20
1 တုၤနုၤတစု, ယထံၣ်ကလူးတဂၤဟဲလီၤလၢမူခိၣ်, ဟံးဃာ်တၢ်ပူၤယိာ်အနီၣ်ဝံာ်ဒီးထးသွဲဖးဒိၣ်တဘိလၢ အစုပူၤလီၤ.
2 အဝဲဒၣ်ဖီၣ်ဃာ်ပယိၤ, ဂုၢ်သ့ၣ်လၢထံးလၢသီတဘိလၢ အမ့ၢ်မုၣ်ကီၤလံၢ်မ့တမ့ၢ်စၤတၣ်, ဒီးစၢဃာ်အီၤလၢအနံၣ်
တကထိအတီၢ်ပူၤလီၤ.
3 ကလူးတ့ၢ်လီၤအီၤဆူတၢ်ပူၤယိာ်အပူၤ, ကးတံာ်အခံလၢ နီၣ်ဝံာ်ဒီးစဲပနီၣ်ဃာ်ဝဲ, ဒ်သိးတချုးအနံၣ်တကထိပှဲၤထီၣ်
ဒံးဘၣ်န့ၣ်, အသုတလီန့ၢ်လၢၤပှၤကလုာ်လၢကိးထံကိးကီၢ်
တဖၣ်တဂ့ၤအဂီၢ်န့ၣ်လီၤ. တၢ်န့ၣ်ဝံၤအလီၢ်ခံ, အဝဲကဘၣ်တၢ်ပျဲထူၣ်ဖျဲးအီၤတစိၢ်ဖိလီၤ.
4 အန့ၣ်ဝံၤဒီးယထံၣ်လီၢ်ပစိာ်တဖၣ်, ဒီးပှၤတဖၣ်လၢအဆ့ၣ်နီၤလၢ အလိၤန့ၣ်ဘၣ်တၢ်ဟ့ၣ်အီၤတၢ်စိကမီၤလၢအကစံၣ်ညီၣ်တၢ်
လီၤ. ယထံၣ်ဘၣ်စ့ၢ်ကီးယဲပှၤအသးသမူတဖၣ်လၢအဘၣ်
တၢ်မၤသံတ့ၢ်အီၤလၢအအုၣ်အသးလၢယ့ၣ်ၡူးအဂ့ၢ်ဒီး
စံၣ်တဲၤတဲလီၤကစၢ်ယွၤအကလုၢ်ကထါတဖၣ်အဃိ
န့ၣ်လီၤ. အဝဲသ့ၣ်တဘါထီၣ်တ့ၢ်တၢ်ဒူတၢ်ဃိၤတဒု
န့ၣ်မ့ၢ်ဂ့ၤ, အက့ၢ်အဂီၤမ့ၢ်ဂ့ၤန့ၣ်ဘၣ်. ဒ်န့ၣ်အသိး, အဝဲသ့ၣ်တဒိးန့ၢ်တၢ်ဒူတၢ်ဃိၤတဒုန့ၣ်အတၢ်ပနီၣ်
လၢအဝဲသ့ၣ်အခိၣ်တိသၣ်အလိၤမ့ၢ်ဂ့ၤ, လၢအစု
လိၤမ့ၢ်ဂ့ၤန့ၣ်ဘၣ်. အဝဲသ့ၣ်ဂဲၤဆၢထၢၣ်သမူထီၣ်က့ၤ, ဒီးပၢတၢ်ဒ်စီၤပၤတဖၣ်အသိးတပူၤဃီဒီးခရံာ်လၢအနံၣ်
တကထိအတီၢ်ပူၤလီၤ.
5 (ပှၤသံအဂၤတဖၣ်, တချုးအနံၣ်တကထိပှဲၤထီၣ်ဒံးဘၣ်န့ၣ်, တဂဲၤဆၢထၢၣ်သမူထီၣ်က့ၤဘၣ်) အဝဲအံၤမ့ၢ်တၢ်ဒုးဂဲၤဆၢထၢၣ်သမူထီၣ်က့ၤပှၤအဆိ ကတၢၢ်တဘျီလီၤ.
6 ပှၤလၢအဂဲၤဆၢထၢၣ်သမူထီၣ်က့ၤအဆိကတၢၢ်တဘျီအံၤ တဖၣ်န့ၣ်, အသူၣ်ခုအသးခုဒီးဘၣ်ဆိၣ်ဂ့ၤဝဲလီၤ. တၢ်သံခံစုတစုအစိကမီၤတအိၣ်လၢအဝဲသ့ၣ်
အဖီခိၣ်ဘၣ်. အဝဲသ့ၣ်ကမ့ၢ်ကစၢ်ယွၤဒီးခရံာ်အပှၤလုၢ်တၢ်
အခိၣ်တဖၣ်ဒီးကပၢတၢ်ဒီးခရံာ်အနံၣ်တကထိလီၤ.
7 ဖဲအနံၣ်တကထိပှဲၤထီၣ်ဝံၤအလီၢ်ခံန့ၣ်, မုၣ်ကီၤလံၢ်ကဘၣ်တၢ်ပျၢ်လီၤကွံာ်အီၤလၢအဃိာ် ပူၤ
8 ဒီးအဝဲဒၣ်ကဟးထီၣ်ဒ်သိးအကလီန့ၢ်ပှၤကလုာ်လၢ ထံဧိၤကီၢ်ဧိၤလၢအအိၣ်ရၤလီၤအသးသကုၤဟီၣ်ခိၣ်ဒီဘ့ၣ်ညါလၢ
အမ့ၢ်ပှၤကိးဖိဒီးပှၤမကိးဖိလီၤ. မုၣ်ကီၤလံၢ်ကပာ်ဖှိၣ်အဝဲသ့ၣ်တပူၤဃီလၢတၢ်ဒုးသုးအဂီၢ်, အနီၣ်ဂံၢ်ကအါဝဲဒ်မဲးဧိၤဟီၣ်ဧိၤလၢပီၣ်လဲၣ်ကၢၢ်နံၤအသိး
န့ၣ်လီၤ.
9 အဝဲသ့ၣ်ရၤလီၤအသးသကုၤဟီၣ်ခိၣ်ချၢ, ဒီးကဝီၤဃာ်ကစၢ်ယွၤအပှၤဂီၢ်မုၢ်တဖၣ်အဒဲဒီးဝ့ၢ် တဖျၢၣ်လၢအဝဲဒၣ်အဲၣ်ဝဲန့ၣ်လီၤ. ဘၣ်ဆၣ်ဒီးမ့ၣ်အူ
ဟဲလီၤလၢမူခိၣ်, ဒီးမၤဟးဂီၤကွံာ်အဝဲသ့ၣ်လီၤ.
10 တုၤနုၤတစုမုၣ်ကီၤလံၢ်, လၢအလီန့ၢ်တ့ၢ်အဝဲသ့ၣ်န့ၣ် ဘၣ်တၢ်တ့ၢ်လီၤအီၤဆူမ့ၣ်အူဒီးကးအနိၣ်အပူၤဖဲ
တၢ်ဒူတၢ်ဃိၤဒီးဝံအဘျၣ်ဘၣ်တၢ်တ့ၢ်လီၤတ့ၢ်အီၤ, ဒီးအဝဲသ့ၣ်ကဘၣ်တၢ်မၤနးမၤဖှီၣ်အီၤလၢမုၢ်ဆါ
ဒီးမုၢ်နၤအစိၤစိၤအဃၣ်ဃၣ်လီၤ.
11 အန့ၣ်ဝံၤဒီးယထံၣ်လီၢ်ပစိာ်ဝါဖးဒိၣ်တဖျၢၣ်ဒီးပှၤ တဂၤလၢအဆ့ၣ်နီၤလၢအလိၤန့ၣ်လီၤ. မူခိၣ်ဒီးဟီၣ်ခိၣ်ဃ့ၢ်ကွံာ်လၢအဝဲဒၣ်အမဲာ်ညါဒီးတဘၣ်
တၢ်ထံၣ်န့ၢ်အီၤနီတစုလၢၤဘၣ်.
12 ဒီးယထံၣ်ဘၣ်ပှၤသံတဖၣ်, အဒိၣ်ဒီးအဆံးစ့ၢ်ကီး, အိၣ်ဆၢထၢၣ်လၢလီၢ်ပစိာ်အမဲာ်ညါန့ၣ်လီၤ. လံာ်တဖၣ် ဘၣ်တၢ်အိးထီၣ်အီၤ, ဒီးအန့ၣ်ဝံၤအလီၢ်ခံလံာ်အဂၤ
တဘ့ၣ်ဘၣ်တၢ်အိးထီၣ်အီၤ, လၢအမ့ၢ်လံာ်မူတဘ့ၣ်န့ၣ်လီၤ. ပှၤသံတဖၣ်ဘၣ်တၢ်စံၣ်ညီၣ်အီၤဒ်တၢ်လၢအဝဲသ့ၣ်
မၤတ့ၢ်ဝဲ, ဒ်အဘၣ်တၢ်ကွဲးနီၣ်တ့ၢ်အီၤလၢလံာ်တဖၣ်
အပူၤအသိးန့ၣ်လီၤ.
13 အန့ၣ်ဝံၤဒီး, ပီၣ်လဲၣ်ဟ့ၣ်ထီၣ်အပှၤသံတဖၣ်လီၤ. တၢ်သံဒီးပျုၤပူၤစ့ၢ်ကီးဟ့ၣ်ထီၣ်ပှၤသံလၢအဝဲသ့ၣ် ဟံးဃာ်တ့ၢ်ဝဲတဖၣ်လီၤ. ဒီးပှၤကိးဂၤဒဲးဘၣ်တၢ်စံၣ်ညီၣ်အီၤဒ်တၢ်လၢအဝဲသ့ၣ်
မၤတ့ၢ်ဝဲအသိးန့ၣ်လီၤ.
14 တၢ်န့ၣ်ဝံၤအလီၢ်ခံ, တၢ်သံဒီးပျုၤပူၤဘၣ်တၢ်တ့ၢ်လီၤကွံာ် အီၤဆူနိၣ်မ့ၣ်အူအပူၤလီၤ. (နိၣ်မ့ၣ်အူအံၤမ့ၢ်ဝဲတၢ်သံခံစု
တစုလီၤ.)
15 ပှၤတဂၤလၢ်လၢ်လၢအမံၤတအိၣ်ကွဲးအသးလၢလံာ်မူ အပူၤန့ၣ်, ဘၣ်တၢ်တ့ၢ်လီၤကွံာ်အီၤဆူနိၣ်မ့ၣ်အူအပူၤလီၤ.