19
1 တၢ်အံၤဝံၤအလီၢ်ခံ, ယနၢ်ဟူတၢ်လၢအသီၣ်လီၤဂာ်ပှၤဂီၢ်မုၢ်အကလုၢ်ဖးဒိၣ်လၢမူခိၣ် စံးဝဲ, “စံးထီၣ်ပတြၢၤယွၤတက့ၢ်. တၢ်အုၣ်က့ၤခီၣ်က့ၤ, တၢ်လၤ ကပီၤ, ဒီးတၢ်စိတၢ်ကမီၤမ့ၢ်ပကစၢ်ယွၤအတၢ်လီၤ.
2 အဝဲအတၢ်စံၣ်ညီၣ်တဖၣ်မ့ၢ်ဝဲတီဝဲ, ဒီးတီဝဲလိၤဝဲလီၤ. အဝဲစံၣ်ညီၣ်ဃၣ်တ့ၢ်လံဃဲသဲမုၣ်လၢအမၤဟးဂီၤဟီၣ်ခိၣ်လၢ အလုၢ်အၢလၢ်သီန့ၣ်လီၤ. ကစၢ်ယွၤစံၣ်ညီၣ်တ့ၢ်လံအီၤမ့ၢ်လၢအဝဲဒၣ်မၤသံတ့ၢ် ကစၢ်ယွၤအခ့အပှၤတဖၣ်အဃိလီၤ.”
3 အဝဲသ့ၣ်ကိးထီၣ်ကဒီးဝဲ, “စံးထီၣ်ပတြၢၤယွၤတက့ၢ်. မ့ၣ်အူလၢအအီၣ်ကွံာ်ဝ့ၢ်ဖးဒိၣ်တဖျၢၣ်န့ၣ်အလုၢ်ခုၣ်ထီၣ်ဝဲဒၣ် အစိၤစိၤအဃၣ်ဃၣ်လံ.”
4 ပှၤသူၣ်က့သးပှၢ်ခံဆံလွံၢ်ဂၤဒီးတၢ်အသးသမူအိၣ်လွံၢ်ဒုန့ၣ် ထိၣ်လီၤပှီၤအသးဒီးဘူၣ်ထီၣ်ဘါထီၣ်ကစၢ်ယွၤလၢ အဆ့ၣ်နီၤအိၣ်လၢလီၢ်ပစိာ်အဖီခိၣ်န့ၣ်လီၤ. အဝဲသ့ၣ်စံးဝဲ, “အၤမ့ၣ်. စံးထီၣ်ပတြၢၤကစၢ်ယွၤတက့ၢ်.”
5 တုၤနုၤတစုတၢ်ကလုၢ်သီၣ်ထီၣ်လၢလီၢ်ပစိာ်အဖီခိၣ်ဒီးစံးဝဲ, “စံးထီၣ်ပတြၢၤပကစၢ်ယွၤတက့ၢ်, အဝဲဒၣ်အခ့အပှၤဒီးပှၤဂီၢ်မုၢ်, ဒိၣ်မ့ၢ်ဂ့ၤ, ဆံးမ့ၢ်ဂ့ၤ, လၢအယူးယီၣ်ဒီးပျံၤအီၤခဲလၢာ်သ့ၣ်သုဧၢ,”
6 တုၤနုၤတစုယနၢ်ဟူတၢ်လၢအသီၣ်လီၤဂာ်ဒ်ပှၤဂီၢ်မုၢ်အကလုၢ်, ဒ်ထံလီၤဆူသီၣ်ရုၢ်ရုၢ်အသိး, ဒ်လီသီၣ်သထြူးအသိးန့ၣ်လီၤ. ယနၢ်ဟူအဝဲသ့ၣ်စံးဝဲ, “စံးထီၣ်ပတြၢၤယွၤတက့ၢ်. အဂ့ၢ်ဒ်အံၤ, ကစၢ်, ပကစၢ်ယွၤလၢအသ့တၢ်လၢာ်န့ၣ်မ့ၢ်ဝဲစီၤပၤလီၤ.
7 မ်ပကသူၣ်ဖှံသးညီ ဒီးသူၣ်ခုသးခုတက့ၢ်. မ်ပကစံးထီၣ်ပတြၢၤအဝဲအတၢ်ဒိၣ်တၢ်မုၢ်တက့ၢ်. အဂ့ၢ်ဒ်အံၤ, သိဖိအတၢ်တ့တၢ်ဖျီအဆၢကတီၢ်တုၤအိၣ်ဝဲလံ. ဒီးအဝဲဒၣ်အတလးမူးပိာ်မုၣ်အိၣ်ကတဲာ်ကတီၤလံအသးလၢတၢ်န့ၣ် အဂီၢ်လံ.
8 အဝဲဒၣ်ဘၣ်တၢ်ဟ့ၣ်လံအီၤတၢ်ကံးယာ်အလွဲၢ်ဝါလၢအကဆှီ, ဒီးကပြုၢ်ကပြီၤ, လၢအကကူဝဲသိးဝဲအဂီၢ်လီၤ.” (တၢ်ကံးယာ် အလွဲၢ်အဝါန့ၣ်, မ့ၢ်ဝဲကစၢ်ယွၤအပှၤဂီၢ်မုၢ်အတၢ်ဖံးတၢ်မၤအဂ့ၤ အဝါတဖၣ်လီၤ.)
9 တုၤနုၤတစုကလူးန့ၣ်စံးဘၣ်ယၤ, “ကွဲးလီၤတၢ်အဝဲအံၤတက့ၢ်. ပှၤတဖၣ်လၢအဘၣ်တၢ်ကွဲတ့ၢ်လံအီၤဆူသိဖိအတၢ်တ့တၢ်ဖျီ အမူးပူၤန့ၣ်ဘၣ်ဆိၣ်ဂ့ၤဝဲဒၣ်လီၤ.” ဒီးကလူးန့ၣ်တဲအါထီၣ်ဝဲ, “တၢ်သ့ၣ်တဖၣ်အံၤမ့ၢ်ဝဲကစၢ်ယွၤအကလုၢ်ကထါအမ့ၢ်အတီ တဖၣ်လီၤ.”
10 ယထိၣ်လီၤပှီၤယသးလၢအဝဲဒၣ်အမဲာ်ညါဒ်သိးယကဘူၣ် ထီၣ်ဘါထီၣ်အီၤ, ဘၣ်ဆၣ်ဒီးအဝဲဒၣ်စံးဘၣ်ယၤ, “တဘၣ်မၤတဂ့ၤ, ယမ့ၢ်တၢ်ခ့တၢ်ပှၤသကိးတၢ်ခ့တၢ်ပှၤ ဒီးနၤ, ဒီးနဒီပုၢ်ဝဲၢ်တဖၣ်, ကယဲၢ်ပှၤသ့ၣ်တဖၣ်လၢအဟံးဃာ်တၢ်မ့ၢ်တၢ်တီလၢ ယ့ၣ်ၡူးလီၣ်ဖျါဝဲန့ၣ်လီၤ. ဘူၣ်ထီၣ်ဘါထီၣ်ကစၢ်ယွၤတက့ၢ်.”
အဂ့ၢ်ဒ်အံၤတၢ်မ့ၢ်တၢ်တီလၢယ့ၣ်ၡူးလီၣ်ဖျါထီၣ်ဝဲန့ၣ် မ့ၢ်တၢ်လၢအထိၣ်ဟူးထိၣ်ဂဲၤဝံတဖၣ်န့ၣ်လီၤ.
11 တုၤနုၤတစုယထံၣ်မူခိၣ်အိးထီၣ်အသး, ဒီးဖဲန့ၣ်ကသ့ၣ်ဖါဝါအိၣ်ဝဲဒၣ် တဒုလီၤ. ပှၤဒိးကသ့ၣ်တဂၤအံၤဘၣ်တၢ်ကိးအီၤလၢ ကလုၢ်တီဒီးတီလိၤန့ၣ်လီၤ. အဝဲဒၣ်စံၣ်ညီၣ်ဒီးဒုးအတၢ်ဒုးသုးတဖၣ်လၢတၢ်တီတၢ်လိၤ အပူၤလီၤ.
12 အဝဲအမဲာ်ချံတဖၣ်လီၤဂာ်ဒီးမ့ၣ်အူလၣ်, ဒီးအဝဲဒၣ်ကၢၢ်ခိၣ်သလုးအါဖျၢၣ်လၢအခိၣ်လိၤလီၤ. အဝဲအိၣ်ဒီးအမံၤတဖျၢၣ်အိၣ်ကွဲးအသးလၢအလိၤ, ဘၣ်ဆၣ်ဒီးထဲအဝဲဒၣ်တဂၤဧိၤသ့ၣ်ညါမံၤအဝဲ အံၤလီၤ. ပှၤဂၤတသ့ၣ်ညါနီတဂၤဘၣ်.
13 ဆ့ကၤဖးထီလၢအဝဲကၤဝဲန့ၣ် ဘၣ်အၢလၢတၢ်သွံၣ်ဒီ ဘ့ၣ်ညါလီၤ. အဝဲအမံၤန့ၣ်မ့ၢ်ဝဲ “ကစၢ်ယွၤအကလုၢ် ကထါ” လီၤ.
14 မူခိၣ်အသုးမုၢ်သံၣ်ဘိတဖၣ်ပိာ်အခံ, ဒီးဒိးကသ့ၣ်ဖါဝါ တဖၣ်, ဒီးကူဝဲကၤဝဲလၢတၢ်ကံးယာ်အလွဲၢ်ဝါဒီးကဆှီ တဖၣ်လီၤ.
15 လၢအဝဲဒၣ်အကိာ်ပူၤန့ၣ် နးလၢအကနၣ်အ့ၣ်တဘ့ၣ် ဟဲဖျိးထီၣ်, ဒီးလၢနးအဝဲအံၤန့ၣ်အဝဲကမၤနၢၤထံဧိၤကီၢ် ဧိၤတဖၣ်လီၤ. အဝဲဒၣ်ကပၢအဝဲသ့ၣ်လၢနီၣ်တီၢ်ထး, ဒီးအဝဲကယီၢ်ထီၣ်စပံးထံလၢနီၣ်စံၢ်စပံးသၣ်အကျိးဘၣ် ဃးဒီးသ့တၢ်လၢာ်ကစၢ်ယွၤအတၢ်သးထီၣ်, အပူၤလီၤ.
16 လၢအဆ့ကၤဖးထီအလိၤ, ဒီးလၢအကံၣ်ဒုၣ်လိၤန့ၣ်မံၤ တဖျၢၣ်အိၣ်ကွဲးအသး, “စီၤပၤတဖၣ်အစီၤပၤဒီးကစၢ် တဖၣ်အကစၢ်” န့ၣ်လီၤ.
17 အန့ၣ်ဝံၤအလီၢ်ခံယထံၣ်ကလူးတဂၤအိၣ်ဆၢထၢၣ်လၢမုၢ် အဖီခိၣ်လီၤ. အဝဲဒၣ်ကိးထီၣ်လၢအကလုၢ်ဖးဒိၣ်ဆူကယဲၢ်ထိၣ်လၢ အယူၤလၢတၢ်ဖးဖီတဖၣ်, “ဟဲဒီးပာ်ဖှိၣ်သုသးတပူၤဃီလၢကစၢ်ယွၤအမူးဖးဒိၣ် အဂီၢ်န့ၣ်တက့ၢ်.
18 ဟဲဒီးအီၣ်စီၤပၤတဖၣ်, သုးခိၣ်ဖးဒိၣ်တဖၣ်, ဒီးသုးဖိတဖၣ် အဖံးအညၣ်, ကသ့ၣ်တဖၣ်ဒီးပှၤလၢအဒိးအီၤတဖၣ်အဖံး အညၣ်, ပှၤခဲလၢာ်, ကုၢ်မ့ၢ်ဂ့ၤပှၤသဘျ့မ့ၢ်ဂ့ၤ, အဒိၣ်မ့ၢ်ဂ့ၤအဆံးမ့ၢ်ဂ့ၤအဖံးအညၣ်န့ၣ်တက့ၢ်.”
19 တုၤနုၤတစုယထံၣ်တၢ်ဒူတၢ်ဃိၤတဒုန့ၣ်ဒီးဟီၣ်ခိၣ် အစီၤပၤတဖၣ်, ဒီးအဝဲသ့ၣ်အသုးမုၢ်သံၣ်ဘိတဖၣ်ပာ်ဖှိၣ်ထီၣ်အသးဒ်သိး အကဒုးတၢ်ထီဒါပှၤတဂၤလၢအဒိးကသ့ၣ်န့ၣ်, ဒီးထီဒါ အဝဲဒၣ်အသုးမုၢ်န့ၣ်လီၤ.
20 တၢ်ဒူတၢ်ဃိၤတဒုန့ၣ်ဘၣ်တၢ်ဖီၣ်န့ၢ်အီၤတပူၤဃီဒီးဝံ အဘျၣ်လၢအမၤတ့ၢ်တၢ်လီၤလးတဖၣ်လၢတၢ်ဒူတၢ်ဃိၤ တဒုန့ၣ်အမဲာ်ညါလီၤ. (ခီဖျိတၢ်လီၤလးတဖၣ်န့ၣ်, အဝဲဒၣ်လီန့ၢ်တ့ၢ်ပှၤသ့ၣ်တဖၣ်လၢအအိၣ်ဒီးတၢ်ဒူတၢ်ဃိၤ တဒုန့ၣ်အတၢ်ပနီၣ်, ဒီးပှၤသ့ၣ်တဖၣ်လၢအဘါတ့ၢ်တၢ်ဒူတၢ်ဃိၤတဒုန့ၣ် အက့ၢ်အဂီၤလီၤ.) တၢ်ဒူတၢ်ဃိၤဒီးဝံအဘျၣ်စ့ၢ်ကီး, ဘၣ်တၢ်တ့ၢ်လီၤမူဒံးအီၤဆူနိၣ်မ့ၣ်အူလၢအအီၣ်ဃုာ် တၢ်ဒီးကးန့ၣ်လီၤ.
21 အဝဲသ့ၣ်အသုးမုၢ်သံၣ်ဘိတဖၣ်ဘၣ်တၢ်မၤသံအီၤလၢနးတဘ့ၣ် လၢအဟဲဖျိးထီၣ်လၢပှၤဒိးကသ့ၣ်တဂၤန့ၣ်အကိာ်ပူၤ, ဒီးထိၣ်ခဲလၢာ်အီၣ်အဝဲသ့ၣ်တဖၣ်အညၣ်လၢအအီၣ်ဝဲကဲခဲလၢာ်လီၤ.