ်အချံၣ်န့ၣ်တၢ်မၤကၢ်အီၤ,
မ့မ့ၢ်ပှၤအဂံၢ်စၢ်ဘါစၢ်န့ၣ်အဂံၢ်အဘါဆူၣ်ထီၣ်လီၤ.
5 ပှၤဂီၢ်မုၢ်လၢတဘျီအီၣ်ကုးအီပှဲၤန့ၣ်,
ခဲအံၤလဲၤထီၣ်ဒိးလဲအသးလၢကန့ၢ်ဘၣ်တၢ်အီၣ်အဂီၢ်လီၤ.
မ့မ့ၢ်ပှၤလၢတၢ်သၣ်ဝံၤအသးတဖၣ်န့ၣ်, တသၣ်ဝံၤလၢၤနီတစု လၢၤဘၣ်.
မါလၢအဖိတအိၣ်တဖၣ်န့ၣ်ဆံးစၢ်ထီၣ်အဖိနွံဂၤလီၤ.
မ့မ့ၢ်မိၢ်လၢအဖိအိၣ်အါဂၤန့ၣ်အဖိတအိၣ်လၢၤနီတဂၤဂၤဘၣ်.
6 ယွၤမၤသံတၢ်ဒီးဟ့ၣ်ဒုးမူက့ၤတၢ်လီၤ.
အဝဲဆှၢလီၤပှၤဂီၢ်မုၢ်ဆူပှၤသံတဖၣ်အကီၢ်ပူၤ,
ဒီးကိးက့ၤအဝဲသ့ၣ်လီၤ.
7 အဝဲဒုးဖှီၣ်ပှၤတနီၤဒီးအဂၤတနီၤန့ၣ်ဒုးကဲဒိၣ်ဝဲလီၤ.
အဝဲဆီၣ်လီၤပှၤတနီၤဒီးအဂၤတနီၤန့ၣ်မၤဒိၣ်မၤသွါ ဝဲလီၤ.
8 အဝဲဝံၢ်ဆၢထၢၣ်ပှၤဖှီၣ်ဖိလၢဖၣ်ကမူၣ်အကျါဒီးဒုးဂဲၤဆၢထၢၣ် ပှၤတလၢတပှဲၤတဖၣ်လၢအတၢ်ဖှီၣ်တၢ်ယာ်အပူၤလီၤ.
အဝဲဒုးကဲထီၣ်အဝဲသ့ၣ်လၢစီၤပၤဖိတဖၣ်အတံၤသကိး,
ဒီးပာ်ထီၣ်အီၤလၢတၢ်လၤကပီၤအလီၢ်တဖၣ်န့ၣ်လီၤ. ဟီၣ်ခိၣ်အခီၣ်ထံးတဖၣ်န့ၣ်ဘၣ်ဃးဒီးယွၤလီၤ.
လၢအဝဲသ့ၣ်အဖီခိၣ်န့ၣ်ယွၤသူၣ်ထီၣ်ဟီၣ်ခိၣ်န့ၣ်လီၤ.
9 အဝဲဒီဒၣ်အိၣ်ပှိၤအပှၤလၢအသူၣ်တီသးလိၤတဖၣ်အသးသမူလီၤ.
မ့မ့ၢ်ပှၤတတီတလိၤတဖၣ်န့ၣ်ကလီၤမၢ်ကွံာ်လၢတၢ်ခံးတၢ်နၤအပူၤလီၤ.
ပှၤတဂၤန့ၣ်မၤနၢၤတၢ်လၢအဂံၢ်အဘါဒၣ်ဝဲတသ့ဘၣ်.
10 ယွၤအဒုၣ်အဒါတဖၣ်န့ၣ်ကဘၣ်တၢ်မၤ ဟးဂီၤကွံာ်အီၤလီၤ.
အဝဲကမၤသီၣ်, လီသီၣ်လီသဲထီဒါအဝဲသ့ၣ်လၢမူခိၣ်လီၤ.
ယွၤကစံၣ်ညီၣ်ဟီၣ်ခိၣ်ဒီဘ့ၣ်ညါလီၤ.
အဝဲကဟ့ၣ်လီၤတၢ်စိတၢ်ကမီၤလၢအစီၤပၤတဖၣ်လီၤ.
အဝဲကမၢအစီၤပၤလၢအဃုထၢဝဲန့ၣ်မၤန့ၢ်မၤနၢၤတၢ်န့ၣ်လီၤ.
11 ဒီးစီၤအ့လကါနၤက့ၤကဒါက့ၤဆူအဟံၣ်လၢဝ့ၢ်ရၤမါလီၤ. မ့မ့ၢ်စီၤၡမူၤအ့လးအိၣ်တ့ၢ်ဝဲလၢဝ့ၢ်ၡံလိၤဒီးမၤယွၤ အတၢ်မၤလၢစီၤဧ့လံၤအဖီလာ်လီၤ.
12 စီၤဧ့လံၤအဖိခွါတဖၣ်န့ၣ်မ့ၢ်ပှၤတတီတလိၤတဖၣ်လီၤ. အဝဲသ့ၣ်တပာ်ကဲယွၤအကလုၢ်မ့ၢ်ဂ့ၤ,
13 တၢ်သိၣ်တၢ်သီဘၣ်ဃးဒီးပှၤလုၢ်တၢ်အခိၣ်တဖၣ်ကဘၣ်ဃ့တၢ်လၢပှၤ ဂီၢ်မုၢ်အအိၣ်မ့ၢ်ဂ့ၤန့ၣ်ဘၣ်. အခိၣ်တလိာ်, ဖဲပှၤတဂၤမၤဘူၣ်တၢ်လုၢ်တၢ်ပာ်န့ၣ်ပှၤလုၢ်တၢ်အခိၣ် အခ့အပှၤတဖၣ်ကဟဲလၢနီၣ်ကွးအကနၣ်အိၣ်သၢဘ့ၣ်ဒီး ဖဲတၢ်ဖံးတၢ်ညၣ်ဘၣ်တၢ်ဖီအီၤအဖၢမုၢ်န့ၣ်,
14 အဝဲကဘျုးလီၤအနီၣ်ကွးဆူသပၢၤဖီတၢ်အပူၤဒီးတၢ်တမံၤလၢ်လၢ် လၢနီၣ်ကွးထုးထီၣ်ဝဲန့ၣ်ဘၣ်ဃးဒီးပှၤလုၢ်တၢ်အခိၣ်လီၤ. ကယဲၢ်ပှၤအံၣ်စရ့လးဖိလၢအဟဲဆူဝ့ၢ်ၡံလိၤဒ်သိးကမၤဘူၣ်တၢ်လုၢ်တၢ်ပာ်တဖၣ်န့ၣ် ဘၣ်တၢ်မၤအီၤဒ်န့ၣ်အသိးလီၤ.
15 လၢတၢ်န့ၣ်အမဲာ်ညါ, တချုးဒၣ်လဲာ်လၢတၢ်အသိဘၣ်တၢ်ထုးထီၣ်ဒီး ဆူးကဲၤထီၣ်အီၤန့ၣ်, ပှၤလုၢ်တၢ်အခိၣ်အခ့အပှၤကဟဲဝဲဒီးစံးဘၣ်ပှၤလၢအမၤဘူၣ် တၢ်လုၢ်တၢ်ပာ်တဖၣ်န့ၣ်, “ဟ့ၣ်ယၤတၢ်ဖံးတၢ်ညၣ်တနီၤလၢပှၤလုၢ်တၢ်အခိၣ်ကဖီအီၣ်ကၣ်အီၣ် အဂီၢ်တက့ၢ်. အဝဲတတူၢ်လိာ်တၢ်ညၣ်ချီအသးလၢနအိၣ်, တၢ်ညၣ်သံကစဲာ်န့ၣ်ဘၣ်.”
16 ပှၤတဂၤန့ၣ်မ့ၢ်စံးဆၢ, “ပျဲပမၤတၢ်အဘၣ်ဒီးဆူးကဲၤထီၣ်တၢ် အသိလၢညါတက့ၢ်. အန့ၣ်ဝံၤဒီးဟံးန့ၢ်တၢ်လၢနသးလီအီၤတက့ၢ်,” ဒီးပှၤလုၢ်တၢ်အခိၣ်အခ့အပှၤန့ၣ်ကစံးဝဲဒၣ်, “တသ့ဘၣ်. ဟ့ၣ်ယၤတၢ်န့ၣ်ခဲအံၤတက့ၢ်. နမ့ၢ်တဟ့ၣ်ယၤဘၣ်ဒီး ယကဟံးန့ၢ်ဆူၣ်အီၤလီၤ.”
17 စီၤဧ့လံၤအဖိခွါတဖၣ်အတၢ်ဒဲးဘးအံၤမ့ၢ်မးတၢ်အၢတၢ်သီဖး ဒိၣ်လၢယွၤအမဲာ်ညါလီၤ. အဂ့ၢ်ဒ်အံၤ, အဝဲသ့ၣ်မၤတၢ်လုၢ်မၤဘူၣ်တဖၣ်ဆူယွၤအအိၣ်လၢ တၢ်တယူးတယီၣ်ဘၣ်အပူၤန့ၣ်လီၤ.
18 အကတီၢ်ဖဲန့ၣ်, ဖိသၣ်စီၤၡမူၤအ့လးမၤကစၢ်ယွၤအတၢ်မၤဆူညါ ဒီးသိးဃာ်ဝဲဆ့စီဆှံလၢတၢ်ကံးယာ်ထါအသးလၢလုၣ်န့ၣ်လီၤ.
19 တနံၣ်ဘၣ်တနံၣ်န့ၣ်အမိၢ်ဟဲမၤန့ၢ်အီၤဆ့ဖးထီဖိတဘ့ၣ်ဒီးလဲၤစိာ်ဆူအအိၣ် ဖဲအလဲၤပိာ်အဝၤအခံဒ်သိးကမၤဘူၣ် တနံၣ်တဘျီအတၢ်လုၢ်တၢ်ပာ်တဖၣ်အဂီၢ်န့ၣ်လီၤ.
20 ဒီးစီၤဧ့လံၤဆိၣ်ဂ့ၤစီၤအ့လကါနၤဒီးအမါဒီးစံးဘၣ်စီၤအ့လကါနၤ, “မ်ယွၤဟ့ၣ်နၤဖိအဂၤတဖၣ်ခီဖျိလၢပိာ်မုၣ်အံၤလၢဖိခွါ လၢနပာ်စီဆှံထီၣ်အီၤအလီၢ်န့ၣ်တက့ၢ်.”
အန့ၣ်ဝံၤဒီးအဝဲသ့ၣ်က့ၤကဒါက့ဆူဟံၣ်လီၤ.
21 ယွၤဆိၣ်ဂ့ၤတ့ၢ်နီၢ်ဃးနၤဒီးအဝဲအိၣ်ဒီးအဖိခွါဆူညါသၢဂၤဒီးဖိမုၣ်ခံဂၤလီၤ. ဖိသၣ်ၡမူၤအ့လးဒိၣ်ထီၣ်လၢတၢ်မၤယွၤအတၢ်မၤအပူၤလီၤ.
22 ခဲအံၤစီၤဧ့လံၤအသးပှၢ်လံ. အဝဲနၢ်ဟူဘၣ်တၢ်ဂ့ၢ်ကိးမံၤဒဲး ဘၣ်ဃးအဖိခွါတဖၣ်မၤပှၤအံၣ်စရ့လးဖိတဖၣ်ဒီးအဝဲသ့ၣ်မံ ဃုာ်ဂဲၤဃုာ်ဒၣ်လဲာ်ဒီးပှၤပိာ်မုၣ်တဖၣ်လၢအမၤတၢ်လၢ တၢ်ဘူၣ်ထီၣ်ဘါထီၣ်ယွၤအဒဲအကျဲစၢၤန့ၣ်လီၤ.
23 မၤသးဒ်န့ၣ်ဒီးစီၤဧ့လံၤစံးဘၣ်အဝဲသ့ၣ်, “ဘၣ်မနုၤလၢသုမၤတၢ်တဖၣ်အံၤန့ၣ်လဲၣ်. ပှၤကိးဂၤဒဲးတဲဘၣ်ယၤတၢ်အၢတၢ်သီလၢသုမၤအီၤအဂ့ၢ်လီၤ.
24 ဆိကတီၢ်ကွံာ်အီၤယဖိခွါသ့ၣ်ဧၢ. အဝဲအံၤမ့ၢ်တၢ်လီၤပျံၤ လီၤဖုးဒိၣ်မးလၢယွၤအပှၤဂီၢ်မုၢ်ကတိၤဝဲအဂ့ၢ်န့ၣ်လီၤ.
25 ပှၤတဂၤမ့ၢ်မၤတၢ်ဒဲးဘးထီဒါပှၤအဂၤတဂၤဒီးကစၢ်ယွၤဒီဒၣ် အိၣ်ပှိၤအီၤသ့လီၤ.
ဘၣ်ဆၣ်ဒီးမ့ၢ်မတၤတဂၤဒီဒၣ်အိၣ်ပှိၤပှၤတဂၤလၢအမၤတၢ်ဒဲးဘး ထီဒါယွၤကသ့ဝဲန့ၣ်လဲၣ်.” ဘၣ်ဆၣ်ဒီးအဝဲသ့ၣ်တဒိကနၣ်အပၢ်ဘၣ်. အဂ့ၢ်ဒ်အံၤ, ယွၤပာ်လီၤအသးလၢကမၤသံကွံာ်အဝဲသ့ၣ်လီၤ.
26 ဖိသၣ်စီၤၡမူၤအ့လးဒိၣ်ထီၣ်ဆူညါဒီးဒိးန့ၢ် တၢ်ဘၣ်သူၣ်ဘၣ်သးလၢယွၤဒီးပှၤကညီတဖၣ်အမဲာ်ညါလီၤ.
27 ဝံတဂၤဟဲဆူစီၤဧ့လံၤအအိၣ်ဃုာ်ဒီးတၢ်ကစီၣ်အံၤလၢယွၤအအိၣ်လီၤ. “ဖဲနမိၢ်ပၢ်ဖံဖုလၢပျၢၤ, စီၤအၤဟရိၣ်ဒီးအဟံၣ်ဖိဃီဖိ တဖၣ်မ့ၢ်ကီၢ်အဲၤကူပတူးအစီၤပၤအကုၢ်တဖၣ်န့ၣ်ယလီၣ်ဖျါထီၣ် ယသးလၢစီၤအၤဟရိၣ်လီၤ.
28 လၢပှၤအံၣ်စရ့လးဖိအဒူၣ်ခဲလၢာ်အကျါန့ၣ်, ယဃုထၢထီၣ်အဟံၣ်ဖိဃီဖိလၢကကဲထီၣ်ယပှၤလုၢ်တၢ်အခိၣ်တဖၣ်ဒီး မၤယတၢ်မၤလၢတၢ်လုၢ်လီၢ်, လၢကဆူးကဲၤတၢ်နၢမူ, ဒီးကသိးထီၣ်အ့ဖိးဒီးကူၣ်လိာ်တၢ်ဒီး ယၤအဂီၢ်လီၤ. ဒီးယဟ့ၣ်အဝဲသ့ၣ်လၢတၢ်အခွဲးအယာ်တမံၤ လၢအကမၤန့ၢ်အတၢ်နီၤဖးလၢအဂီၢ်တမံၤ လၢတၢ်လုၢ်တၢ်ပာ်တဖၣ်လၢအဘၣ်တၢ်ဆူးကဲၤထီၣ်အီၤ လၢတၢ်လုၢ်လီၢ်ဖီခိၣ်အကျါန့ၣ်လီၤ.
29 မၤသးဒ်န့ၣ်ဒီး, ဘၣ်မနုၤအဃိသုကွၢ်ဃီၤတၢ်လုၢ်တၢ်ပာ်တဖၣ်ဒီး တၢ်လုၢ်မၤဘူၣ်တဖၣ်လၢယဃ့အီၤလၢယပှၤဂီၢ်မုၢ်အအိၣ်န့ၣ် လၢတၢ်သူၣ်လီသးကွံအပူၤန့ၣ်လဲၣ်. စီၤဧ့လံၤဧၢ, နမၤလၤကပီၤနဖိခွါတဖၣ်ဒိၣ်န့ၢ်အါန့ၢ်ယၤခီဖျိနပျဲ အဝဲသ့ၣ်မၤဘီၣ်ထီၣ်အသးလၢတၢ်အဂ့ၤကတၢၢ်တဖၣ်လၢတၢ်လုၢ်တၢ် ပာ်လၢယပှၤဂီၢ်မုၢ်မၤဘူၣ်ဆူယအိၣ်န့ၣ်မ့ၢ်အဘၣ်မနုၤလဲၣ်.
30 ယၤ, ယွၤ, အံၣ်စရ့လးအကစၢ်ယွၤအံၤလၢအပူၤကွံာ်ယအၢၣ်လီၤတ့ၢ် လၢနဟံၣ်ဖိဃီဖိဒီးနဒူၣ်နထၢဖိကမၤယတၢ်မၤ ဒ်ပှၤလုၢ်တၢ်အခိၣ်တဖၣ်အသိးလီၤစိၤလီၤထီန့ၣ်လီၤ. မ့မ့ၢ်ခဲကနံၣ်အံၤ, ယစံးလၢယတမၤဒ်န့ၣ်လၢၤဘၣ်. အခိၣ်တလိာ်, ယကမၤလၤကပီၤပှၤလၢအမၤလၤကပီၤယၤ, ဒီးပှၤလၢအမၤလီၤယသူးယသ့ၣ်န့ၣ် ယကမၤဟးဂီၤအလၤကပီၤန့ၣ်လီၤ.
31 ဒိကနၣ်တက့ၢ်. တၢ်ဆၢကတီၢ်လၢယကမၤသံကွံာ်ပှၤသးစၢ်တဖၣ်လၢ နဟံၣ်ဖိဃီဖိ, နဒူၣ်ဖိထၢဖိအပူၤန့ၣ်ဟဲတုၤလံ. မၤသးဒ်န့ၣ်ဒီး, လၢနဒူၣ်ဖိထၢဖိအကျါန့ၣ်ပှၤကအိၣ်မူတုၤအသး ပှၢ်န့ၣ်တအိၣ်နီတဂၤဘၣ်.
32 နကသူၣ်ကိၢ်သးဂီၤဒီးကွၢ်တၢ်လၢတၢ်သးကါဘၣ်ပှၤအဂၤလၢယပာ်တၢ်ဆိၣ်ဂ့ၤတဖၣ် လၢအလိၤလၢကီၢ်အံၣ်စရ့လးအပူၤလီၤ. မ့မ့ၢ်လၢနဟံၣ်ဖိဃီဖိအပူၤန့ၣ်ပှၤကအိၣ်မူဘၣ်ကဒီးတုၤအသး ပှၢ်ထီၣ်န့ၣ်တအိၣ်ဘၣ်နီတဂၤဘၣ်.
33 သနာ်က့ဒီးယကပာ်တ့ၢ်ဒုးမူပှၤလီၤစၢၤလီၤသွဲၣ်လၢနၤတဖၣ် အကျါတဂၤလီၤ. အဝဲကမၤယတၢ်မၤဒ်ပှၤလုၢ်တၢ်အခိၣ်တဂၤအသိးလီၤ. ဘၣ်ဆၣ်ဒီးအဝဲဒၣ်အမဲာ်ကဘျီၣ်ဒီးအတၢ်မုၢ်လၢ်ခဲလၢာ်ကလီၤမၢ်ကွံာ် ဒီးကယဲၢ်နစၢၤနသွဲၣ်အဂၤခဲလၢာ်ကသံလၢတၢ်သံဆူၣ်သံစိး တမံၤန့ၣ်လီၤ.
34 ဖဲနဖိခွါခံဂၤ, စီၤဃၤဖနံဒီးစီၤဖံၤနဃၣ်သံဝဲလၢတနံၤ ဃီအတီၢ်ပူၤန့ၣ်, တၢ်အံၤကဒုးနဲၣ်နၤလၢတၢ်ကိးမံၤဒဲးလၢယတဲ တ့ၢ်န့ၣ်မ့ၢ်ဝဲတီဝဲအဂ့ၢ်န့ၣ်လီၤ.
35 ယကဃုထၢထီၣ်ပှၤလုၢ်တၢ်အခိၣ်တဂၤလၢအသူၣ်ကတီသးကလိၤဒီးယၤ ဒီးမၤကယဲၢ်တၢ်ကိးမံၤလၢယအဲၣ်ဒိးအကမၤဝဲဒၣ်န့ၣ်လီၤ. ယကဟ့ၣ်အီၤလၢအစၢၤအသွဲၣ်တဖၣ်လၢအကမၤတၢ်လၢ စီၤပၤလၢယဃုထၢထီၣ်အီၤအမဲာ်ညါန့ၣ်လီၤ.
36 နစၢၤနသွဲၣ်တဂၤလၢ်လၢ်လၢအအိၣ်မူတ့ၢ်ဝဲန့ၣ်ကဘၣ်လဲၤဆူပှၤလုၢ် တၢ်အခိၣ်ဖဲန့ၣ်အအိၣ်ဒီးဃ့အီၤတိၢ်ဒီးတၢ်အီၣ်တၢ်အီ ဒီးဃ့ကညးအီၤလၢအကပျဲအမၤစၢၤ ပှၤလုၢ်တၢ်အခိၣ်တဖၣ်ဒ်သိးအကအီၣ်ဘၣ်တၢ်အီၣ်တမံၤမံၤအဂီၢ်န့ၣ်လီၤ.