လံာ်စီၤၡမူၤအ့လးအခီၣ်ထံးတဘ့ၣ်
SAMUEL
လံာ်စီၤၡမူၤအ့လးအခီၣ်ထံးတဘ့ၣ်ကွဲးနီၣ်တၢ်မၤတ့ၢ်အသးလၢ ကီၢ်အံၣ်စရ့လးအပူၤ, လၢစံၣ်ညီၣ်ကွီၢ်တဖၣ်ဒီးစီၤလိၣ်စီၤပၤအတၢ်ပၢတၢ်ပြးအဆၢကတီၢ်အဘၢၣ်စၢၤအဂ့ၢ်န့ၣ်လီၤ. တၢ်လဲလိာ်လၢမၤသးဖဲအံၣ်စရ့လးဖိအတၢ်အိၣ်မူအံၤန့ၣ်ဘၣ်ထွဲအါတက့ၢ်လၢ ပှၤသၢဂၤလၢအမ့ၢ်, စီၤၡမူၤအ့လး, စံၣ်ညီၣ်ကွီၢ်ဖးဒိၣ်လၢခံကတၢၢ်တဂၤ, စီၤစီလူး, အံၣ်စရ့လးအစီၤပၤအဆိကတၢၢ်တဂၤ, ဒီးစီၤဒၤဝံးအတၢ်အိၣ်မူလၢအဆိတချုးလၢအဒိးန့ၢ်တၢ်စိတၢ်ကမီၤဃုာ်ဒီး စီၤၡမူၤအ့လးဒီးစီၤစီလူးအဂ့ၢ်အကျိၤတၢ်ကွဲးနီၣ်တဖၣ်အဂ့ၢ်န့ၣ်လီၤ.
လံာ်အံၤအတၢ်ဂ့ၢ်မိၢ်ပှၢ်န့ၣ်မ့ၢ်ဒ်တၢ်စံၣ်စိၤတဲစိၤအတၢ်ကွဲးတဖၣ် လၢလံာ်စီဆှံအလီၢ်လံၤတကတြူၢ်အသိး, မ့ၢ်ဝဲတၢ်သူၣ်တီသးလိၤဒီးကစၢ်ယွၤဟဲစိာ်တၢ်မၤန့ၢ်မၤနၢၤ, ဖဲတၢ်တဒိကနၣ်တစူၢ်ဘၣ်တၢ်န့ၣ်ဟဲစိာ်တၢ်နးတၢ်ဖှီၣ်သတူၢ်ကလာ် အဂ့ၢ်န့ၣ်လီၤ. တၢ်အံၤဘၣ်တၢ်ပာ်ဖျါအီၤလီၤတံၢ်လီၤဆဲးလၢယွၤအတၢ်ကစီၣ်ဆူ ပှၤလုၢ်တၢ်အခိၣ်စီၤဧ့လံၤအအိၣ်လၢအဆၢဒိၣ်၂:၃၀, “ယကမၤလၤကပီၤပှၤလၢအမၤလၤကပီၤယၤ ဒီးပှၤလၢအမၤလီၤယသူးယသ့ၣ်န့ၣ်ယကမၤဟးဂီၤအလၤကပီၤလီၤ.”
လံာ်အံၤကွဲးနီၣ်ဝဲတၢ်သူၣ်ဆူၣ်သးဂဲၤဒီးတၢ်သးဒ့ဒီအိၣ်ဃါဃုာ်အသးဘၣ်ဃးဒီး တၢ်ဒုးအိၣ်ထီၣ်မၤကျၢၤစီၤလိၣ်စီၤပၤအတၢ်ပၢတၢ်ပြးအဂ့ၢ်တဖၣ်န့ၣ်လီၤ. ယွၤအနီၢ်ကစၢ်ဒၣ်ဝဲန့ၣ်ဘၣ်တၢ်ပာ်ကဲအီၤဒ်ကီၢ်အံၣ်စရ့လးအစီၤပၤနီၢ်နီၢ်တဂၤအသိးလီၤ. ဘၣ်ဆၣ်ဒီးလၢတၢ်စံးဆၢမၤဆၢန့ၢ်က့ၤ ပှၤဂီၢ်မုၢ်အတၢ်ဃ့သကွံာ်ကညးန့ၣ်, ယွၤဃုထၢထီၣ်စီၤပၤတဂၤလၢအဝဲသ့ၣ်အဂီၢ်လီၤ. တၢ်ဂ့ၢ်အကါဒိၣ်တခီမ့ၢ်ဝဲစီၤပၤဒီးအံၣ်စရ့လးအပှၤဂီၢ်မုၢ် အိၣ်မူလၢကစၢ်ယွၤအတၢ်စိတၢ်ကမီၤအဒိၣ်အထီကတၢၢ်ဒီးအတၢ်စံၣ်ညီၣ်အဖီလာ် (၂:၇-၁၀) န့ၣ်လီၤ. လၢကစၢ်ယွၤအတၢ်သိၣ်တၢ်သီအဖီလာ်န့ၣ်ကယဲၢ်ပှၤဂီၢ်မုၢ်လၢအကဲဒိၣ်မ့ၢ်ဂ့ၤအဖှီၣ်အယာ်မ့ၢ်ဂ့ၤ, အခွဲးအယာ်န့ၣ်ကဘၣ်တၢ်ပၢၤဃးဒီဒၣ်အီၤန့ၣ်လီၤ.
1
1 ပှၤအိၣ်ဝဲတဂၤအမံၤလၢစီၤအ့လကါနၤလီၤ. အဝဲမ့ၢ်ပှၤအ့ဖရဲၣ်အဒူၣ် ဒီးအိၣ်ဝဲလၢဝ့ၢ်ရၤမါလၢကစၢၢ်ကလိအဝ့ၢ်အ့ဖရဲၣ်န့ၣ်လီၤ. အဝဲမ့ၢ်စီၤအလံဟူၤအလံၤခွါဒီးစီၤယဟိရၣ်အဖိခွါဒီးဘၣ် ဃးလၢစီၤတိဟူၤအဟံၣ်ဖိဃီဖိဒီးမ့ၢ်ပှၤလၢစီၤစူာ်အဒူၣ်ထၢ တဒူၣ်အပူၤလီၤ.
2 စီၤအ့လကါနၤအိၣ်ဒီးအမါခံဂၤ, နီၢ်ဃးနၤဒီးနီၢ်ပနံးနၤလီၤ. နီၢ်ပနံးနၤအိၣ်ဒီးအဖိတဖၣ်ဘၣ်ဆၣ်ဒီးနီၢ်ဃးနၤအဖိတအိၣ်ဘၣ်.
3 ကိးနံၣ်ဒဲးန့ၣ်စီၤအ့ကါနၤလဲၤလၢဝ့ၢ်ရၤမါဆူဝ့ၢ်ၡံလိၤ ဒ်သိးအကဘူၣ်တၢ်ဘါတၢ်ဒီးမၤဘူၣ်တၢ်လုၢ်တၢ်ပာ်တဖၣ်ဆူ ယွၤသ့တၢ်လၢာ်အအိၣ်န့ၣ်လီၤ. ဖဲန့ၣ်စီၤဧ့လံၤအဖိခွါစီၤဃၤဖနံၤဒီးစီၤဖံနဃၤခံဂၤ န့ၣ်မ့ၢ်ဝဲပှၤလုၢ်တၢ်အခိၣ်တဖၣ်န့ၣ်လီၤ.
4 တဘျီဘၣ်တဘျီဖဲစီၤအ့လကါနၤလုၢ်ထီၣ်အတၢ်လုၢ်တၢ်ပာ်န့ၣ်ဟ့ၣ် ဝဲတၢ်ဖံးတၢ်ညၣ်တပူဆူနီၢ်ပနံးနၤဒီးတပူဆူ အဖိတဖၣ်အအိၣ်လီၤ.
5 ဒီးအဝဲမ့ၢ်အဲၣ်ဝဲနီၢ်ဃးနၤဒိၣ်မးဒၣ်လဲာ်န့ၣ်ဟ့ၣ်ဒၣ်ဝဲထဲတပူဧိၤလီၤ. အဂ့ၢ်ဒ်အံၤ, ယွၤတြီဃာ်အီၤဒ်သိးအသုတအိၣ်ဒံၣ်အိၣ်ဖိတဂ့ၤအဂီၢ်လီၤ.
6 နီၢ်ပနံးနၤ, လၢအမ့ၢ်ပှၤပြၢတၢ်ဒီးအီၤန့ၣ်မၤဆါအီၤဒီးမၤမဲာ်ဆှးအီၤလီၤ. အဂ့ၢ်ဒ်အံၤ, ယွၤတြီဃာ်အီၤဒ်သိးအဖိသုတအိၣ်တဂ့ၤအဃိလီၤ.
7 တၢ်မၤအသးဒ်သိးအံၤတနံၣ်ဝံၤတနံၣ်, ဒီးဖဲအဝဲသ့ၣ်လဲၤဆူ ယွၤအဟံၣ်တဘျီလၢ်လၢ်န့ၣ်နီၢ်ပနံးနၤမၤဖှီၣ်အသးနးမးတုၤ အဝဲဟီၣ်ဒီးဂ့ၢ်လိာ်တၢ်အီၣ်တၢ်အီတမံၤလၢ်လၢ်န့ၣ်လီၤ.
8 အဝၤစီၤအ့လကါနၤမ့ၢ်သံကွၢ်အီၤ, “နီၢ်ဃးနၤဧၢ, ဘၣ်မနုၤနဟီၣ်လဲၣ်. ဘၣ်မနုၤလၢနတအီၣ်တၢ်လဲၣ်. ဘၣ်မနုၤနဘၣ်သးအုးတဘိယူၢ်ဃီန့ၣ်လဲၣ်. မ့ၢ်ယၤအံၤယအခီပညီတအိၣ်အါန့ၢ်ဒံးဖိခွါအဂၤတဆံန့ၣ်ဘၣ်ဧါ.”
9 ဘၣ်တနံၤ, ဖဲအဝဲသ့ၣ်အီၣ်တၢ်အီတၢ်လၢယွၤအဟံၣ်လၢဝ့ၢ်ၡံလိၤ အပူၤဝံၤန့ၣ်, နီၢ်ဃးနၤဆၢထၢၣ်ဝဲလီၤ. အဝဲအသးဟးဂီၤနးနးကလဲာ်ဒီးဟီၣ်ဟ့သးဖဲအဃ့ဘါထု ကဖၣ်တၢ်လၢယွၤအခါန့ၣ်လီၤ.
10 အကတီၢ်ဖဲန့ၣ်ပှၤလုၢ်တၢ်အခိၣ်စီၤဧ့လံၤဆ့ၣ်နီၤလၢအလီၢ်လၢ တြဲၤကပၤန့ၣ်လီၤ.
11 နီၢ်ဃးနၤမၤတၢ်အၢၣ်လီၤအီၤလီၤတၢ်သညူးသပှၢ်တမံၤန့ၣ်လီၤ. “ယွၤသ့တၢ်လၢာ်ဧၢ, ကွၢ်လီၤယၤနကုၢ်အံၤတက့ၢ်. ထံၣ်ယတၢ်ကိၢ်တၢ်ဂီၤဒီးသ့ၣ်နီၣ်ထီၣ်က့ၤယၤတက့ၢ်. သးပ့ၤနီၣ်ယၤတဂ့ၤ. နမ့ၢ်ဟ့ၣ်ယၤလၢဖိခွါတဂၤဒီးယအၢၣ်လီၤ နၤလၢယကပာ်စီဆှံအီၤဆူနအိၣ်လၢအသးသမူတစိၤဒီးအခိၣ်သူ တဘၣ်တၢ်ကူးတဲာ်အီၤနီတစုဘၣ်.”
12 နီၢ်ဃးနၤဘါထုကဖၣ်ဆူညါဆူယွၤအအိၣ်ဖးယံာ်, ဒီးစီၤဧ့လံၤကွၢ်အနိးဖံးတဖၣ်လီၤ.
13 အဝဲဃ့ဘါထုကဖၣ်ဘှ့ၣ်ဘှ့ၣ်ဘှီၣ်ဘှီၣ်ကစုဒုလီၤ. အနိးဖံးတဖၣ်ဟူးဝးဝဲဘၣ်ဆၣ်ဒီးတမၤသီၣ်ဘၣ်အကလုၢ်နီတမံၤဘၣ်. မၤသးဒ်န့ၣ်ဒီး, စီၤဧ့လံၤဆိကမိၣ်လၢအဝဲဒၣ်မူၤလၢသံးလီၤ.
14 ဒီးအဝဲစံးဘၣ်ပိာ်မုၣ်န့ၣ်, “ဆိကတီၢ်ကွံာ်နတၢ်ပာ်ဖျါနသးဒ် ပှၤအီသံးမူၤသံးတဂၤအသိးန့ၣ်တက့ၢ်. ဆိကတီၢ်နတၢ်အီသံးဒီးအိၣ်မုာ်မုာ်ခုၣ်ခုၣ်တက့ၢ်.”
15 ပိာ်မုၣ်စံးဆၢအီၤ, “တမ့ၢ်ဘၣ်. ယတမူၤလၢသံးဘၣ်. ယတအီစ့ၢ်ကီးယဲဘၣ်. ယသူၣ်ဟးဂီၤသးဟးဂီၤဒီးယဃ့ဘါထုကဖၣ် တၢ်ဒီးဂၢ်လီၤယတၢ်ကိၢ်တၢ်ဂီၤဆူယွၤအအိၣ်လီၤ.
16 တဘၣ်ဆိကမိၣ်လၢယမ့ၢ်ပိာ်မုၣ်အလုၢ်အပှ့ၤတအိၣ်ဘၣ်တဂၤန့ၣ်တဂ့ၤ. ယဘါထုကဖၣ်တၢ်ဒ်သိးအံၤန့ၣ်မ့ၢ်လၢယသူၣ်ကိၢ်သးဂီၤနးမးအဃိလီၤ.”
17 စီၤဧ့လံၤစံးဝဲ, “လဲၤမုာ်မုာ်တက့ၢ်. ဒီးမ်အံၣ်စရ့လး အကစၢ်ယွၤဟ့ၣ်နၤတၢ်လၢနဃ့တ့ၢ်အီၤန့ၣ်တက့ၢ်.”
18 ပိာ်မုၣ်န့ၣ်စံးဆၢအီၤ, “မ်နဆိကမိၣ်တၢ်လၢယဂ့ၢ်လၢတၢ်သူၣ် ကညီၤသးကညီၤအပူၤထီဘိတက့ၢ်.” အန့ၣ်ဝံၤဒီးပိာ်မုၣ်န့ၣ်ဟးထီၣ်ဝဲဒီးအီၣ်တၢ်ဒီးအသးတအုးလၢၤဘၣ်ဝဲဘၣ်.
19 မုၢ်ဆ့ၣ်ထီၣ်တနံၤန့ၣ်, စီၤအ့လကါနၤဒီးအဟံၣ်ဖိဃီဖိပၢၢ်ထီၣ်ဂီၤဂီၤဒီးဘူၣ်ထီၣ်ဘါထီၣ်ယွၤဝံၤ, အဝဲသ့ၣ်က့ၤကဒါက့ၤဆူဝ့ၢ်ရၤမါလီၤ. စီၤအ့လကါနၤမံဃုာ်ဒီးအမါနီၢ်ဃးနၤဒီး ယွၤစံးဆၢပိာ်မုၣ်န့ၣ်အတၢ်ထုကဖၣ်လီၤ.
20 မၤသးဒ်န့ၣ်ဒီး, တၢ်န့ၣ်မ့ၢ်နီၢ်ဃးနၤအိၣ်ထီၣ်ဒီးအဟုးအသး ဒီးဆံးစၢ်ထီၣ်အဖိခွါတဂၤအဂ့ၢ်လီၤ. ပိာ်မုၣ်န့ၣ်ယုၢ်န့ၢ်အမံၤလၢစီၤၡမူၤအ့လးဒီးတဲဖျါထီၣ်ဝဲ အခီပညီလၢ, “ယဃ့န့ၢ်အီၤလၢယွၤလီၤ.”
21 တၢ်ဆၢကတီၢ်တုၤကဒီးဝဲတဘျီလၢစီၤအ့လကါနၤဒီးအဟံၣ်ဖိဃီဖိအဂီၢ် လၢကလဲၤဆူဝ့ၢ်ၡံလိၤဒီးမၤဘူၣ်ထီၣ်တနံၣ်တဘျီအတၢ်လုၢ်တၢ်ပာ်ဆူယွၤအအိၣ် ဒ်အအၢၣ်လီၤဝဲအသိးန့ၣ်လီၤ.
22 ဘၣ်ဆၣ်ဒီးအဝဲအံၤတဘျီနီၢ်ဃးနၤတလဲၤဝဲဘၣ်. ပိာ်မုၣ်န့ၣ်စံးဘၣ်အဝၤ, “ဖဲဖိသၣ်အံၤထုးဖှၣ်အနုၢ်တဘျီဃီန့ၣ် ယကလဲၤစိာ်အီၤဆူယွၤအဟံၣ်, ဒီးကအိၣ်ဝဲဖဲန့ၣ်တစိၤသးလီၤ.”
23 စီၤအ့လကါနၤစံးဆၢအီၤ, “ဂ့ၤလံ, မၤဒ်ကယဲၢ်တၢ်လၢနထံၣ် အဂ့ၤကတၢၢ်အသိးန့ၣ်တက့ၢ်. အိၣ်တ့ၢ်လၢဟံၣ်တုၤနထုးဖှၣ်အီၤလၢနုၢ်န့ၣ်တက့ၢ်. ဒီးမ်ယွၤမၤလၢထီၣ်ပှဲၤထီၣ်နတၢ်အၢၣ်လီၤအီလီၤတက့ၢ်.” မၤသးဒ်န့ၣ်ဒီး, နီၢ်ဃးနၤအိၣ်တ့ၢ်လၢဟံၣ်ဒီးအံးထွဲကွၢ်ထွဲအဖိလီၤ.
24 ဖဲအဝဲထုးဖှၣ်အနုၢ်လၢအီၤဝံၤန့ၣ်, ပိာ်မုၣ်အံၤလဲၤစိာ်အီၤ ဆူဝ့ၢ်ၡံလိၤ, ဃုာ်ဒီးကျီၢ်ဖါအသးအိၣ်သၢနံၣ်တဒု, ကိၣ်ကမူၣ်သၢသလိးဒီးထၢၣ်တၢ်ဖံးပှဲၤဒီးစပံးထံတဖျၢၣ်န့ၣ်လီၤ. ပိာ်မုၣ်န့ၣ်လဲၤစိာ်စီၤၡမူၤအ့လးဖဲအမ့ၢ်ဒံးဖိသၣ်ဆံးအခါ န့ၣ်ဆူယွၤအဟံၣ်လၢဝ့ၢ်ၡံလိၤန့ၣ်လီၤ.
25 ဖဲအဝဲသ့ၣ်မၤသံကွံာ်ကျီၢ်ဖါဝံၤန့ၣ်, အဝဲသ့ၣ်လဲၤစိာ်ဖိသၣ် ဆူစီၤဧ့လံၤအအိၣ်လီၤ.
26 ဒီးနီၢ်ဃးနၤစံးဘၣ်အီၤ, “ဝံသးစူၤယၤတဘျး, တၢ်ဒိၣ်ဧၢ, နသ့ၣ်နီၣ်ယၤဒံးဧါ. ယမ့ၢ်ပိာ်မုၣ်တဂၤလၢနထံၣ်တ့ၢ်အိၣ်ဆၢထၢၣ် ဖဲအံၤဒီးဘါထုကဖၣ်တၢ်ဆူယွၤအအိၣ်န့ၣ်လီၤ.
27 ယဃ့တ့ၢ်ဖိသၣ်အံၤလၢအီၤဒီးအဝဲဟ့ၣ်ယၤတၢ်လၢယဃ့ အီၤန့ၣ်လီၤ.
28 မၤသးဒ်န့ၣ်ဒီး, ယပာ်စီဆှံအီၤဆူယွၤအအိၣ်လီၤ. အသးသမူတစိၤဒၣ်အီၤန့ၣ်ကဘၣ်ဃးဒီးယွၤလီၤ.” အန့ၣ်ဝံၤဒီးအဝဲသ့ၣ်ဘူၣ်ထီၣ်ဘါထီၣ်ယွၤန့ၣ်လီၤ.